[1] Aron ni Musa denw filɛ ninw ye, Matigi kumana Musa fɛ Sinayi kulu kan tuma min na.
[2] Aron denkɛw tɔgɔw filɛ ninw ye: A denkɛ fɔlɔ Nadab, o kɔ, Abihu ni Eleazar ani Itamar.
[3] Aron denkɛw tɔgɔw filɛ o ye. Olu munna ni tulu ye ka kɛ sarakalasebaaw ye, ka sigi sarakalasebaaya baara kama.
[4] Nadab ni Abihu sara Matigi ɲɛ kɔrɔ k'u to Sinayi kungokolon kɔnɔ, sabu u nana ni tasuma sure ye Matigi ɲɛ kɔrɔ. Denkɛ si tun tɛ u fɛ. Eleazar ni Itamar ye sarakalasebaaya baara kɛ u fa Aronɲɛ kɔrɔ.
[5] Matigi kumana Musa fɛ ko:
[6] «I ka na ni Levi siya ye ka u jɔ sarakalasebaa Aronɲɛ kɔrɔ, walisa u ka baara kɛ a ye.
[7] Fɛn minw kalifara Aron ni jama bɛɛ ma, ɲɔgɔn kunbɛn finisoɲɛ fɛ, u ka olu beɛ kɔlɔsi ka o finiso baara kɛ.
[8] Ɲɔgɔn kunbɛn finiso minanw bɛɛ ani fɛn o fɛn kalifara Israɛl bɔnsɔn ma, u ka olu bɛɛ kɔlɔsi ka finiso baara kɛ.
[9] I ka Levitew di Aron ni a denkɛw ma, u dira a ma ka bɔ Israɛl bɔnsɔn cɛma.
[10] I ka Aron ni a denkɛw sigi, u ka sarakalasebaaya baara kɛ. Ni dunan gɛrɛla a la, o ka faga.»
[11] Matigi kumana Musa fɛ ko:
[12] «A filɛ, ne ye Levitew ta ka bɔ Israɛl bɔnsɔn cɛma, Israɛl bɔnsɔn den fɔlɔw bɛɛ nɔ na ka kɛ ne taw ye.
[13] K'a masɔrɔ den fɔlɔw bɛɛ ye ne ta ye. Ne ye Misira jamana la den fɔlɔw bɛɛ faga don min na, ne ye Israɛl den fɔlɔw bɛɛ saniya ne yɛrɛ ye o don na, bagan fara mɔgɔ kan. U na kɛ ne ta ye. Ne ye Matigi de ye.»
[14] Matigi kumana Musa fɛ Sinayi kungokolon kɔnɔ ko:
[15] «I ka Levi bɔnsɔn dan ka kɛɲɛ ni u bɛnbaw bɔnsɔnw ka gwaw ye. I ka cɛw bɛɛ kelen-kelen dan k'a daminɛ kalo kelen mɔgɔw la fo ka taa se u ɲɛ mɔgɔw ma.»
[16] Musa ye u dan ka kɛɲɛ ni Matigi ka ci fɔlen ye, i ko a fɔra a ye cogo min na.
[17] Levi denkɛw filɛ ninw ye ka kɛɲɛ ni u tɔgɔw ye: Gersɔn ni Kɛhat ani Mɛrari.
[18] Gersɔn denkɛw tɔgɔw filɛ ninw ye ka kɛɲɛ ni u ka gwaw ye: Libini ni Simɛi.
[19] Kɛhat denkɛw filɛ ninw ye ka kɛɲɛ ni u ka gwaw ye: Amram ni Jizehar ni Heborɔn ani Uziɛl.
[20] Mɛrari denkɛw filɛ ninw ye ka kɛɲɛ ni u ka gwaw ye: Makili ni Musi. Olu ye Levi ka gwaw ye ka kɛɲɛ ni u bɛnbaw bɔnsɔnw ye.
[21] Libini bɔnsɔn ka gwa ni Simɛi bɔnsɔn ka gwa bɔra Gersɔn la, olu tun ye Gersɔn bɔnsɔn ka gwaw ye.
[22] Mɔgɔ minw danna, cɛw bɛɛ kelen-kelen k'a daminɛ kalo kelen mɔgɔw la fo ka taa se u ɲɛ mɔgɔw ma, olu kɛra cɛ waa wolonwula ani cɛ kɛmɛ duuru ye.
[23] Gersɔn ka gwaw ka u ka buguw turu finiso kɔ fɛ tilebi yanfan fɛ.
[24] Gersɔn bɔnsɔn kuntigi tun ye Laɛl denkɛ Eliasaf ye.
[25] Ɲɔgɔn kunbɛn finiso baara min kalifara Gersɔn bɔnsɔn ma, o filɛ nin ye, so ani finiso kunna birilanw, niɲɔgɔn kunbɛn finiso donda datugu fini,
[26] ani dukɛnɛ sinsan finiw ni dukɛnɛ donda datugu fini minw tun bɛ finiso ni saraka bɔlan lamini, ani a baarakɛ jurukisɛw.
[27] Amram bɔnsɔn ka gwa ni Jizehar bɔnsɔn ka gwa ni Heborɔn bɔnsɔn ka gwa ani Uziɛl bɔnsɔn ka gwa bɔra Kɛhat la, olu tun ye Kɛhat bɔnsɔn ka gwaw ye.
[28] Cɛ minw danna k'a daminɛ kalo kelen mɔgɔw la fo ka taa se u ɲɛ mɔgɔw ma, olu tun ye cɛ waa segin ani cɛ kɛmɛ wɔɔrɔ ye. Yɔrɔ senuma baara kalifara olu ma.
