[1] Wulala, mɛlɛka fila wolu ka se Sɔdɔmu, ka Luti siinin talan so donda la. A k'ai ye ngɛ, a k'i wuli ka taa ai labɛn k'a ten bilin duu ma ai sen kɔlɔ.
[2] A do vɛɛ ai yɛ: «Ǹ kuntiilu, ài yi na, m'i taa ǹa bon na. Ài y'ài sen mako, ài yi si je. Kɛnɛ vɛ bɔla, ài yi taa àiya taaman na.» Ai do vɛɛ: «Ɛnɛn, mɔ sitɔ so bala lɔ jan ne.»
[3] Kɛɛ Luti ka to kuma wo magbeleyala ai yɛ, fɔɔ ai ka diɲa ka taa aa bon na. Luti k'ai faana kɛ bulu dɛvɛnnin ne le, ani dɔnnifen dɔgbɛlɛlu. Ai do ka dɔnni kɛ.
[4] Kɛɛ jani ai y'ai la, Sɔdɔmu sokɔnɔ kɛmɔ tanin ka la a kavelennu kan, ai bɛ ka na ka bon minin.
[5] Ai do ka Luti gbelengbelen, ai vɛɛ: «Kɛ́ minu nanin i ma su min nɔ, ai yi min ne? Ai labɔ, i y'ai di mɔ ma, m'i mɔ mako bɔ ai la!»
[6] Wo fɔ, Luti ka bɔ bon na ka bonda tuun lonalu ma.
[7] A do vɛɛ ai yɛ: «M̀ badenmalu, ài jon jaani, ài kà koyon wo suu kɛ.
[8] Ài y'a ye, ǹ denmoso fila yi jan, minu ma kɛ́ ko lɔn ba bene. Ài lɔ, ǹ'i wolu labɔ, ǹ'ai di ài ma. Ko ko si vɛ ài diyala, ài yi wo kɛ wolu la. Kɛɛ ài kà ko kɛ kɛ́ minu la, kamasɔlɔn m̀ malona ne lu yi.»
[9] Kɛɛ ai do vɛɛ Luti yɛ: «Bɔ mɔ ɲa!» Ai vɛɛ kɔtunun: «Kɛ́ min siinin mɔ sen kan lonaya bolo le ma. Wo le v'a jɛlɛ kɛ kititɛɛba le mɔ ma! Tandainɔ yi ne, mɔ kɛtɔ min kɛla i la, wo magbeleyatɔ ka timin iya lonalu ta la.» Ai do ka to Luti lasusula fanga la, k'ai masulunya bonnada la ka bɛn da kaliko ma.
[10] Kɛɛ kɛ́ fila wolu ka da laka k'ai bolo lɔsama ka Luti ladon bon na, ka ban ka da sɔɔ.
[11] Wo kɛ, ale mɔɔ minu tɛɛ da kɔlɔ, ai ka wolu bɛ ɲa gbɛ, kavelennu tanin ka la kɛmɔbalu bɛ kan. Wo kɛ, ai ka to fanfanna bonnada ma, fɔɔ k'ai sɛyɛ.
[12] Wo kɛ, kɛ́ fila wolu k'a fɔ Luti yɛ, ai vɛɛ: «Iya mɔɔ dɔgbɛlɛlu yi so kɔnɔ jan? I bilannu o, i denkɛlu o, i denmosolu o, iya mɔɔ suu suu vɛ kɛla so kɔnɔ, i y'ai bɛ labɔ jannɔ.
[13] Kamasɔlɔn m'i so min halaki bolo le ma. Makasilikan siyama vɛ se mɔ Tii Ala ma ka bɛn jannɔ mɔɔlu ya kokɛɲa ma. A do na mɔ lanala ko m'i so min halaki.»
[14] Wo mɛn Luti bolo, a ka bɔ ka taa kuma a bilannu fɛ, minu tɛɛ vɛ a denmosolu mamina. A do vɛɛ ai yɛ: «Ài wuli telemanin, ài m'i bɔ so ma, kamasɔlɔn mɔ Tii Ala yi so min halaki bolo le ma!» Kɛɛ Luti bilannu ka aa kuma jate jɛlɛmako le le.
[15] Kɛnɛ bɔnin, mɛlɛkalu k'a fɔ Luti yɛ k'a magbeleya, ai vɛɛ: «I wuli, i i moso ni i denmoso fila ta, i yi taa ai le, min y'a kɛ, ài kana taa talan so min jangata lɔ.»
[16] Kɛɛ Luti ka ai taako matamala. Mɔ Tii Ala ya hena lɔ, mɛlɛkalu ka a mina a bolo ma, ani a moso ni a denmoso fila, k'ai labɔ so ma.
[17] Ai labɔnin so ma, mɛlɛka kelen k'a fɔ ai yɛ, a vɛɛ: «Ài yi bɔli, ài y'ài nii makalan! Ài k'ài ɲa kaan ài kɔma, kumatɛ k'i lɔ dingila suu suu lɔ fofa min nɔ! Ài yi bɔli, ài yi taa tinilu wotɛ, alako ài kana halaki!»
[18] Kɛɛ Luti do vɛɛ: «Ǹ kuntiilu, ài jon jaani.
