[1] Janguba siinin tɛɛ Kanaan duu lɔ, a fa siinin tɛɛ lonaya la tɛɛminja.
[2] Janguba bɔzɔnnu ya taliku le ne. Jusufu si danma senin san tan ni wolowulan (17) nɔ, a tɛɛ saa ni banilu kunmafɛlɛnna a kɔlɔnu fɛ. Ale ni a fa mosolu Biliha ni Zilipa ta denkɛlu tɛɛ i ɲɔɔ fɛ. Jusufu tɛɛ vɛ kɛla seikɔla ai fa fɛlɔ kotan, a tɛɛ wolu kɛko kɛwonnu lasena a ma.
[3] Jusufu ka diya Janguba yɛ ka timin a denkɛ tɔ bɛ la, kamasɔlɔn a na Jusufu sɔlɔnna aa kɔlɔya waate le lɔ. Hali Janguba ka pipɔ lɔɲɛɛɲɛɛnin dɔ kala Jusufu yɛ.
[4] Jusufu kɔlɔnu k'a ye ngɛ ko ale diyayine ai fa yɛ ka timin ai tɔ bɛ la, ai tɛɛ Jusufu lagbeyaɲɛla, fɔɔ ai tɛɛ tɛ kumala a fɛ butu kanundeya boloma.
[5] Lon dɔ, Jusufu ka siwo. A ka wo ɲafɔ ngɛ a kɔlɔnu yɛ, wo k'a dɔ la aiya gbeyaɲɛ kan kɔtunun.
[6] A k'a fɔ ai yɛ, a vɛɛ: «Ài y'ài tolomalɔ ǹa siwo lɔbɔkan na!
[7] Ǹ na aa mɔ bɛ yena alikama kalila sɛnɛ lɔ, mɔ v'a lasilila. Wo kɛ, ǹ ta silini k'i wuli k'i lɔ. Ài ta silinilu ka na ǹ ta laminin, ai v'i mabilinna a kɔlɔ.»
[8] A kɔlɔnu do vɛɛ a yɛ: «I miliya le i i sii mɔ kunna masaya la, kɛlɛ?» Jusufu ya siwolu ni a kumakannu ka kɛ sabu le, a dɔ ka la aa lagbeyaɲɛ kan a kɔlɔnu bolo.
[9] Wo timinnin kɔ, Jusufu ka siwo kɔtunun ka wo ɲafɔ a kɔlɔnu yɛ, a vɛɛ: «Ài y'ài tolomalɔ, m̀ɛ siwo kɔtunun. Ǹ na tele ni kalo ni loloni tan ni kelen (11) yena ǹa siwo lɔ, ai v'i mabilinna ǹ kɔlɔ.»
[10] A ka wo ɲafɔ ngɛ a fa ni a kɔlɔnu yɛ, a fa do ka a makuma, a vɛɛ: «Siwo suu mindɛ le ne? I miliya le ǹe ni i ba ni i kɔlɔnu natɔ mɔ bilinna i sen kɔlɔ, kɛlɛ?»
[11] Jusufu kɔlɔnu tɛɛ a ɲangbeyaɲɛla, kɛɛ a fa ka to a milila aa siwo wo kɔlɔ ma.
[12] Lon dɔ, k'a talan Jusufu kɔlɔnu tɛɛ vɛ taa Sɛkɛmu magbɛn nɔ ka bɛn ai fa ya saa ni banilu kunmafɛlɛnko ma,
[13] Janguba k'a fɔ Jusufu yɛ, a vɛɛ: «I kɔlɔnu vɛ taa kolofen kunmafɛlɛnya lɔ Sɛkɛmu. I wuli, ǹ'i i kelaya ai ma.» Jusufu vɛɛ: «Ale le ve le.»
[14] Janguba k'a fɔ a yɛ, a vɛɛ: «T'i ɲaa kaa i kɔlɔnu ma ni tana tɛ ailu ni kolofennu la, wo vɛ kɛla, i yi na wo fɔ ǹ yɛ.» Wo fɔ, Jusufu ka bɔ Hɛbulon fofa kɔnɔ ka taa se Sɛkɛmu so dafɛ.
[15] Kɛ́ dɔ ka Jusufu mataamantɔla ye gbɛkɛnɛ lɔ, k'a maɲininga, a vɛɛ: «I yi mindɛ ɲininna?»
[16] Jusufu vɛɛ: «Ǹ'i ǹ kɔlɔnu le ɲininna. I jon, ni i k'a lɔn ai yi kolofennu kunnasiila tɛɛminja, i yi woja jiya ǹ na.»
[17] Kɛ́ vɛɛ: «Ai vɛ bɔ jan. Ǹ na ai kan mɛnna ko ai taatɔ Dotan.» Wo kɛ, Jusufu ka taa a kɔlɔnu ɲininya lɔ, a ka taa ai talan Dotan.
