[1] Matigi kumana Musa fɛ k'a to Moab jɛkɛnɛw la Jurdɛn ba da la Jeriko kuntilenna la, a ko:
[2] «I k'a fɔ Israɛl bɔnsɔn ye ko u ka dugu dɔw bɔ u ciyɛn sɔrɔlen na ka u di Levitew ma, olu ka sigi u kɔnɔ. O duguw lamini dugukolo dɔw fana ka di Levitew ma.
[3] O duguw na kɛ u sigi yɔrɔw ye, u lamini dugukolow na kɛ u ka bagan kunbaw ni u bolo fɛnw ni u ka bagan tɔw bɛɛ mara yɔrɔ ye.
[4] Aw na dugu lamini dugukolo min di Levitew ma, o ka kɛ mɛtɛrɛ kɛmɛ duuru ye ka bɔ dugu kogo la ka taa kɛnɛma ka dugu bɛɛ lamini.
[5] Aw ka yɔrɔ minw suma dugu kɔ kan, olu filɛ nin ye: dugu kɔrɔn yanfan selekew ka kɛ mɛtɛrɛ waa kelen ye. Worodugu yanfan selekew ka kɛ mɛtɛrɛ waa kelen ye. Dugu tilebi yanfan selekew ka kɛ mɛtɛrɛ waa kelen ye. Dugu saheli yanfan selekew ka kɛ mɛtɛrɛ waa kelen ye, ka dugu to cɛmancɛ la. O na kɛ u ka duguw lamini dugukolow ye.
[6] «Aw ka dugu minw di Levitew ma, olu ka kɛ bolibaa kalifadon dugu wɔɔrɔ ye, mɔgɔ fagala bɛ se ka boli ka taa yɔrɔ minw na, ani dugu binaani ni fila wɛrɛw.
[7] Aw na dugu minw di Levitew ma, olu bɛɛ lajɛlen ka kɛ dugu binaani ni segin ye, ani u lamini dugukolow.
[8] Aw na dugu minw di ka bɔ Israɛl bɔnsɔn ciyɛn na, o ka kɛ nin cogo la, siya minw ka duguw ka ca, aw ka dugu caman minɛ olu fɛ. Minw ka duguw man ca, aw ka dugu dɔɔnin minɛ olu fɛ. U bɛɛ kelen-kelen ka dugu dɔw di Levitew ma ka kɛɲɛ ni u ciyɛn sɔrɔlen ye.»
[9] Matigi kumana Musa fɛ ko
[10] a k'a fɔ Israɛl bɔnsɔn ye ko: «Ni aw ye Jurdɛn ba tigɛ ka don Kanan jamana la tuma min na,
[11] aw ka dugu dɔw bila ka kɛ bolibaa kalifadon duguw ye, walisa mɔgɔ min ye mɔgɔ faga ni a m'a dabɔ a kama, o ka boli ka taa yen.
[12] O duguw na kɛ dogo yɔrɔw ye k'a tanga joli hakɛbɔbaa ma, walisa mɔgɔ fagala kana na sa sani a ka kiri ka tigɛ jamaɲɛ kɔrɔ.
[13] Aw na dugu minw di, olu la wɔɔrɔ na kɛ bolibaa kalifadon duguw ye.
[14] Aw ka dugu saba di Jurdɛn ba kɔ fɛ, ka dugu saba di Kanan jamana kɔnɔ, olu ka kɛ bolibaa kalifadon duguw ye.
[15] O dugu wɔɔrɔ na kɛ Israɛl bɔnsɔn ni dunanw ani siginfɛw dogo yɔrɔw ye, walisa mɔgɔ o mɔgɔ mana mɔgɔ faga k'a sɔrɔ a m'a dabɔ a kama, o ka boli ka taa yen.
[16] «Ni mɔgɔ dɔ ye a mɔgɔɲɔgɔn gosi ni nɛgɛma fɛn ye, ni o tigi sara, o gosibaa ye mɔgɔ fagala ye. O mɔgɔ fagala ka faga.