[19] M̀ɛ a ye k'a fɔ ko ǹa diyayine ài yɛ. Ài vɛ kanundeya jiya ǹ na ka bɛn ǹ nii lakisiko ma. Kɛɛ ǹ tɛ se taala tinilu wotɛ bɔli le, kamasɔlɔn masuwako min natɔ, a kɛtɔ m̀ masɔlɔnna siya wotɛ, ǹe do faatɔle.
[20] Ài yi so wo ye de ve le. A majaanyanin tɛ. Ǹ'i sene bɔlila ka taa woja. Ani fana, so wo dɔɔyayine. Diɲa, ǹ'i bɔli ka taa woja. Wo vɛ kɛla, ǹ nii la yi kisile.»
[21] Mɛlɛka vɛɛ: «Awa, m̀ɛ diɲa wo ma. I na so min ya ko fɔla yi ne, ǹ tɛnala so wo kunnafilila.
[22] Kɛɛ fɔ ài yi taa woja bɔli le, kamasɔlɔn ǹ tɛ se foi kɛla, fɔ ài vɛ sena je.» Wo le k'a kɛ, ai k'a fɔ so wo ma ko Zowali (wo kɔlɔ le ko «Fen dɔɔyanin»).
[23] Luti se Zowali so kɔnɔ, wo na bɛnna kɛnɛbɔ waate le ma.
[24] Wo kɛ, mɔ Tii Ala ka taa ni timiliki kawa ɲɛninninu lajii Sɔdɔmu ni Gɔmɔli solu kan iwo sanji, ai vɛ bɔla sangbolo lɔ mɔ Tii Ala sabu la.
[25] A ka so wolu kunnafili, ani fofa wo bɛ, sokɔnɔmɔɔlu tanin ka la bin ni kɔlɔmaju bɛ kan.
[26] Kɛɛ Luti moso k'i ɲa kaan a kɔma. A do ka jɛlɛma ka kɛ kɔɔ kulu le.
[27] Wo dusagbɛlon, Ibulahima k'i wuli sɔɔmadanina ka taa dingila wo lɔ, a n'i lɔla mɔ Tii Ala ɲakɔlɔ tɛɛminja.
[28] A k'a ɲa lajii Sɔdɔmu ni Gɔmɔli ani fofa muumɛ fannɔ siya le. A ka sisi kulu ba wulitɔla ye bɔla je iwo taasulu ba sisi.
[29] A ka kɛ wo ɲa le, Ala tɛɛ fofa kɔnɔ solu halakila waate min nɔ, Ala k'a mili Ibulahima ma ka Luti labɔ je, alako a kana talan so wolu kunnafiliko lɔ, Luti tɛɛ siinin tɛɛminja.
[30] Luti ni a denmoso fila ka Zowali so to ai kɔ ka jɛlɛ tinilu wotɛ k'i sii je, kamasɔlɔn a tɛɛ siyanna a toko lɔ Zowali. Wo le k'a kɛ, ale ni a denmoso fila ka t'i sii kawawoo lɔ.
[31] Lon dɔ, kɔlɔmamɔɔ k'a fɔ dɔɔmamɔɔ yɛ, a vɛɛ: «Mɔ fa vɛ kɔlɔya, ani kɛ́ tɛ duukolo kɔkan butu min yi la mɔ fɛ, iwo dunuɲamɔɔlu bɛ y'a kɛla teme.
[32] M'i mɔ fa lamin gbɛ la fɔɔ gbɛ y'a mina. Wo vɛ kɛla, m'i mɔ la a fɛ, min y'a kɛ, mɔ fa bɔzɔnnu kana tunun duukolo kɔkan.»
[33] Wo lon su lɔ, ai k'ai fa lamin gbɛ la fɔɔ gbɛ k'a mina. Wo kɛ, kɔlɔmamɔɔ ka t'i la a fɛ. Luti do ma ko sɔlɔn a denmoso la ni a wuli lɔ a fɛ.
[34] Wo dusagbɛlon, kɔlɔmamɔɔ k'a fɔ dɔɔmamɔɔ yɛ, a vɛɛ: «Su timinnin, ǹ ka ǹ la mɔ fa fɛ. Su vɛ kola, m'a lamin gbɛ la kɔtunun. Gbɛ vɛ a minala, ile fana yi t'i la a fɛ, min y'a kɛ, mɔ fa bɔzɔnnu kana tunun duukolo kɔkan.»
[35] Ai do k'ai fa lamin gbɛ la su wo lɔ kɔtunun. Wo kɛ, dɔɔmamɔɔ ka t'i la ai fa fɛ. Luti do ma ko sɔlɔn a denmoso la ni a wuli lɔ a fɛ.
[36] Wo le k'a kɛ, Luti denmoso mɔɔ fila ka kɔnɔ ta ai jɛlɛkanu fa la.
[37] Kɔlɔmamɔɔ ka denkɛ sɔlɔn ka a tɔɔla ko Mowabu (wo kɔlɔ le ko «Ǹ fa bɔzɔn»). Ale le ka kɛ Mowabukalu bema le, minu yi je bi.
[38] Dɔɔmamɔɔ fana ka denkɛ sɔlɔn ka a tɔɔla ko Bɛni-Ami (wo kɔlɔ le ko «Ǹ kabila den»). Ale le ka kɛ Amonikalu bema le, minu yi je bi.