[1] Makir denkɛ Galad bɔnsɔn ka gwa kuntigiw nana Musa ni Israɛl bɔnsɔn ka gwaw kuntigiw sɛgɛrɛ. Makir fa tun ye Manase ye. O kuntigiw bɔra Yusufu bɔnsɔn ka gwaw la.
[2] U ko: «Matigi y'a fɔ ne matigi ye ko, a ka jamana tilatila Israɛl bɔnsɔn cɛ ni kala ye ka kɛ u ciyɛn ye. Matigi y'a fɔ ne matigi ye fana ko a ka an balimakɛ Zelofisad ciyɛn di a denmusow ma.
[3] Ayiwa, ni u bɛ furu Israɛl bɔnsɔn siya dɔ wɛrɛ cɛw ma, o tuma la u ciyɛn na bɔ an bɛnbaw ciyɛn na. U donna siya min na, o na fara olu ciyɛn kan. O cogo la ciyɛn min dira an ma kala la, dɔ na bɔ o la.
[4] Ni Israɛl bɔnsɔn ka hɔrɔɲali san sera tuma min na, u donna siya min na, u ciyɛn na fara o siya ciyɛn kan. O cogo la u ciyɛn na bɔ an bɛnbaw siya ciyɛn na.»
[5] O tuma la Musa ye ci fɔ Israɛl bɔnsɔn ye ka kɛɲɛ ni Matigi ka kuma ye ko: «Tiɲɛ bɛ Yusufu bɔnsɔn siya fɛ.
[6] Matigi bɛ min fɔ Zelofisad denmusow ko la, o filɛ nin ye. Cɛ minw ka di u ye, u ka furu olu ma, nka u ka furu u fa siya ka gwa dama la.
[7] O cogo la Israɛl bɔnsɔn ciyɛn si tɛna yɛlɛma siya niɲɔgɔn cɛ, nka Israɛl bɔnsɔn bɛɛ na to ni u bɛnbaw siyaw ciyɛn ye.
[8] Ciyɛn bɛ denmuso o denmuso fɛ Israɛl bɔnsɔn ka siyaw la, o ka furu a bɛnbaw siya ka gwamɔgɔ dɔ ma, walisa Israɛl bɔnsɔn mɔgɔw bɛɛ kelen-kelen ka to u fa ciyɛn la.
[9] O cogo la ciyɛn si tɛna bɔ siya dɔ la ka kɛ siya dɔ wɛrɛ ta ye, nka Israɛl bɔnsɔn siyaw bɛɛ na to u yɛrɛw ciyɛn kun na.»
[10] Matigi ye min fɔ Musa ye, Zelofisad denmusow ye o kɛ.
[11] Makila ni Tirza ni Hogila ni Milika ani Noa, Zelofisad denmusow kɔni, olu furula u fa balimakɛw denkɛw ma.
[12] Minw bɔra Yusufu denkɛ Manase bɔnsɔn ka gwaw la, u furula olu ma. U ciyɛn tora u fa siya ka gwaw la.
[13] Matigi ye ciw ni sariya minw fɔ Israɛl bɔnsɔn ye Musa da la ka u to Moab jɛkɛnɛw la Jurdɛn ba da la Jeriko kuntilenna la, olu don.