[1] Isiyaka tɛɛ vɛ kɔlɔya, k'a ɲa ladivi, a do tɛɛ tɛ ko yena kobɛn. Wo waate lɔ, a ka a den kunfɔlɔ Esawu kili, a vɛɛ: «Ǹ den.» Esawu k'a javi, a vɛɛ: «Naam.»
[2] Isiyaka vɛɛ: «A ye, m̀ɛ kɔlɔya butu. M̀ ma ǹ taa waate lɔn.
[3] Wo lɔ saa, ǹ'a fɛ i iya donzoyafennu ta, iya biɲɛkala ni iya biɲɛlu koni, i yi taa donzoya tuu kɔlɔ, i yi soo dɔ faa ǹ yɛ ka na a le.
[4] Wo vɛ kɛla, i yi dɔnnifen dɔ tii kobɛn, iwo a diyanin ǹ ye teme, i yi na a le ǹ fɛ, ǹ'a dɔn. Wo vɛ kɛla, ǹ kɛtɔ duwawu kɛla i yɛ jani ǹ'i sa.»
[5] Wo k'a talan, Lebeka tolomalɔnin tɛɛ Isiyaka kan na, a vɛ kumala a den Esawu fɛ. Esawu taanin tuu kɔlɔ soo faaya lɔ,
[6] Lebeka k'a fɔ a den Janguba yɛ, a vɛɛ: «Ǹ na i fa kan mɛnna, a v'a fɔla i kɔlɔ Esawu yɛ, a vɛɛ:
[7] ‹Ǹ'a fɛ i yi na donzoya soo dɔ le ǹ yɛ, i y'a tii kobɛn, n'a dɔn. Wo vɛ kɛla, ǹ'i duwawu kɛ i yɛ ǹ Tii Ala ɲakɔlɔ jani ǹ'i sa.›
[8] Wo lɔ saa ǹ den, a kɛ iwo ǹ'a fɔla i yɛ teme.
[9] T'i ɲa kaan banilu wotɛ, i yi na a bolan kein fila le ǹ fɛ. Wo vɛ kɛla, ǹ'i dɔnnifen dɔ lɔbɛn ba so wo le, iwo a diyanin i fa yɛ teme.
[10] Wo vɛ kɛla, i yi taa a le i fa fɛ, a a dɔn, kosa a yi duwawu kɛ i yɛ jani a yi sa.»
[11] Kɛɛ Janguba ka a ba Lebeka javi, a vɛɛ: «I k'a lɔn ne ko ǹ kɔlɔ Esawu falima si walayine, ǹe do falima nuunnin.
[12] Ni ǹ fa k'a bolo tuu ǹ fali la do? A kɛtɔ a yena iwo ǹ'i a majuwaya yi la. Wo do vɛ kɛla, ǹ kɛtɔ daan le lasena ǹ jɛlɛ ma, duwawu tɛ wo le.»
[13] A ba do vɛɛ a yɛ: «Ǹ den, daan wo yi to ǹe le. Kɛɛ fɔ i yi ǹ kumakan labato. Taa, i yi na banilu le ǹ fɛ.»
[14] Wo fɔ, Janguba ka taa banilu mina ka na ai le a ba fɛ. A ba do ka dɔnnifen dɔ lɔbɛn, iwo a diyanin a fa yɛ teme.
[15] Wo kɛ, Lebeka ka a den kɔlɔmanda Esawu ya faani bɛ lɔ kein ta, min tɛɛ a bolo bon na, k'a bila a den dɔɔmaninda Janguba kanna.
[16] Janguba ba ka a bolokannalu ni a kaan masili ba gbolo le, kamasɔlɔn si tɛɛ tɛ a fan wolu ma.
[17] Wo kɛ, Lebeka na soo min tiila kobɛn, ani a na bulu min gbasila, a ka wolu bɛ don Janguba bolo.
[18] Wo kɛ, Janguba ka taa a fa fɛlɔ, k'a fɔ a yɛ, a vɛɛ: «Ǹ fa.» Isiyaka vɛɛ: «Naam. Ǹ den jene kain ne?»
