[1] Wo fɔ Juda bolo, Jusufu ma se a jɛlɛ lɔminala butu aa bɔidennu ɲakɔlɔ. A do k'a kan labɔ, a vɛɛ: «Bɛ yi bɔ jan!» Wo le k'a kɛ, mɔɔ gbɛlɛ ma to je Jusufu jɛlɛ jiya waate lɔ a badennu la.
[2] A ka to kasila, a v'a kan labɔla, fɔɔ Misilankalu vɛ a kan mɛnna. Misilan masakɛ ya bonnamɔɔlu bɛ ka wo ko mangan mɛn.
[3] Jusufu k'a fɔ a badennu yɛ, a vɛɛ: «Jusufu le ǹ ne! Ǹ fa a nii la bene?» Kɛɛ ai ma se a javila, ka bɛn ai siyan kaija ma a ɲa.
[4] Wo kɛ, Jusufu vɛɛ: «Ài y'ài madon ǹ na.» Ai k'i madon a la ngɛ, Jusufu vɛɛ ai yɛ: «Ǹe le ài dɔɔni Jusufu le, ài ka min fele Misilan taabalu ma.
[5] Ài k'ài jɛlɛ josokasi. Ài do kà mɔnɛ ài jɛlɛ ma ka bɛn ǹ feleko ma, kamasɔlɔn Ala le na ǹ lanala ài ɲa jan ka bɛn nii lakanako ma.
[6] Kɔɔn fitina san fila le jamana kɔnɔ yi ne. A tɔ vɛ to san loolu, sɛnɛkɛbalu tɛnala buluwali kɛla niwotɛ sɛnɛfen kalila.
[7] Ala le na ǹ lanala ài ɲa jan, min y'a kɛ, ài bɔzɔnnu kana tunun duukolo kɔkan, ani ài niila yi kisi boloɲa makawanin ma.
[8] Wo lɔ saa, àilu ma ǹe lana jan, fɔ Ala. Ale Ala vɛ ǹ kɛ Misilan masakɛ ma iwo a fa, ka ǹ lasii kuntiiya la masabon kunna, ani ka Misilan jamanatiiya don m̀ bolo.
[9] «Ài yi seikɔ ǹ fa fɛlɔ telemanin k'a fɔ a yɛ, ài vɛɛ: ‹I denkɛ Jusufu kumakan le ne, a vɛɛ: «Ala vɛ Misilan jamanatiiya don m̀ bolo. Na ǹ fɛlɔ. I kà tamala don i nako la.
[10] I siitɔ Gosɛn duu le lɔ, min majaannin tɛ ǹ na. Ile ni i dennu ni i mamanilu yi na, ani iya saa ni bani ni nisilu, ani i sɔlɔnfennu bɛ.
[11] Ǹ kɛtɔ ile ni iya demayalu lasonna woja, kamasɔlɔn kɔɔn fitina kɛtɔ san loolu le kɛla bene. Wo le y'a kɛ, ile ni iya demayalu ni iya malalimɔɔlu bɛ tɛnala bolokolonyala.» ›
[12] Jusufu vɛɛ kɔtunun: «Àilu ni m̀ baden Bɛnjamin vɛ bɔ a kalama k'a fɔ ko ǹe gbugbu le yi kumala ài fɛ yi ne.
[13] Mɔɔlu yi m̀ magbiliyala teme Misilan, ani ài na ko suu suu yena, ài yi taa wolu bɛ ɲafɔ ǹ fa yɛ. Wo vɛ kɛla, ài yi na ǹ fa le jan telemanin.»
[14] Wo fɔ Jusufu bolo, a k'i fili a dɔɔni Bɛnjamin nɔ ka kasi damina. Bɛnjamin fana k'i fili a lɔ, a vɛ kasila.
[15] Wo kɛ, Jusufu ka a kɔlɔnu kelenkelenna bɛ sumu ai taman nɔ, a vɛ kasila. Wo timinnin, a kɔlɔnu ka kuma damina a fɛ.
[16] Jusufu badennu nako mangutu ka se ngɛ Misilan masakɛ ya bonna ma, wo ka diya ale ni a kankɔlɔsiilu bɛ yɛ.
[17] Masakɛ do k'a fɔ Jusufu yɛ, a vɛɛ: «Ǹ kumakan lase i badennu ma, i vɛɛ: ‹Ài àiya donilu sili àiya sofalinilu kɔ lɔ, ài yi seikɔ Kanaan duu lɔ.
[18] Ài y'ài fa ni àiya demayalu ta ka na ai le ǹ fɛlɔ. Duu min keinyanin ka timin a tɔ bɛ la Misilan jamana lɔ, ǹ kɛtɔ wo le dila ài ma. Ài do kɛtɔ duu tɔnɔmafennu dɔnna.›
[19] Ile Jusufu, ǹ'i lɔla min ne fɔla kɔtunun, i vɛɛ: ‹Ài yi taa wotolo dɔlu le ka bɔ Misilan jamana lɔ ka bɛn aiya dennilu ni ai mosolu ya ko ma. Ài yi taa ài fa bii, ài yi na a le.
[20] Ài kà hamin ài bolofennu ya ko le, kamasɔlɔn Misilan fen keinkein suu bɛ dɔ le kɛtɔ ài ta le.› »
[21] Janguba dennu k'a kɛ ten ne. Jusufu do ka wotololu di ai ma, iwo Misilan masakɛ na a jamalila teme, ani a ka ai siyafaanalu di ai ma.
[22] A ka faani kulalu di ai kelenkelenna bɛ ma. Kɛɛ a ka wɔligbɛ gbana kɛmɛ sawa (300) ni faani kula loolu di Bɛnjamin le ma.
[23] Jusufu ka fen minu lataa a fa ma k'a kɛ a sama le, wolu le ne: sofalinikɛ tan, minu ya donilu lafanin tɛɛ Misilan fen keinnu la, ani sofalinimoso tan, minu ya donilu lafanin tɛɛ sɛnɛfen kɛsɛ ni bulu ani siyafaana gbɛlɛlu la ka bɛn a fa ya nako ma.
[24] Jusufu do ka siya di a badennu ma. Ai taatɔla, a k'a fɔ ai yɛ, a vɛɛ: «Ài kà sɔsɔyali kɛ siya la dɛ!»
[25] Ai ka bɔ Misilan ten ne ka se ai fa Janguba fɛlɔ Kanaan duu lɔ.
[26] Ai k'a fɔ ai fa yɛ, ai vɛɛ: «Jusufu y'a nii la bene! Ale le yi Misilan jamanatiiya la yi ne!» Kuma wo ka Janguba kɔnɔlɔfili. A ma la a la feu.
[27] Kɛɛ ai ka Jusufu ya samakannu bɛ lase a ma ngɛ, ani a ka wotololu ye fana, Jusufu na minu lana a tako lɔ, wo le k'a kɛ butu, Janguba ka bila a jili lɔ.
[28] Janguba k'a fɔ, a vɛɛ: «Ǹ den Jusufu y'a nii la bene! Wo vɛ m̀ wasa. Ǹ'i taa ǹ ɲa la a kan, jani ǹ'i sa.»