[1] Wo kɛ, Janguba ka a sɔlɔnfennu bɛ madon a la, ka Misilan siya mina. A se Bɛliseba so kɔnɔ, a ka salaka dɔlu bɔ Ala yɛ, a fa Isiyaka tɛɛ Ala min batola.
[2] Su wo lɔ, Ala ka ko dɔ lajɛlɛ a ɲa ma, a vɛɛ a yɛ: «Janguba, Janguba!» Janguba do vɛɛ: «Naam.»
[3] Ala vɛɛ: «Ǹe le Ala le, i fa tɛɛ Ala min batola. I kà siyan taako lɔ Misilan, kamasɔlɔn ǹ kɛtɔ siboloma fangama dɔ bɔla i lɔ woja.
[4] Ǹe jɛlɛkanu kɛtɔ i fɛ i taa waate Misilan. Ǹe do kɛtɔ i laseikɔla jan fana. I sa waate, i ɲaden matuuntɔ Jusufu le bolo.»
[5] Wo mɛn Janguba bolo, a ka taama lawuli ka bɔ Bɛliseba. Janguba denkɛlu ka ai fa lajɛlɛ wotolo kɔnɔ ka taa a le. Ai ka ai mosolu ni aa dennu kɛ wotolo dɔgbɛlɛlu kɔnɔ ka taa ai le, Misilan masakɛ na wotolo minu lataala ai tako lɔ.
[6] Ai do ka taa aiya kolofennu ni ai sɔlɔnfennu bɛ le, ai na minu sɔlɔnna Kanaan duu lɔ. Janguba ni a bɔzɔnnu bɛ ka taa Misilan i ɲɔɔ fɛ ten ne:
[7] a denkɛ ni a denmosolu, aini a mamani kɛman ni a mosoman. A ka a bɔzɔn bɛ lakafonnin ta, ai bɛ ka taa Misilan i ɲɔɔ fɛ.
[8] Bani-Isilanka minu ka taa Misilan, wolu tɔɔ le ne, Janguba ni a denkɛlu koni: Lubɛn, Janguba denkɛ kunfɔlɔ.
[9] Lubɛn denkɛlu le tɛɛ Enoki, Palu, Hɛzilon ani Kalimi le.
[10] Simiyɔn denkɛlu le tɛɛ Jemuyeli, Jamin, Ohadi, Jakin, Zohali ani Sawuli le. Sawuli ba le tɛɛ Kanaanka le.
[11] Levi denkɛlu le tɛɛ Gelison ni Kehati ni Melali le.
[12] Juda denkɛlu le tɛɛ Ɛli, Onan, Sɛla, Pɛlɛzi ani Zela le. Kɛɛ Ɛli ni Onan ka sa Kanaan duu le lɔ. Pɛlɛzi denkɛlu le tɛɛ Hɛzilon ni Hamuli le.
[13] Isakali denkɛlu le tɛɛ Tola, Puva, Jobu ani Similon ne.
[14] Zebulun denkɛlu le tɛɛ Seledi ni Elon ni Jaheleli le.
[15] Janguba moso Leya na denkɛ minu sɔlɔnna a yɛ Suliya jamana sanfɛ fannɔ, wolu le ve le, ka la a denmoso Dina kan. Janguba bɔzɔn minu bɔnin Leya lɔ, wo bɛ lakafonnin ka kɛ mɔɔ bisawa ni sawa (33) le le.
[16] Gadi denkɛlu le tɛɛ Zifiyon, Hagi, Suni, Ezibon, Ɛli, Alodi, ani Aleli le.
[17] Asɛli denkɛlu le tɛɛ Imina, Isiva, Isivi ani Beliya le, k'ai badenmoso Sɛla la ai kan. Beliya denkɛlu le tɛɛ Hɛbɛli ni Malikiyɛli le.
[18] Laban tɛɛ vɛ aa jɔnmoso Zilipa min di a denmoso Leya ma, wo ta bɔzɔnnu le ve le. Zilipa ka denkɛ wolu le sɔlɔn Janguba yɛ. Ai bɛ lakafonnin ka kɛ mɔɔ tan ni wɔɔlɔ (16) le le.