[19] Janguba ka a fa javi, a vɛɛ: «I den kunfɔlɔ Esawu le kain. I na min fɔla ǹ yɛ, m̀ɛ wo kɛ. I wuli vɛ, i i sii, i yi ǹa donzoya soo dɔ dɔn, kosa i yi duwawu kɛ ǹ yɛ.»
[20] Isiyaka k'a fɔ a den yɛ, a vɛɛ: «Ɛɛ ǹ den! I na soo sɔlɔnna di jona?» Janguba vɛɛ: «I Tii Ala le na ǹ haijɛɛ fɔlinna.»
[21] Isiyaka vɛɛ: «Ǹ den, i madon ǹ na, ǹ'i m̀ bolo tuu i la, ǹ'a lɔn ni tuɲa le ǹ den Esawu le i le.»
[22] Janguba k'i madon ngɛ a fa Isiyaka la, a fa ka a bolo tuu a la k'a fɔ, a vɛɛ: «I kan bɔnin Janguba kan na, kɛɛ i bololu kɛnin iwo Esawu bololu.»
[23] Isiyaka ka fili Janguba ma, kamasɔlɔn si tɛɛ a bololu ma iwo Esawu bololu tɛɛ teme. Wo le k'a kɛ, a ka duwawu kɛ a yɛ.
[24] Kɛɛ a k'a maɲininga kɔtunun, a vɛɛ: «Ile gbugbu le ǹ den Esawu le?» Janguba k'a javi, a vɛɛ: «Iin, ǹe le.»
[25] Isiyaka vɛɛ: «Ǹ den, i na donzoya soo min tiila ǹ yɛ, i yi wo sii ǹ kɛɛna, ǹ'a dɔ dɔn, kosa ǹ'i duwawu kɛ i yɛ.» Janguba do ka wo sii a fa kɛɛna, a k'a dɔ dɔn. Janguba ka na lɛzɛnji fana le a fa fɛ, a ka wo min.
[26] Wo kɛ, a fa Isiyaka k'a fɔ a yɛ, a vɛɛ: «Ǹ den, i madon ǹ na, i yi ǹ sumu ǹ taman nɔ.»
[27] Janguba do k'i madon a la k'a sumu a taman nɔ. Isiyaka ka aa faani suma mɛn ngɛ, a ka duwawu kɛ a yɛ, a vɛɛ: «Ǹ den suma kɛyine iwo sɛnɛ suma, ǹ Tii Ala na balaka donna sɛnɛ min nɔ.
[28] Ala yi bumu lajii i yɛ ka bɔ sannɔ, k'i sɔ duu tɔnɔmafen siyama la, k'iya sɛnɛfen kɛsɛ ni iya lɛzɛnji kula siyaya.
[29] Ala yi sibolomalu don i fanga kɔlɔ, ka jamalu majii i kɔlɔ. Ala yi i lasii kuntiiya la i badenmalu kunna, ani k'i ba bɔzɔnnu majii i kɔlɔ. Mɔɔ min vɛ i daanna, daan yi wo tii ma. Mɔɔ min do vɛ duwawu kɛla i yɛ, wo tii ma yi kɛ duwawuden ne.»
[30] Isiyaka wɔlinin duwawu kɛla Janguba yɛ, Janguba bɔ a fa fɛlɔ feeya, a kɔlɔ Esawu vɛ nala ka bɔ donzoya tuu kɔlɔ.
[31] Ale fana ka dɔnnifen dɔ tii kobɛn, ka taa wo sii a fa kɛɛna. A do vɛɛ a fa yɛ: «Ǹ fa, i wuli vɛ, i den ya donzoya soo dɔ dɔn, kosa i yi duwa kɛ ǹ yɛ.»
[32] A fa Isiyaka do k'a maɲininga, a vɛɛ: «Jene kain ne?» A k'a javi, a vɛɛ: «Ǹe le kain, i den kunfɔlɔ Esawu.»
[33] Wo mɛn Isiyaka bolo, a lɔ vɛ jaajaala gbiligbili. A do vɛɛ: «Jene taanin donzoya kɛla ka na wo soo sii ǹ kɛɛna? M̀ɛ wo dɔn ka duwawu kɛ wo tii yɛ, jani i yi na. Wo tii ma le kɛtɔ duwawuden ne.»