[17] Ni a y'a gosi ni kabakurun ye min bɛ se ka mɔgɔ faga, ni o tigi sara, o gosibaa ye mɔgɔ fagala ye. O mɔgɔ fagala ka faga.
[18] Jirima fɛn min bɛ se ka mɔgɔ faga, ni a y'a gosi ni o ye, ni o tigi sara, o gosibaa ye mɔgɔ fagala ye. O mɔgɔ fagala ka faga.
[19] Ni joli hakɛ bɔbaa y'a ye tuma min na, a k'a faga.
[20] Ni cɛ dɔ ye a mɔgɔɲɔgɔnɲɔni ni koniya miirili ye, wala a y'i merun k'a makɔnɔ k'a bon ni fɛn dɔ ye, ni o tigi sara,
[21] wala ni a y'a gosi n'a bolo ye ni juguya ye, ni o tigi sara, o gosibaa ka faga, mɔgɔ fagala don. Ni joli hakɛbɔbaa y'a ye tuma min na, a k'a faga.
[22] «Nka ni mɔgɔ dɔ girintɔ ye a mɔgɔɲɔgɔnɲɔni ni juguya miirili tɛ, wala ni a bolo fɛn dɔ y'a sɔrɔ k'a sɔrɔ a ma a dabɔ a kama,
[23] wala ni a ye kabakurun bi a kan min bɛ se ka mɔgɔ faga, k'a sɔrɔ a m'a ye, a m'a koniya, a m'a tugu k'a kɛ, ni o tigi sara,
[24] o tuma la jama ka kiri tigɛ mɔgɔ fagala ni joli hakɛbɔbaa cɛ ka kɛɲɛ ni nin sariyaw ye.
[25] Jama na o mɔgɔ fagala tila ka bɔ joli hakɛbɔbaa bolo. A tun bolila ka taa bolibaa kalifadon dugu min na, a ka lasegin yen. A ka sigi yen fo sarakalasebaa kuntigi ka sa, o min munna ni tulu senuma ye.
[26] Nka mɔgɔ fagala bolila ka taa bolibaa kalifadon dugu min na, ni a bɔra o kɔnɔ,
[27] ni joli hakɛ bɔbaa y'a ye bolibaa kalifadon dugu kɔ fɛ, ka mɔgɔ fagala faga, a tɛna jalaki o fagali ko la,
[28] k'a masɔrɔ mɔgɔ fagala tun ka kan ka to bolibaa kalifadon dugu kɔnɔ fo sarakalasebaa kuntigi ka sa. Sarakalasebaa kuntigi salen kɔ, mɔgɔ fagala ka kɔsegin a yɛrɛ ka jamana la.
[29] «Sariya ni ci fɔlen minw sigira aw ni aw bɔnsɔn ye aw sigi yɔrɔw bɛɛ la, olu filɛ ninw ye.
[30] Mɔgɔ min ye mɔgɔ faga, o mɔgɔ fagala na faga seerew da la kuma kosɔn. Nka seere kelenpe ka kuma tɛ se k'a to mɔgɔ si ka faga.
[31] Mɔgɔ fagala min ka kan ka faga, aw kana kunmabɔ sara minɛ o fɛ, sabu a ka kan ka faga.
[32] Mɔgɔ min bolila ka taa bolibaa kalifadon dugu la, aw kana kunmabɔ sara minɛ o fɛ, ko a ka kɔsegin a ka jamana la sani sarakalasebaaw kuntigi ka sa.
[33] Aw bɛ jamana min na, aw kana o nɔgɔ, sabu joli bɛ jamana nɔgɔ. Ni joli bɔnna jamana la, o joli hakɛ tɛ se ka sara ni a fagabaa joli tɛ.
[34] Aw sigilen bɛ jamana min kɔnɔ, ne fana sigilen bɛ o kɔnɔ, aw kana a nɔgɔ, katuguni ne ye Matigi de ye, min sigilen bɛ Israɛl bɔnsɔn cɛma.»