[1] Ko wolu timinnin kɔ, Misilan masakɛ ya minnifen ladanba ni aa bulugbasiba ka kolɔtiɲa dɔ kɛ a la.
[2] Masakɛ ka a josolakuna a kankɔlɔsii fila wolu ma, aa minnifen ladan kuntiiba ni aa bulugbasi kuntiiba koni,
[3] a do k'ai bila kaso la lakanali kuntiiba ya bon na, Jusufu bilanin tɛɛ kaso la tɛɛminja.
[4] Lakanali kuntiiba ka kasoden wolu kalifa Jusufu la, ko a yi kɛ ai madɛmɛnba le. Ai ka waate dana kɛ kaso la je.
[5] Masakɛ ya minnifen ladanba ni aa bulugbasiba ka to kasobon na, ai mɔɔ fila ka siwo kɛ su kelen nɔ, ai bɛ ni ai ta siwo, siwo wolu bɛ ni ai ta kɔlɔ.
[6] Kɛnɛ bɔnin, Jusufu ka na ai fɛlɔ, k'ai ye ai ɲalɔɲolonnin.
[7] A do k'ai maɲininga, a vɛɛ: «Mindɛ na ài ɲalɔɲolonna bi?»
[8] Ai k'a javi, ai vɛɛ: «Ǹu mɔɔ fila na siwola bi su timinnin min nɔ, kɛɛ mɔɔ tɛ jan min yi se siwo wolu kɔlɔ fɔla mɔ yɛ.» Jusufu do vɛɛ: «Ala le tɛ siwo bɛ kɔlɔfɔba le? Ài àiya siwolu ɲajiya vɛ ǹ na.»
[9] Wo fɔ, minnifen ladan kuntiiba ka a ta siwo ɲafɔ damina Jusufu yɛ, a vɛɛ: «Ǹa siwo lɔ, ǹ na lɛzɛnju dɔ yena ǹ ɲa,
[10] a bolo sawa le tɛɛ a la. A bulu nɛlennu bɔnin feeya, a feelelu ka bɔ telemanin ka a den wulɛnnu kɛ a tizannu la.
[11] Masakɛ ya jiyafɛ tɛɛ ǹ tɛɛ la. Ǹ na lɛzɛn wulɛn wolu tala, k'ai bɔin masakɛ ya jiyafɛ kɔnɔ, ka ban ka jiyafɛ don a bolo.»
[12] Jusufu vɛɛ: «Wo kɔlɔ le ne. Bolo sawa wolu yi tele sawa le le.
[13] Tele sawa vɛ timinna, masakɛ kɛtɔ i kunkɔlɔtala, k'i laseikɔ i lɔya kɔlɔ lɔ. I do kɛtɔ masakɛ ya jiyafɛ donna a bolo, iwo i deinin tɛɛ a kɛla teme sɔ, i tɛɛ aa minnifen ladanba le waate min nɔ.
[14] Kɛɛ i jon jaani, i vɛ kayila wo sɔlɔnna waate min nɔ, i i hangili to ǹ nɔ, i yi kanundeya kɛ ǹ yɛ. Ǹ'a fɛ i yi ǹa ko lase masakɛ ma, min y'a kɛ, ǹ'i bɔ kasobon min kɔnɔ.
[15] Kamasɔlɔn ai na ǹ suɲala ka bɔ Hebululu ya duu le lɔ. Hali Misilan jannɔ, m̀ ma ko kɛ min yi kɛ ǹa kasolabila kun ne.»
[16] Bulugbasi kuntiiba k'a ye ngɛ ko Jusufu vɛ a tɔva ya siwo kɔlɔ fɔ k'a diya a yɛ, ale fana ka a ta siwo ɲajiya a la kɔtunun, a vɛɛ: «Ǹe fana na siwola, ka gbɔlɔ sawa ye ǹ kun.
[17] Bulu suu bɛ dɔ tɛɛ sanfɛ gbɔlɔ kɔnɔ, minu lɔbɛnnin tɛɛ masakɛ yɛ. Kɛɛ kɔnɔlu le tɛɛ bulu wolu dɔnna gbɔlɔ kɔnɔ ǹ kun.»
[18] Jusufu k'a javi, a vɛɛ: «Siwo wo kɔlɔ le ne. Gbɔlɔ sawa wolu yi tele sawa le le.
[19] Tele sawa vɛ timinna, masakɛ kɛtɔ i kun tɛɛla a la, ka ban k'i su dɛnnin to jili la. Kɔnɔlu le natɔ i soo dɔnna.»
[20] Wo tele sawana lon na bɛnna masakɛ sɔlɔnlon sanɲɔɔmɛn ma. Masakɛ do ka tolon ba kɛ a kankɔlɔsiilu yɛ. Ai ka to tolonna, masakɛ ka aa minnifen ladan kuntiiba ni aa bulugbasi kuntiiba kunkɔlɔta a kankɔlɔsiilu ɲakɔlɔ.
[21] A ka minnifen ladan kuntiiba laseikɔ a lɔya kɔlɔ lɔ, min y'a kɛ, a yi kɛ jiyafɛ donna a bolo kɔtunun.
[22] Kɛɛ masakɛ do ka bulugbasi kuntiiba faa, ka a su dɛn jili la, iwo Jusufu n'a fɔla teme.
[23] Wo bɛ n'a kɛ, minnifen ladan kuntiiba hangili ma to Jusufu lɔ butu, a do ka ɲina a kɔ fefe.