[19] Janguba moso Lasɛli denkɛlu le tɛɛ Jusufu ni Bɛnjamin ne.
[20] Jusufu ka to Misilan jamana lɔ, a moso Asenati ka Efilaimu ni Manase sɔlɔn a yɛ. Asenati tɛɛ Potifɛla denmoso le le, min tɛɛ salakalaseba le On so kɔnɔ.
[21] Bɛnjamin denkɛlu le tɛɛ Bela, Bɛkɛli, Asibeli, Gela, Naaman, Ehi, Losi, Mupimu, Hupimu ani Alidi.
[22] Janguba moso Lasɛli na denkɛ minu sɔlɔnna a yɛ, wolu le ve le. Ai bɛ lakafonnin ka kɛ mɔɔ tan ni naani (14) le le.
[23] Dan denkɛ le tɛɛ Husimu le.
[24] Nafitali denkɛlu le tɛɛ Jazili, Guni, Jezeli ani Silemu le.
[25] Laban tɛɛ vɛ aa jɔnmoso Biliha min di a denmoso Lasɛli ma, wo ta bɔzɔnnu le ve le. Biliha ka denkɛ wolu le sɔlɔn Janguba yɛ. Ai bɛ lakafonnin ka kɛ mɔɔ wolowulan ne le.
[26] Janguba kɔmɔɔ minu ka taa a fɛ Misilan, a jɛlɛkanu bɔzɔnnu koni, wolu bɛ lakafonnin ka kɛ mɔɔ biwɔɔlɔ ni wɔɔlɔ (66) le le. A maamosolu tɛɛ tɛ wo kɔndɛ lɔ.
[27] Jusufu na denkɛ fila minu sɔlɔnna Misilan, wolu ka kafon Janguba bɔzɔn tɔlu kan. Wo le k'a kɛ, Janguba ya bonnamɔɔ jilika, minu nanin Misilan jamana lɔ, wolu bɛ lakafonnin ka kɛ mɔɔ biwolowulan (70) ne le.
[28] Janguba tɛɛ vɛ Juda kelaya Jusufu ma, min y'a kɛ, Jusufu yi na a labɛn Gosɛn duu lɔ. Janguba nu se Gosɛn,
[29] Jusufu ka aa soowotolo lɔbɛn ka ban ka taa a fa Janguba labɛnya lɔ Gosɛn. Ai k'i ɲɔɔ ye ngɛ, Jusufu k'i fili a fa tɛma, k'a kun la wo kawa kan, ka to kasila waate jaan kɔlɔ.
[30] Janguba k'a fɔ Jusufu yɛ, a vɛɛ: «M̀'i ye ɲa ni ɲa, k'a lɔn i i nii lɔ bene. Wo ma yi ne, m̀ɛ ǹ lɔbɛn saya ɲa butu.»
[31] Wo kɛ, Jusufu k'a fɔ a badennu ni a fa ya demayalu yɛ, a vɛɛ: «Ǹ taatɔ Misilan masakɛ fɛlɔ ka min ne fɔ a yɛ, ǹ ko: ‹M̀ badenmalu ni ǹ fa ya demayalu, minu siinin tɛɛ Kanaan duu lɔ, wolu vɛ na yi ne m̀ ma.
[32] Kolofenkunnasiiba le ai le, ai do nanin aiya saalu ni aiya banilu ni aiya nisilu le, ani ai sɔlɔnfennu bɛ.›
[33] Ni Misilan masakɛ k'ài kili k'ài maɲininga àiya baale suu ma,
[34] ài y'a javi, ài vɛɛ: ‹Maa kuntii, kolofenkunnasiiba le ǹu le ka ta maa denniya waate ma ka na sii bi la, iwo mɔ bemanu tɛɛ teme.› Ni ài k'a javi ten, a diɲatɔ ài siiko ma Gosɛn duu lɔ, kamasɔlɔn Misilankalu yi kolofenkunnasiibalu yena mɔɔ kɔsɔnin ne le.»