[29] Kɛhat bɔnsɔn ka gwaw ka u ka buguw turu finiso worodugu yanfan fɛ.
[30] Kɛhat bɔnsɔn ka gwaw kuntigi tun ye Uziɛl denkɛ Elizafan ye.
[31] Fɛn minw kalifara u ma, olu tun ye seereya wagande ni tabali ni fitinɛ ni saraka bɔlanw ni yɔrɔ senuma baarakɛ minanw, ani so cɛtigɛ fini ni a fɛnw bɛɛ ye.
[32] Sarakalasebaa Aron denkɛ Eleazar tun ye Levitew kuntigiw ka kuntigi ye. Yɔrɔ senuma baara kalifara minw ma, ale sigira olu bɛɛ kun na.
[33] Makili bɔnsɔn ka gwa ni Musi bɔnsɔn ka gwa bɔra Mɛrari la, olu tun ye Mɛrari bɔnsɔn ka gwaw ye.
[34] Mɔgɔ minw danna, cɛw bɛɛ kelen-kelen k'a daminɛ kalo kelen mɔgɔw la fo ka taa se u ɲɛ mɔgɔw ma, olu kɛra cɛ waa wɔɔrɔ ani cɛ kɛmɛ fila ye.
[35] Mɛrari bɔnsɔn ka gwaw kuntigi tun ye ye Abihail denkɛ Zuriɛl ye. Olu ka u ka buguw turu finiso saheli yanfan fɛ.
[36] Fɛn minw kalifara Mɛrari bɔnsɔn ma, olu tun ye finiso jiriw ni a cɛtigɛ jiriw ni a samasenw ni u jusigilanw ni a minanw bɛɛ ani u fɛnw bɛɛ ye,
[37] ani dukɛnɛ lamini sinsan samasenw ni u jusigilanw ni finidulon bɔlɔw ani u jurukisɛw.
[38] Musa ni Aron ni Aron denkɛw ka u ka buguw turu finiso kɔrɔn yanfan fɛ, ɲɔgɔn kunbɛn finisoɲɛ fɛ, tilebɔ fan fɛ. U ka yɔrɔ senuma kɔlɔsi Israɛl bɔnsɔn ye, a kalifara u ma. Ni dunan min gɛrɛla a la, o ka faga.
[39] Musa ni Aron ye Levite minw dan ka kɛɲɛ ni u ka gwaw ye, k'a daminɛ kalo kelen mɔgɔw la fo ka taa se u ɲɛ mɔgɔw ma, i ko Matigi y'a fɔ u ye cogo min na, olu bɛɛ lajɛlen kɛra cɛ waa mugan ni fila ye.
[40] Matigi y'a fɔ Musa ye ko: «I ka Israɛl bɔnsɔn denkɛ fɔlɔw bɛɛ dan, k'a daminɛ kalo kelen mɔgɔw la fo ka taa se u ɲɛ mɔgɔw ma, i ka u dan ka kɛɲɛ ni u tɔgɔw ye.
[41] I ka Levitew sigi ka kɛ ne ta ye Israɛl bɔnsɔn den fɔlɔw bɛɛ nɔ na, ka Levitew ka baganw bila Israɛl bɔnsɔn ka baganw den fɔlɔw nɔ na. Ne ye Matigi de ye.»
[42] Musa ye Israɛl bɔnsɔn denkɛ fɔlɔw bɛɛ dan ka kɛɲɛ ni Matigi ka ci fɔlen ye a ye.
[43] Denkɛ fɔlɔ dannenw bɛɛ lajɛlen, ka kɛɲɛ ni u tɔgɔw ye, k'a daminɛ kalo kelen mɔgɔw la fo ka taa se u ɲɛ mɔgɔw ma, olu kɛra cɛ waa mugan ni fila ni kɛmɛ fila ani cɛ biwolonwula ni saba ye.
[44] Matigi kumana Musa fɛ ko:
[45] «I ka Levitew bila Israɛl bɔnsɔn denkɛ fɔlɔw bɛɛ nɔ na, ka Levitew ka baganw bila u ka baganw nɔ na. Levitew na kɛ ne ta ye. Ne ye Matigi de ye.
[46] Israɛl bɔnsɔn denkɛ fɔlɔw la mɔgɔ kɛmɛ fila ni biwolonwula ni saba minw cayara ka tɛmɛn Levitew hakɛ kan, olu ka kunmabɔ.
[47] I ka wari sikle duuru minɛ u bɛɛ kelen-kelen fɛ. I ka o minɛ ka kɛɲɛ ni yɔrɔ senuma ka wari sikle ye. Sikle kelen ye gera mugan ye.
[48] Hakɛ minw tora Levitew dama kɔ, i ka olu kunmabɔ wari di Aron ni a denkɛw ma.»
[49] Mɔgɔ minw kunmabɔra Levitew fɛ, hakɛ min tɛmɛnna olu kan, Musa ye o kunmabɔ wari minɛ.
[50] A ye o wari minɛ Israɛl bɔnsɔn denkɛ fɔlɔw fɛ, wari sikle waa kelen ni kɛmɛ saba ni biwɔɔrɔ ani sikle duuru, ka kɛɲɛ ni yɔrɔ senuma ka wari sikle ye.
[51] Musa ye o kunmabɔ wari di Aron ni a denkɛw ma, ka kɛɲɛ ni Matigi ka ci fɔlen ye, i ko Matigi y'a fɔ Musa ye cogo min na.