[34] Esawu ka a fa kumakan wo mɛn ngɛ, a vɛ a kan labɔla kasi le niimakumun boloma. A k'a fɔ a fa yɛ, a vɛɛ: «Ǹ fa, i yi duwawu dɔ kɛ ǹe fana yɛ!»
[35] Isiyaka k'a javi, a vɛɛ: «I dɔɔni le nanin m̀ majuwayala. Ǹ tɛɛ ka kan ka duwawu min kɛ i yɛ, a vɛ wo ta a jɛlɛ yɛ.»
[36] Esawu vɛɛ: «Janguba tɔɔ min lanin a la, wo bɛnyine a ma feu, kamasɔlɔn a siɲa filana le ne, a vɛ ǹ senkɔlɔtɛɛla. A ka ǹa kɔlɔya mina ǹ na. Tandainɔ yi ne, a vɛ ǹa duwawu bɔ m̀ bolo.» A do vɛɛ kɔtunun: «I ma duwawu gbɛlɛ ladalo ǹ yɛ?»
[37] Isiyaka ka Esawu javi, a vɛɛ: «I tolomalɔ! M̀ɛ a lasii kuntiiya la i kunna, ka a badenma tɔ bɛ kɛ aa bɔiden ne. M̀ɛ sɛnɛfen kɛsɛ ni lɛzɛnji sɔlɔnko duwawu kɛ a yɛ. Mindɛ tonin kɔ butu, ǹ'i se min dila i ma vɛ, ǹ den?»
[38] Esawu do vɛɛ a fa yɛ: «Hali duwawu kaɲa kelen tɛ i bolo k'a kɛ ǹe fana yɛ, ǹ fa?» Esawu vɛ a kan labɔla kasi le.
[39] Wo fɔ a bolo, a fa do vɛɛ a yɛ: «I tolomalɔ yi ne, i siiya majaanyatɔle duu tɔnɔmafennu la, bumu yi jiila duu min kan ka bɔ sannɔ.
[40] I kɛtɔ i balo sɔlɔnna ka bɛn iya siyamifan ma, i do kɛtɔ i dɔɔni ya bɔiden ne le, kɛɛ i vɛ tɛnzɛnna waate min nɔ, i kɛtɔ i jɛlɛ bɔla a fanga kɔlɔ.»
[41] Ai fa na duwawu min kɛla Janguba yɛ, wo le ka baa Esawu la. Esawu do k'a fɔ a miliya lɔ, a vɛɛ: «Ǹ fa sa waate ma vɛ sulunya. Wo waate vɛ banna, ǹ kɛtɔ ǹ dɔɔni Janguba faala.»
[42] Ai ka Lebeka lalɔnni a denkɛ kunfɔlɔ Esawu ya kumalu la waate min nɔ, a ka sama bila a denkɛ dɔɔmaninda Janguba ma ko a yi na. A do vɛɛ a yɛ: «I tolomalɔ, i kɔlɔ Esawu y'i faako le lɔ, min y'a kɛ, a aa mɔnɛya bɔ i lɔ teme.
[43] Wo lɔ saa, ǹ den, i yi ǹ kumakan labato. Bɔli i yi taa ǹ kɔlɔ Laban fɛlɔ Halan so kɔnɔ.
[44] I waate dana kɛ a fɛlɔ, fɔɔ i kɔlɔ funu ma vɛ jiila.
[45] I yi to je, fɔɔ i kɔlɔ josola vɛ jiila ka bɛn iya ko ma, a yi ɲina i kɛko lɔ, i na min kɛla a la. Wo do vɛ kɛla, ǹ kɛtɔ sama bilala i ma, i yi na. Niwotɛ, m̀ bɔnɔtɔ ài mɔɔ fila la lon kelen.»
[46] Wo kɛnin, Lebeka k'a fɔ Isiyaka yɛ, a vɛɛ: «Esawu na Hɛtika moso minu fulula, wolu vɛ ǹa dunuɲalɔtɛɛ ɲia kɛ m̀ bolo. Ni Janguba fana ka Hɛtika moso min suu dɔ fulu, wo vɛ kɛla, ǹa dunuɲalɔtɛɛ kɛtɔ mindɛ ɲiala m̀ ma?»