[1] Ibulahima ka moso gbɛlɛ fulu, min tɔɔ tɛɛ ko Ketula.
[2] Wo ka denkɛ min ne lu sɔlɔn Ibulahima yɛ: Zimilan, Jokisan, Medan, Madiyan, Isibaki ani Suwa.
[3] Jokisan ka denkɛ min ne lu sɔlɔn: Seba ni Dedan. Dedan bɔzɔnnu ka kɛ Asulika ni Letusika ni Lewumikalu le.
[4] Madiyan denkɛlu le ne: Efa, Efɛli, Henoki, Abida, ani Elida. Ketula bɔzɔn ne wolu bɛ le.
[5] Ibulahima ka a kɛɛ bɛ to Isiyaka le bolo.
[6] Kɛɛ jani Ibulahima yi sa, a ka dimalifen dɔlu di a denkɛ gbɛlɛlu ma, aa jɔnmosolu na minu sɔlɔnna a yɛ. A k'ai lataa duu telebɔ fannɔ siya le, min y'a kɛ, ai y'ai mataa a denkɛ Isiyaka la.
[7] Ibulahima si danmajiya ka kɛ san kɛmɛ san biwolowulan ni loolu (175) le le.
[8] Ibulahima ka sa, aa si jaan sɔlɔn kɔ. A do ka taa a bemanu taaya lɔ.
[9] A denkɛ Isiyaka ni Sumayila ka a sudoon Makipela kawawoo lɔ, Mamele magbɛn nɔ, Efelon ya sɛnɛkɛ duu lɔ, Hɛtika kɛ́ Zohali denkɛ,
[10] Ibulahima na duu min sanna Hɛtikalu ma. Ai ka Ibulahima sudoon je a moso Salan dafɛ.
[11] Ibulahima sa kɔ, Ala ka nɛɛma kɛ a denkɛ Isiyaka yɛ. Isiyaka siinin tɛɛ Lahayi-Loyi kɔlɔn ne dafɛ.
[12] Sumayila bɔzɔnnu ya taliku le min ne, Sumayila min tɛɛ Ibulahima dɛnkɛ le, Salan ya Misilanka jɔnmoso Hajala na min sɔlɔnna Ibulahima yɛ.
[13] Sumayila denkɛlu tɔɔ le ne, ka damina a denkɛ kunfɔlɔ ma ka taa sii a laban na: Nebayoti, Kedali Adibɛli, Mibisamu,
[14] Misima, Duma, Masa,
[15] Hadadi, Tema, Jetuli, Nafisi, ani Kedima.
[16] Sumayila denkɛlu le ve le, minu ya toodalu ni ai makɛyalu tɔɔ lanin ailu gbu la, minu kɛnin ɲamɔɔ tan ni fila (12) le aiya kabilalu kunna.
[17] Sumayila si danmajiya ka kɛ san kɛmɛ san bisawa ni wolowulan (137) ne le. A ka sa ka taa a bemanu taaya lɔ.
[18] A bɔzɔnnu siiya daminanin tɛɛ Havila le ma ka taa se haan fɔɔ Suli ma, min yi Misilan duu dan ɲatelenma lɔ, i vɛ kɛla taala Asuli fannɔ siya le. Ai siinin tɛɛ ai ta fan ne jɛ, k'ai mataa ai badenma dɔlu la.
[19] Isiyaka bɔzɔnnu ya taliku le ne, Ibulahima denkɛ. Ibulahima ka Isiyaka sɔlɔn.
[20] Isiyaka si danma senin san binaani (40) lɔ, a ka Lebeka fulu. Alamuka kɛ́ Betuwɛli denmoso le tɛɛ wo le, ani Laban dɔɔni, ka bɔ Suliya jamana sanfɛ fannɔ.
[21] Isiyaka ka mɔ Tii Ala madiya a moso yɛ, kamasɔlɔn a tɛɛ moso malɔnin ne le. Mɔ Tii Ala ka aa madiyalikan mɛn, wo kɛ, Lebeka vɛ kɔnɔ tala.
[22] Kɛɛ a dennu tɛɛ sɛɛ kɛla a kɔnɔ. Lebeka k'a fɔ wo le lɔ, a vɛɛ: «Mindɛ gbu yi kɛla ǹ na yi ne ve?» A do ka mɔ Tii Ala le maɲininga ka bɛn ko wo ma.
[23] Mɔ Tii Ala k'a javi, a vɛɛ: «Siboloma fila le i kɔnɔ, jama fila minu yi i kɔnɔgbolo lɔ, wolu falantɔle a ma. Kelen fanga walatɔ a tɔ kelen ta le, kɔlɔmamɔɔ kɛtɔ dɔɔmamɔɔ fanga le kɔlɔ.»
[24] Lebeka moi lon senin, a k'a ye ko tuɲa le, filaninnu le a kɔnɔ.
[25] Filani min sɔlɔnnin kunfɔlɔ le, wo wulɛnyine tɛɛ, ka a falima si wala iwo kɛnkanma min ladannin saa si le. Ai k'a tɔɔla ko Esawu (wo kɔlɔ le ko «Sibatii»), ka bɛn a falima si ya wala ma.
[26] Wo kɔ, a dɔɔkɛ ka sɔlɔn, a kɔlɔkɛ sendina minanin vɛ a bolo. Wo le k'a kɛ, ai k'a tɔɔla ko Janguba (wo kɔlɔ le ko «Sendina minala»). Lebeka na den wolu sɔlɔnna waate min nɔ, Isiyaka si danmajiya tɛɛ san biwɔɔlɔ (60) le le.
[27] Dennilu ka kavelenya ngɛ, Esawu ka kɛ donzo fali le, ka tuukɔlɔ ko diya a yɛ bubale. Janguba do ka kɛ mɔɔ masumanin ne le, ale tɛɛ tola aiya faanigbaalu kɔlɔ.
[28] Esawu ya ko diyanin tɛɛ Isiyaka yɛ, ka bɛn wo ya donzoya soo ko le ma. Kɛɛ Janguba ya ko diyanin tɛɛ Lebeka yɛ.
[29] Lon dɔ, Janguba ka to mafen tiila, Esawu kɔɔntɔ ka na ka bɔ tuu kɔlɔ, k'a talan a lɔ vɛ ban.
[30] Esawu k'a fɔ Janguba yɛ, a vɛɛ: «Kɔɔn ba le ǹ na! I jon, i yi ǹ sɔ iya sɔsɔ wulɛn dɔ sɔ, ǹ'a dɔn telemanin.» Kuma wo ka kɛ sabu le, ai k'a fɔ Esawu ma ko Ɛdomi (wo kɔlɔ le ko «Wulɛn»).
[31] Janguba k'a javi, a vɛɛ: «Fɔ i iya kɔlɔya fele m̀ ma pɛ.»
[32] Esawu vɛɛ: «Ǹ'i sa bolo le ma. Ǹa kɔlɔya kɛtɔ mindɛ ɲiala m̀ ma?»
[33] Janguba do vɛɛ: «I kalin bene ǹ yɛ.» Esawu k'a kalin a yɛ ka aa kɔlɔya fele Janguba ma.
[34] Wo kɛ, Janguba ka Esawu sɔ bulu ni sɔsɔ mɛsɛn dɔ sɔ. Esawu ka dɔnni kɛ k'i min, ka ban k'i wuli ka taa. Wo le k'a kɛ, Esawu ma aa kɔlɔya jate foi le.