[1] Ko wolu timinnin kɔ, Ala ka Ibulahima lɔsuma. A k'a kili, a vɛɛ: «Ibulahima!» Ibulahima vɛɛ: «Naam.»
[2] Ala vɛɛ: «I i diyanan den kelen Isiyaka ta, ka taa a le Moliya duu kɔnɔ. I y'a ɲɛnin salaka le je tini dɔ kɔkan, ǹ kɛtɔ min jiyala i la.»
[3] Ibulahima k'i wuli sɔɔmadanina ka wɔmɔ sili aa sofalini kɔ lɔ, ka aa bɔiden fila ta, ani a den Isiyaka. A wɔlinin lɔɔ tela ka bɛn salakabɔko wo ma, a ka dingila wo siya mina, Ala na dingila min ya ko fɔla a yɛ.
[4] A tele sawana lon, Ibulahima k'a kun lawuli ka dingila wo ye tɛɛ majaan nɔ.
[5] Wo kɛ, Ibulahima k'a fɔ aa bɔidennu yɛ, a vɛɛ: «Ǹe ni ǹ den taatɔ Ala batoya lɔ jannɔ ve le. Ài yi mɔ makɔnɔ sofalini dafɛ jan. Mɔ natɔ.»
[6] Ibulahima ka salaka lɔɔ sii a den Isiyaka kun. Ale gbu ka mulu ni taakulun dɔ mina a tɛɛ la. Ai ka to taamana i ɲɔɔ fɛ,
[7] Isiyaka k'a fɔ a fa yɛ, a vɛɛ: «Ǹ fa.» Ibulahima vɛɛ: «Naam, ǹ den.» Isiyaka vɛɛ: «Taakulun ni lɔɔ yi mɔ bolo, kɛɛ salaka saa do?»
[8] Ibulahima k'a javi, a vɛɛ: «Ǹ den, Ala gbu le kɛtɔ salaka saa ya ko ɲabɔla a jɛlɛ yɛ.» Ai mɔɔ fila ka to taala i ɲɔɔ fɛ.
[9] Ai se dingila wo lɔ, Ala na min ya ko fɔla Ibulahima yɛ, a ka salakagbalan lɔ je, ka lɔɔ lala a kɔkan, ka ban ka a den Isiyaka sili, ka a lala lɔɔ kɔkan.
[10] Wo kɛ, Ibulahima k'a bolo lɔsama ka mulu ta ko a a den kannatɛɛ.
[11] Kɛɛ mɔ Tii Ala ya mɛlɛka ka to sannɔ ka Ibulahima kili, a vɛɛ: «Ibulahima! Ibulahima!» Ibulahima vɛɛ: «Naam.»
[12] Mɛlɛka ka Ala kumakan lase, a vɛɛ a yɛ: «I k'i bolo tuu i den na dɛ! I kà foi kɛ a la. Ǹ k'a lɔn butu ko i yi siyanna ǹe Ala ɲa, kamasɔlɔn i m'i ban i den kelenpesa dila m̀ ma.»
[13] Ibulahima k'a kun lawuli ka saajii dɔ ye, min kelelu gbalinin tɛɛ gbɔfɔ wotɛ. Ibulahima ka taa saajii wo mina, ka a kannatɛɛ ka ban ka a ɲɛnin salaka le a den ɲɔɔ le.
[14] Ibulahima ka woja tɔɔla ko: «Mɔ Tii Ala yi ko ɲabɔle.» Wo le y'a kɛla, mɔɔlu y'a fɔla hali bi ko: «Mɔ Tii Ala ya tini kɔkan, kolu ɲa yi bɔla je.»
[15] Mɔ Tii Ala ya mɛlɛka ka to sannɔ ka Ibulahima kili a siɲa filana lɔ.
[16] A vɛɛ a yɛ: «Mɔ Tii Ala kumakan le ne, a vɛɛ: ‹I m'i ban i den kelenpesa dila m̀ ma. Wo le n'a kɛla, m̀ɛ ǹ kalin ǹe gbu tɔɔ la, ǹ ko,
[17] ǹ kɛtɔ balaka donna i lɔ, k'i bɔzɔnnu siyaya iwo sanma lolonilu ani kɔɔji kawunna kiɲɛ. I bɔzɔnnu sentɔ ai juulu la, ka aiya solu mina ai la.
[18] Dunuɲa siboloma bɛ kɛtɔ balaka sɔlɔnna i bɔzɔnnu fɛ, kamasɔlɔn i vɛ ǹ kumakan labato.› »
[19] Wo kɛ, Ibulahima k'i kɔsei aa bɔidennu fɛlɔ. Ai do ka taama lawuli ka taa i ɲɔɔ fɛ Bɛliseba so kɔnɔ, Ibulahima siinin tɛɛ tɛɛminja.
[20] Ko wolu timinnin kɔ, ai k'a fɔ Ibulahima yɛ, ai vɛɛ: «Milika fana vɛ denkɛlu sɔlɔn i dɔɔni Naholi yɛ.
[21] A denkɛ kunfɔlɔ tɔɔ yi ko Uzi, ka Buzi tuun wo la, ani ka Kemuwɛli tuun wo la (min ka kɛ Alamu fa le).
[22] Milika denkɛ naanina tɔɔ yi ko Kɛsɛdi, ka Hazo tuun wo la, ka Pilidasi tuun wo la, ka Jidilafe tuun wo la, ka ban ka Betuwɛli tuun wo la.»
[23] Betuwɛli denmoso le tɛɛ Lebeka le. Milika ka denkɛ sein wo le sɔlɔn Ibulahima dɔɔni Naholi yɛ.
[24] Naholi ya jɔnmoso, min tɔɔ tɛɛ ko Lehumu, wo fana ka denkɛ minu le sɔlɔn a yɛ: Teba, Gahamu, Tahasi, ani Maaka.