[1] Ala k'a fɔ Janguba yɛ, a vɛɛ: «I wuli, i yi taa Bɛtɛli, i yi sii je. I yi salakagbalan lɔ je ǹe Ala yɛ, ǹe min na bɔla gbɛ la i yɛ i bɔli waate lɔ i kɔlɔ Esawu ma.»
[2] Wo mɛn Janguba bolo, a ka jamali di aa demayalu ni a taamaɲɔɔlu bɛ ma, a vɛɛ: «Siboloma gbɛlɛ mɔɔlu ya joo minu y'ài bolo, ài yi wo bɛ lafili. Ài y'ài jɛlɛ lasɛnɛya, ka faani sɛnɛyanin bila ài kanna.
[3] Wo vɛ kɛla, mɔ taatɔ Bɛtɛli, ǹ'i salakagbalan lɔ je Ala yɛ, Ala min na ǹa madailikan javila, ǹ tɛɛ tɔlɔya lɔ waate min nɔ, ani min tɛɛ ǹ fɛ ǹ timinyalu bɛ lɔ.»
[4] Wo kɛ, ai ka aiya joolu di Janguba ma, ani tololafen minu tɛɛ ai tolo la. Janguba ka diɲa sen kɔlɔmaju dɔ kɔlɔ min tɛɛ Sɛkɛmu so dafɛ, ka fen wolu bɛ bila a lɔ k'a datuun.
[5] Ai ka to taamana, Ala ka siyan ba don ai laminin sokɔnɔmɔɔlu bɛ lɔ. Wo le k'a kɛ, ai ma bila Janguba ni a denkɛlu kɔ.
[6] Janguba ni aa mɔɔlu bɛ ka se Luzi so kɔnɔ, ai y'a fɔla tɛɛminja ma ko Bɛtɛli, min yi Kanaan duu lɔ.
[7] A do ka salakagbalan lɔ je k'a fɔ woja ma ko Ɛli-Bɛtɛli (wo kɔlɔ le ko «Ala min yi Bɛtɛli»), kamasɔlɔn Ala k'a jɛlɛ jiya Janguba la je le, a tɛɛ bɔlila a kɔlɔkɛ ma waate min nɔ.
[8] Lebeka lasonba Dɛbola ka sa je le. Ai ka a sudoon kɔlɔmaju dɔ kɔlɔ Bɛtɛli magbɛn nɔ. A do ka kɔlɔmaju wo tɔɔla ko Kasi Kɔlɔma.
[9] Ala ka bɔ gbɛ la Janguba yɛ kɔtunun, a na waate ka bɔ Suliya jamana sanfɛ fannɔ. Ala ka balaka don a lɔ,
[10] a vɛɛ a yɛ: «I tɔɔ le Janguba, kɛɛ i tɔɔ tɛnala kɛla ten butu. I tɔɔ le butu ko Isilan.» Janguba ka Isilan tɔɔ masɔlɔn ten ne.
[11] Ala k'a fɔ a yɛ kɔtunun, a vɛɛ: «Ǹe le Ala Taala le. I yi jili ka siyaya. Siboloma dɔ bɔtɔ i lɔ, ani siboloma siyamalu. Masalu bɔtɔ i lɔ.
[12] Ǹ na duu min dila Ibulahima ni Isiyaka ma, ǹ kɛtɔ wo dila ile ni i bɔzɔn natɔlu ma.»
[13] Ala wɔlinin kumala Janguba yɛ tɛɛminja, a ka bɔ a fɛlɔ woja ka taa.
[14] Wo kɛ, Janguba ka hangilitonɔkawa dɔ lalɔ woja, Ala na kumala a fɛ tɛɛminja. A ka lɛzɛnji ni tulu bɔn kawa wo kan k'a kɛ niilifen ne.
[15] Wo le k'a kɛ, Ala na kumala Janguba fɛ tɛɛminja, Janguba ka woja tɔɔla ko Bɛtɛli (wo kɔlɔ le ko «Ala ya bon»).
[16] Ai ka taama lawuli ka bɔ Bɛtɛli. Ai dɔni majaanyanin Efilata so la, Lasɛli ka bila tin ma. Aa tin do ka gbeleya kosɛvɛ.
[17] Tinkɔnɔdimin gbeleyanin a ma bubale, denmoila vɛɛ a yɛ: «I kà siyan, i vɛ denkɛ gbɛlɛ sɔlɔn.»
[18] Lasɛli ka to saya boloma, a ka a den tɔɔla ko Bɛn-Oni (wo kɔlɔ le ko «Gbalo lɔ den»). Kɛɛ kɔfɛ, Janguba ka den tɔɔla ko Bɛnjamin (wo kɔlɔ le ko «M̀ bolokini kɔlɔ den»).
[19] Lasɛli ka sa ten ne. Ai do ka a sudoon Efilata siya dafɛ (ai y'a fɔla tɛɛminja ma bi ko Bɛtilɛhɛmu).
[20] Janguba ka hangilitonɔkawa lalɔ Lasɛli kabulu kɔkan, hali bi a lɔnin je.
[21] Janguba ka bɔ je ka taa aa faanigbaalu lɔ Ɛdɛli kunmafɛlɛnni gbalan bolokini fannɔ siya le.
[22] Janguba ka to siinin duu wo lɔ, Lubɛn ka t'i la a fa ya jɔnmoso fɛ, min tɔɔ tɛɛ ko Biliha. Janguba do lɔnko ka bila wo ma. Janguba denkɛlu tɛɛ mɔɔ tan ni fila (12) le le.
[23] Leya ka Lubɛn ne sɔlɔn kunfɔlɔ le, min tɛɛ Janguba den kunfɔlɔ le, ka Simiyɔn tuun wo la, ka Levi tuun wo la, ka Juda tuun wo la, ka Isakali tuun wo la, ka Zebulun tuun wo la.
[24] Lasɛli denkɛlu le tɛɛ Jusufu ni Bɛnjamin le.
[25] Lasɛli ya jɔnmoso Biliha ka Dan ni Nafitali sɔlɔn.
[26] Leya ya jɔnmoso Zilipa ka Gadi ni Asɛli sɔlɔn. Janguba denkɛlu le tɛɛ ve le, a mosolu na minu sɔlɔnna a yɛ Suliya jamana sanfɛ fannɔ.
[27] Janguba ka se a fa Isiyaka fɛlɔ Mamele, min yi Kiliyati-Aliba so magbɛn nɔ (ai y'a fɔla tɛɛminja ma bi ko Hɛbulon), Ibulahima ni Isiyaka siinin tɛɛ so min na kɔlɔkɔlɔ le lonaya la.
[28] Isiyaka si danmajiya ka kɛ san kɛmɛ san bisein (180) ne le.
[29] Isiyaka ka sa ka taa a bemanu taaya lɔ, a wɔli kɔ sikunnɔjaan sɔlɔnna. A denkɛlu Esawu ni Janguba ka a sudoon.