[1] Janguba k'a kun lawuli ka Esawu natɔla ye, kɛ́ mɔɔ kɛmɛ naani (400) v'a fɛ. Wo kɛ, a ka a dennu lɔtala Lasɛli ni Leya ani aa jɔnmoso fila wotɛ, ai bɛ ni ai ta ba.
[2] A ka aa jɔnmosolu ni ai ta dennu bila ɲafɛ, ka Leya ni a dennu tuun wolu la, ka Lasɛli ni Jusufu bila kɔfɛ.
[3] Ale gbu ka timin ai ɲa, a v'i bilinna duu ma siɲa wolowulan ne, haan fɔɔ a k'i madon a kɔlɔkɛ la.
[4] Kɛɛ Esawu ka na bɔli le ka Janguba labɛn. A do k'i fili Janguba lɔ, k'a sumu a taman nɔ, ai mɔɔ fila vɛ kasila.
[5] Esawu k'a kun lawuli ka mosolu ni dennilu ye mingɛ, a ka Janguba maɲininga, a vɛɛ: «Jene i taamaɲɔɔ minu le?» Janguba vɛɛ: «Ǹ dennu le ne, Ala na minu dila ǹe iya bɔiden ma aa henandeya lɔ.»
[6] Wo fɔ, jɔnmosolu ni ai dennu k'i madon k'ai mabilin.
[7] Leya ni a dennu fana ka na k'ai mabilin. A laban, Lasɛli ni Jusufu ka na k'ai mabilin Esawu kɔlɔ.
[8] Esawu ka Janguba maɲininga, a vɛɛ: «Ǹ na ǹ ɲɔɔmɛnna kolofen kulu dɔ minu le, i na wolu lataala ɲafɛ mindɛ lɔ?» Janguba k'a javi, a vɛɛ: «Ǹ kuntii, ǹ na wo kɛla fɔsa ǹa ko yi diya i yɛ teme.»
[9] Esawu do vɛɛ: «Ǹ dɔɔ, ǹe ta sɔlɔnfen walayine. Ile talu bɛ yi to i bolo.»
[10] Kɛɛ Janguba do vɛɛ: «I jon, ni ǹa ko diyanin ka k'i yɛ, wo vɛ kɛla, i yi ǹa samalifennu mina. M̀'i ye ɲa ni ɲa, i do v'i bolo sii ǹ kɔlɔ, wo do kɛyine iwo m̀ɛ ǹ ɲa la Ala kan.
[11] Ǹ na ǹ sɔlɔnfen minu lanala i ma, i jon, i bolo sii ai kɔlɔ. Kamasɔlɔn Ala vɛ aa henandeya lase m̀ ma, ka m̀ mako bɛ laɲia.» Janguba do ka to kuma wo magbeleyala Esawu yɛ, fɔɔ a ka diɲa.
[12] Wo kɛ, Esawu vɛɛ a yɛ: «M'i siya mina. M̀ bilatɔ i ɲa.»
[13] Kɛɛ Janguba do vɛɛ a yɛ: «Ǹ kuntii, i k'a lɔn dennilu lɔlɔnin tɛ, ani ǹ jandonin kolofen sɔlɔnnin kulalu lɔ. Ni ǹ k'a fɔ ǹ'i wolu gbɛngbɛn tele muumɛ bɛ kɔlɔ, kolofen bɛ faatɔle.
[14] Ǹ kuntii, i yi diɲa, i yi bila ǹ ɲa, i yi taa. Wo vɛ kɛla, ǹ'alama sɛgbɛ, ǹ'i na ka bɛn kolofennu ni dennilu taamaɲa ma, ai to a lɔ, ǹ'i se i fɛlɔ Seyili tinima duu lɔ.»
[15] Esawu vɛɛ: «Wo vɛ kɛla, diɲa ǹ'i ǹa mɔɔ dɔlu to i bolo.» Janguba do vɛɛ: «Mindɛ lɔ, ǹ kuntii? Kɛɛ fɔ ǹa ko yi diya i yɛ.»
[16] Wo lon kelen na, Esawu ka kɔsei damina Seyili tinima duu lɔ.
[17] Kɛɛ Janguba do ka taa dingila dɔ lɔ, ai y'a fɔla min ma ko Sukoti. A ka bon lɔ a jɛlɛ yɛ je, ani ka gbaalu lɔ aa kolofennu yɛ. Wo le k'a kɛ, ai ka woja tɔɔla ko Sukoti (wo kɔlɔ le ko «Gbaalu»).
[18] Janguba na waate ka bɔ Suliya jamana sanfɛ fannɔ, a ka se Sɛkɛmu so kɔnɔ hɛlɛ lɔ, min yi Kanaan duu lɔ. A do k'a makɛ so magbɛn nɔ.
[19] Janguba ka aa faanigbaa lɔ gbɛkɛnɛ duu fan min kan, woja tɛɛ Hamoli bɔzɔnnu le bolo, Hamoli min tɛɛ Sɛkɛmu fa le le. A ka woja san ai ma wɔligbɛ gbana kɛmɛ (100) le la.
[20] A ka salakagbalan lɔ woja k'a fɔ a ma ko Ala yi Isilan Tii le le.