[1] Matigi kumana Musa fɛ ko:
[2] «I ka warijɛ buru fyɛta fila dila, u ka dila ni warijɛ fagalen ye. I ka u fyɛ jamalajɛ waati ni bugu wuli tuma la.
[3] Ni o buruw bɛ fyɛ tuma min na, jama bɛɛ ka lajɛ i kɔrɔɲɔgɔn kunbɛn finiso donda la.
[4] Ni buru kelenpe bɛ fyɛ, kuntigi minw bɛ Israɛl bɔnsɔn waa caman kun na, olu ka lajɛ i kɔrɔ.
[5] Ni u ye burukan bonya tuma min na, so kɔrɔn fɛ bugufyɛ la mɔgɔw ka wuli ka taa.
[6] Ni u ye burukan bonya a siɲɛ filanan la tuma min na, so worodugu yanfan fɛ bugufyɛ la mɔgɔw ka wuli ka taa, u ka burukan bonya bugu wuli tuma la.
[7] U ka buruw fyɛ jama lajɛ fana kama, nka u kana a kan bonya.
[8] Sarakalasebaaw, Aron bɔnsɔn cɛw ka o buruw fyɛ. O na kɛ sariya wulibali ye aw bɔnsɔn nataw bɛɛ kan.
[9] Ka aw to aw ka jamana la, ni aw juguw bira aw kan, ni aw wulila ka u kɛlɛ tuma min na, aw ka buruw fyɛ ka u kan bonya. Matigi aw ka Ala na a hakili to aw la, ka aw tila ka bɔ aw juguw bolo.
[10] Aw ɲagali donw ni aw ka seli donw aw ka kalo tile fɔlɔw la, aw ka buruw fyɛ aw ka saraka jenitaw ni aw ka nisɔndiya sarakaw kun na, u na kɛ hakilijigin fɛn ye aw ko la aw ka Ala ɲɛ kɔrɔ. Ne ye Matigi aw ka Ala de ye.»
[11] Ayiwa, san filanan kalo filanan tile mugannan don, kabasen kɔrɔtara ka bɔ seereya finiso kun na.
[12] Israɛl bɔnsɔn wulila ka bɔ Sinayi kungokolon kɔnɔ ka kɛɲɛ ni u tugutugu cogo ye ɲɔgɔn na. Kabasen jiginna ka jɔ Paran kungokolon kɔnɔ.
[13] U ye u wuli ko fɔlɔ kɛ i ko Matigi y'a fɔ Musa ye cogo min na.
[14] Juda bɔnsɔn ka bugufyɛ ka darapo ni a ka kɛlɛbolow fɔlɔ wulila. Juda bɔnsɔn ka kɛlɛbolo kuntigi tun ye Aminadab denkɛ Nakisɔn ye.
[15] Zuar denkɛ Netaneɛl tun ye Isakar bɔnsɔn siya ka kɛlɛbolo kuntigi ye.
[16] Helɔn denkɛ Eliab tun ye Zabulɔn bɔnsɔn siya ka kɛlɛbolo kuntigi ye.
[17] Finiso warakara. Gersɔn bɔnsɔn cɛw ni Mɛrari bɔnsɔn cɛw ye so minanw doni ka taa.
[18] Rubɛn ka bugufyɛ ka darapo ni a ka kɛlɛbolow wulila. Sedeur denkɛ Elizur tun ye Rubɛn ka kɛlɛbolo kuntigi ye.
[19] Zurisadai denkɛ Selumiɛl tun ye Simeɔn bɔnsɔn siya ka kɛlɛ bolo ye.
[20] Duɛl denkɛ Eliasaf tun ye Gad bɔnsɔn siya ka kɛlɛbolo kuntigi ye.
[21] O kɔ, Kɛhat bɔnsɔn cɛw ye yɔrɔ senuma minanw doni ka taa. U ɲɛfɛ mɔgɔw ye finiso jɔ sani u ka se yen.
[22] O kɔ, Efrayim bɔnsɔn ka bugufyɛ ka darapo ni a ka kɛlɛbolow wulila. Amihud denkɛ Elisama tun ye Efrayim ka kɛlɛbolo kuntigi ye.
[23] Pedazur denkɛ Gamaliɛl tun ye Manase bɔnsɔn siya ka kɛlɛbolo kuntigi ye.
[24] Gideoni denkɛ Abidan tun ye Benjamɛn bɔnsɔn siya ka kɛlɛbolo kuntigi ye.
[25] O kɔ, Dan bɔnsɔn ka bugufyɛ ka darapo ni a ka kɛlɛbolow wulila. Olu wulila buguw bɛɛ kɔ. Amisadai denkɛ Ahiezɛr tun ye Dan ka kɛlɛbolo kuntigi ye.
[26] Okran denkɛ Pagiɛl tun ye Asɛr bɔnsɔn siya ka kɛlɛbolo kuntigi ye.
[27] Enan denkɛ Ahira tun ye Nefitali bɔnsɔn siya ka kɛlɛbolo kuntigi ye.
[28] Israɛl bɔnsɔn wulila ka tuguɲɔgɔn nɔ fɛ ka taa ka kɛɲɛ ni u ka kɛlɛbolow ye. U taara o cogo la.
[29] Musa y'a fɔ a birankɛ Madian Ruɛl denkɛ Hobab ye ko: «Matigi y'a fɔ ko a na yɔrɔ min di an ma, an taatɔ filɛ yen. I ka taa an fɛ, an na ko ɲuman kɛ i ye, sabu Matigi ye ko ɲuman fɔ Israɛl ko la.»
[30] Hobab y'a jaabi ko: «Ne tɛna taa aw fɛ, nka ne bɛ kɔsegin ka taa ne ka jamana ni ne faso la.»
[31] Musa y'a fɔ a ye ko: «Ne b'i deli, i kana fara an na, katuguni i bɛ an jigin yɔrɔw dɔn kungokolon kɔnɔ. I na kɛ an dɛmɛbaa ye ka an ɲɛ minɛ.
[32] Ni i taara an fɛ, Matigi bɛ ko ɲuman min kɛ an ye, an fana na o ɲɔgɔn kɛ i ye.»
[33] U wulila ka bɔ Matigi ka kulu kɔrɔ ka tile saba taama kɛ. Matigi ka layidu wagande taara u ɲɛ ka tile saba taama kɛ ka jigin yɔrɔ ɲini u ye.
[34] Matigi ka kabasen tun bɛ u kun na tile fɛ u ka bugu wuli tuma la.
[35] Ni layidu wagande tun bɛ wuli ka taa ɲɛ tuma min na, Musa tun b'a fɔ ko: «Matigi, i ka wuli. I juguw ka jɛnsɛn, i koniyabaaw ka boli i ɲɛ.»
[36] Ni layidu wagande tun bɛ jigin tuma min na, a tun b'a fɔ ko: «Matigi, i ka kɔsegin Israɛl mɔgɔ waa tan-tan sigiyɔrɔma waa caman cɛma.»