[1] Matigi kumana Musa fɛ ko:
[2] «I k'a fɔ Israɛl bɔnsɔn ye ko kunatɔw bɛɛ ni damajalantɔw ani minw nɔgɔra su kosɔn, u ka olu labɔ bugufyɛ la.
[3] Aw ka u labɔ bugufyɛ la ka u bila bugufyɛ kɔ fɛ, cɛ fara muso kan, walisa u kana bugufyɛ nɔgɔ, k'a masɔrɔ ne sigilen bɛ aw cɛma.»
[4] Israɛl bɔnsɔn y'a kɛ ten, u ye olu labɔ bugufyɛ la. Israɛl bɔnsɔn y'a kɛ i ko Matigi y'a fɔ Musa ye cogo min na.
[5] Matigi kumana Musa fɛ ko:
[6] «I ka kuma Israɛl bɔnsɔn fɛ ko, ni cɛ dɔ wala muso dɔ ye a mɔgɔɲɔgɔn hakɛ ta ka Matigi kan bila, ni a nɔ don,
[7] o tigi ka jɔ a ka jurumu kɛlen na. A ye min ta, a ka o sara ka a tila duurunan fara a kan. A ye mɔgɔ min hakɛ ta, a ka a di o tigi ma.
[8] Ni fɛntigi sara k'a sɔrɔ balima si tɛ a fɛ min bɛ se ka a ciyɛn ta, o fɛn na kɛ Matigi ta ye. A ka di sarakalasebaa ma, o ni jurumu kafari sagajigi min bɛ a ka jurumu kafari.
[9] Israɛl bɔnsɔn bɛ fɛn senuma minw bɛɛ don sarakalasebaa bolo, saraka kɔrɔtata ka bɔ olu la ka kɛ sarakalasebaa yɛrɛ ta ye.
[10] Ni mɔgɔ ye fɛn o fɛn saniya, o fana na kɛ sarakalasebaa ta ye. Mɔgɔ o mɔgɔ mana fɛn min di a ma, o ka kɛ a ta ye.»
[11] Matigi kumana Musa fɛ ko
[12] a ka kuma Israɛl bɔnsɔn fɛ k'a fɔ u ye ko: «Ni cɛ dɔ muso farala a la ka kanntanya ko kɛ a ta fan fɛ,
[13] ni cɛ wɛrɛ dara a fɛ k'a sɔrɔ a cɛ ma o dɔn, a dogora a la, ni muso y'i nɔgɔ ni seere tɛ yen, ni a ma minɛ o kɛli la,
[14] ayiwa, ni keleya donna a cɛ la, ni a bɛ sigasiga a muso ko la k'a sɔrɔ a muso y'i nɔgɔ, walima ni keleya donna a cɛ la, ni a bɛ sigasiga a muso ko la k'a sɔrɔ a ma i nɔgɔ,
[15] o tuma la o cɛ ka taa sarakalasebaa sɛgɛrɛ ni a muso ye. A ka taa ni a muso ka saraka fɛn ye. O ka kɛɲɔ mugu kilo saba ye. A kana tulu kɛ a kan, a kana suma diyalan mana kɛ a kan, sabu keleya saraka mugu don. Hakilijigin saraka mugu don, ka hakili jigin tilenbaliya ko la.
[16] «Sarakalasebaa ka na ni o muso ye ka a jɔ Matigi ɲɛ kɔrɔ.
[17] Sarakalasebaa ka ji senuma dɔ ta bɔgɔ daga kɔnɔ. A ka buguri dɔ cɛ ka bɔ finiso dugumala la k'a kɛ o ji la.
[18] Sarakalasebaa ka o muso jɔ Matigi ɲɛ kɔrɔ ka muso kunsigi foni ka hakilijigin saraka mugu don a bolo, keleya saraka kɔni. Ji kunaman min bɛ danga bi mɔgɔ kan, sarakalasebaa ka o dɔ ta a bolo.
[19] «Sarakalasebaa ka o muso wajibiya ko a ka i kali. A k'a fɔ muso ye ko: ‹Ni cɛ si ma da i fɛ, ni i ma fara i cɛ la k'i nɔgɔ k'i to i cɛ fanga kɔrɔ, o tuma la nin dangalikɛ ji kunaman tɛna ko jugu si kɛ i la.
[20] Nka ni i farala i cɛ la ka taa i nɔgɔ ka i to i cɛ fanga kɔrɔ, ni cɛ wɛrɛ dara i fɛ ni i yɛrɛ cɛ tɛ,›
[21] o tuma la sarakalasebaa ka o muso wajibiya ko a ka i kali ni dangali ye. A k'a fɔ muso ye ko: ‹Matigi ka i kɛ dangalen ani taamashyɛn jugu ye i ka mɔgɔw cɛma ni Matigi ye i wolonugu ja ka i kɔnɔ funun tuma min na.
[22] Ni i sɔn don, nin dangalikɛ ji ka don i kɔnɔ ka i kɔnɔ funun ka i wolonugu ja.› O muso k'a fɔ ko: ‹Amiina.›
[23] «Sarakalasebaa ka o dangali kuma sɛbɛn sɛbɛnfura dɔ kan ka a ko ni dangalikɛ ji kunaman ye.
[24] A ka o dangalikɛ ji di muso ma, o k'a min. O ji na don a kɔnɔ ka kunaya.
[25] Sarakalasebaa ka keleya saraka mugu minɛ ka bɔ muso bolo ka o saraka finifana Matigi ɲɛ kɔrɔ k'a lase saraka bɔlan kan.
[26] Sarakalasebaa ka a boloɲɛ kelen ta o saraka mugu la k'a jeni saraka bɔlan kan. O ye hakilijigin fɛn ye o saraka la. O kɛlen kɔ, a ka o muso lamin o ji la.
[27] O ji minnen kɔ, ni a y'a sɔrɔ o muso y'i nɔgɔ ka kanntanya kɛ a cɛ ta fan fɛ, o dangalikɛ ji na don a kɔnɔ ka kunaya. A kɔnɔ na funun k'a wolonugu ja. O muso na kɛ dangalen ye a ka mɔgɔw cɛma.
[28] Nka ni o muso m'a yɛrɛ nɔgɔ, ni a jɛlen don, a na jate jalakibali ye, a na kɔnɔ ta.
[29] «O ye sariya ye keleya ko la muso ta fan fɛ min farala a cɛ la k'i nɔgɔ k'a to a cɛ fanga kɔrɔ,
[30] wala cɛ ta fan fɛ ni keleya donna a la ni a bɛ sigasiga a muso ko la. O tuma la sarakalasebaa ka o muso jɔ Matigi ɲɛ kɔrɔ ka o sariya ko fɔlen bɛɛ kɛ a la.
[31] Tilenbaliya tɛ jate cɛ kun, nka ni muso jalaki don, a ka tilenbaliya na kɛ a yɛrɛ kun.»