[1] Mɔɔnivinnu ka wala damina waate min nɔ duukolo kɔkan, ai vɛ denmosolu sɔlɔnna,
[2] Ala ya dannifen dɔlu k'a ye ko mɔɔnivinnu denmosolu keinyayine. Ai tɛɛ vɛ kɛla min fɛ wolu lɔ, ai tɛɛ wolu le tala k'ai kɛ ai mosolu le.
[3] Wo kɛ, mɔ Tii Ala vɛɛ: «A bɛnnin tɛ ǹa niifɔɲɛ yi to mɔɔnivinnu lɔ kudein, kamasɔlɔn sabatɔ le ai le. Ai si danma jate min latɛɛnin, wo yi san kɛmɛ ni muan (120) ne le.»
[4] Wo lonnu lɔ, ani wo waate timin kɔ fana, mɔɔ makawanilu tɛɛ duukolo kɔkan, ai y'a fɔla minu ma ko Nɛfilimu. Ala ya dannifennu k'i la ngɛ mɔɔnivinnu denmosolu fɛ, wolu ka dennu sɔlɔn ai yɛ. Wolu le tɛɛ kɛ́ fali le fɔlɔbalu tɛma, minu mangutu yi fɔla.
[5] Mɔ Tii Ala k'a ye ko mɔɔnivinnu ya juuya vɛ wala duukolo kɔkan, ani ai josokun fanin tɛɛ miliya juu le la waate bɛ.
[6] Mɔ Tii Ala ka nimisa mɔɔnivinnu danko lɔ. A do niima ka kumun.
[7] A vɛɛ: «M̀ɛ mɔɔnivinnu dan, kɛɛ ǹ kɛtɔ ai halakila k'ai bɔ duukolo kɔkan. Mɔɔnivinnu o, kolofennu o, tuukɔlɔsoolu o, kɔnɔlu o, ani niimafen mɛsɛnnu, ǹ kɛtɔ wo bɛ le halakila, kamasɔlɔn m̀ɛ nimisa ai danko lɔ.»
[8] Kɛɛ Nuho ya ko diyayine tɛɛ mɔ Tii Ala yɛ.
[9] Nuho ya taliku le ne. Nuho tɛɛ telenmande le le. Mɔɔ dafanin ne tɛɛ a le le wo waate mɔɔlu tɛma. Ale le tɛɛ taamana Ala ya siya kan.
[10] Nuho ka denkɛ sawa sɔlɔn: Sɛmu, Hamu, ani Jafɛti.
[11] Wo k'a talan, duukolo tɛɛ vɛ tiɲa Ala ɲakɔlɔ. Benkanniko tɛɛ vɛ jɛzɛn duukolo fan bɛ lɔ.
[12] Ala ka duukolo lasaa k'a ye ko a vɛ tiɲa tɛtɛ, kamasɔlɔn mɔɔnivinnu tɛɛ kolɔtiɲa gbaanzan ne kɛla.
[13] Wo kɛ, Ala k'a fɔ Nuho yɛ, a vɛɛ: «M̀ɛ a latɛɛ k'a fɔ ko ka mɔɔnivinnu ya ko laban, kamasɔlɔn ai vɛ benkanniko lajɛzɛn duukolo fan bɛ lɔ. Wo le y'a kɛla, ǹ kɛtɔ ailu ni duukolo halakila kelen ne.
[14] Kulunba ladan i jɛlɛ yɛ kɔlɔma kologbɛlɛn ne, ai y'a fɔla min ma ko gɔfɛli. I ka kan ka a kɔnɔla lɔtɛɛtɛɛ k'a kɛ bonkɔnɔlalu le, ka ban ka mana fin sisa a kɔnɔla ni a kɔmala bɛ ma.
[15] I ka kan ka a ladan teme, wo le ne. A jaanya yi kɛ nɔngulu ɲa kɛmɛ sawa (300) le, k'a kɔnɔla kɛ nɔngulu ɲa biloolu (50) le, ani k'a lɔgbaan kɛ nɔngulu ɲa bisawa (30) le.
[16] I yi kulunba kunmabilin, a kunnama yi kɛ nɔngulu ɲa kelen ne, ka wo laminin kɛ fɔɲɛdonya le. I yi kulunba ladan k'a kɛ siinkan sawa le, ani ka a donda bila a fan kelen fɛ.
[17] Ǹe koni, ǹ kɛtɔ tufana lanala, k'a la duukolo kɔkan ka bɛn niimafen bɛ halakiko ma. Fen suu suu y'a nunakilila sangbolo kɔlɔ, wo bɛ le totɔ a lɔ.
[18] Kɛɛ ǹ kɛtɔ salatikan tala ǹe ni ile wotɛ. I ka kan ka don kulunba kɔnɔ, ile ni i denkɛlu, ani i moso ni i maamosolu.
[19] I yi niimafen suu bɛ fila fila ladon i fɛ kulunba kɔnɔ, a kɛman ni a mosoman, min y'a kɛ, ai yi to ai nii la i fɛ.
[20] Kɔnɔlu o, kolofennu o, tuukɔlɔsoolu o, ani niimafen mɛsɛnnu, a suu bɛ fila fila natɔ i fɛ, min y'a kɛ, ai yi to ai nii la.
[21] I ka kan ka dɔnnifen suu bɛ dɔ ta, k'a ladalo i fɛ kulunba kɔnɔ. Wo kɛtɔ balo le le ile ni wolu yɛ.»
[22] Nuho do ka ko bɛ kɛ iwo Ala na a jamalila teme.