[18] Kɛɛ jani a yi se ai ma, a ka to poon, ai ka a natɔla ye. Wo kɛ, ai ka kunbilinɲɔɔma damina telemanin ka bɛn a faako ma.
[19] Ai k'a fɔ i ɲɔɔ yɛ, ai vɛɛ: «Ài ɲa lɔ, siwokɛba le ve le nala mɔ ma!
[20] Ài ndaa, m'a faa ka a lafili diɲa lɔkolon dɔ lɔ. Wo vɛ kɛla, m'a fɔ ko soo fali le na a dɔnna. Ko min kɛtɔ aa siwolu kɔma, mɔ kɛtɔ wo yena.»
[21] Wo mɛn Lubɛn bolo, a k'i lɔja ka Jusufu lakisi k'a bɔ ai bolo, a vɛɛ: «Mɔ kà a faa dɛ!
[22] Mɔ kà a labɔnɔ a nii la. M'a lafili diɲa lɔkolon min kɔnɔ tuu kɔlɔ jan, kɛɛ ài bolo kà se a ma a faako lɔ.» Lubɛn ka wo fɔ, kamasɔlɔn a tɛɛ a fɛ a yi Jusufu bɔ ai bolo, ka a lasei ai fa ma.
[23] Jusufu se a kɔlɔnu fɛlɔ, ai k'a mina ka aa pipɔ lɔɲɛɛɲɛɛnin bɔ a kanna,
[24] ka ban k'a lafili diɲa lɔkolon nɔ, ji tɛɛ tɛ min nɔ.
[25] Ai k'i sii ngɛ dɔnnikɛko lɔ, ai k'ai kun lawuli ka jula dɔlu timintɔla ye. Sumayila bɔzɔn ne tɛɛ wolu le, minu tɛɛ bɔla Galadi ka taa Misilan. Wusulan ni tulu sumadiyanin ani kɔlɔmajɛn sumadiyaninnu tɛɛ aiya ɲɔɔmɛlu ya donilu lɔ.
[26] Wo kɛ, Juda k'a fɔ a badenmalu yɛ, a vɛɛ: «Ni mɔ ka mɔ dɔɔni faa ka wo ko lɔdoon, mɔ kɛtɔ tɔnɔ suu mindɛ sɔlɔnna wo la?
[27] Ài ndaa, m'a fele Sumayila bɔzɔn wolu ma. Ǹu jɛlɛkanu bolo kà se a ma a faako lɔ, kamasɔlɔn a yi mɔ dɔ le le, ǹu ni ale yi jeli kelen ne le.» A badenmalu do k'ai bolo sii aa kuma wo kɔlɔ.
[28] Madiyanka julalu timintɔla, Jusufu kɔlɔnu ka a lajɛlɛ ka bɔ diɲa lɔ, ka a fele Sumayila bɔzɔn wolu ma wɔligbɛ gbana muan (20) na. Wolu do ka taa a le Misilan.
[29] Lubɛn seikɔnin diɲa wo lɔ k'a ye ko Jusufu tɛɛ tɛ je butu, a ka a kannafaanilu lɔfalafala josomakasa boloma.
[30] A do ka taa a badennu fɛlɔ k'a fɔ ai yɛ, a vɛɛ: «Kavelen tɛ je butu! Ǹ'a kɛ di vɛ?»
[31] Wo kɛ, ai ka bakɔlɔnni dɔ faa, ka ban ka Jusufu ya pipɔ sun wo jeli lɔ.
[32] Ai do ka taa pipɔ lɔɲɛɛɲɛɛnin wo le ai fa fɛ k'a fɔ a yɛ, ai vɛɛ: «Mɔ na pipɔ min ne yena tuu kɔlɔ. I y'a mafɛlɛn ni i den ta le.»
[33] Janguba ɲanɔ ka to a ma, a do vɛɛ: «Ǹ den ya pipɔ le ne! Soo fali vɛ ǹ den dɔn! Sika t'a lɔ, Jusufu lɔ vɛ falafala!»
[34] Janguba ka a kannafaanilu lɔfalafala, ka a tɛsili kasabɔlɔ le josomakasa boloma. A ka to a den saankasila haan fɔɔ waate jaan.
[35] Janguba denkɛlu ni a denmosolu bɛ ka na a ma ko ai y'a masawali, kɛɛ a do ma diɲa a masawaliko ma. A vɛɛ ai yɛ: «Ǹ totɔle ǹ denkɛ saankasila haan fɔɔ ǹ'i taa a fɛlɔ kabulu kɔnɔ.» Jusufu fa ka to kasila ten ne a den ya ko lɔ.
[36] Wo yi kɛla waate min nɔ, Madiyankalu ka se Misilan ka Jusufu fele masakɛ kankɔlɔsii dɔ ma, min tɔɔ tɛɛ ko Potifali. Ale le tɛɛ Misilan masakɛ ya lakanali kuntiiba le.