[1] Matigi ye ci minw fɔ Musa ye, a ye olu bɛɛ fɔ Israɛl bɔnsɔn ye.
[2] Musa y'a fɔ Israɛl bɔnsɔn siyaw kuntigiw ye ko: «Matigi ye ci min fɔ, o filɛ nin ye:
[3] Ni cɛ dɔ ye i dafale Matigi la, wala ni a ye i kali k'a yɛrɛ siri, ko a na ko dɔ kɛ, a kana a ka kuma tiɲɛn, nka a da ye min fɔ, a ka o bɛɛ kɛ.
[4] «Ka denmuso npogotigi to a fa ka so kɔnɔ, ni o y'i dafale Matigi la ka a yɛrɛ siri,
[5] ni a fa ye o dafale ko ni a ka yɛrɛ siri kuma mɛn, ni a fa ma foyi fɔ o ko la, o tuma la a denmuso ka dafalew bɛɛ ni a ka yɛrɛ siri kuma bɛɛ dafali ko na kɛ a yɛrɛ kun.
[6] Nka ni a fa ye o ko mɛn ka i ban o ma o don na, o denmuso ka dafale ni a ka yɛrɛ siri kuma si tɛna to a kun. Matigi na yafa o denmuso ma, sabu a fa y'i ban o ma.
[7] «O bɛɛ n'a ta, ni muso furula ka a dafale ni a ka yɛrɛ siri kuma tɛliman to a kun na,
[8] ni a cɛ y'o ko mɛn don min na, ni a ma foyi fɔ o ko la o don na, o muso ka dafale ni a ka yɛrɛ siri kuma na kɛ a yɛrɛ kun.
[9] Nka ni a cɛ y'o mɛn ka i ban o ma o don na, o bɛ a ka dafale ni a ka yɛrɛ siri kuma tɛliman tiɲɛn. Matigi na yafa o muso ma.
[10] «Muso cɛ salen ani muso furu salen ka dafale ni u ka yɛrɛ siri kuma bɛɛ bɛ u yɛrɛw kun.
[11] «Ka muso furulen to a cɛ ka so, ni a ye i dafale wala ka i kali ka a yɛrɛ siri,
[12] ni a cɛ y'o ko mɛn, ni a ma foyi fɔ o ko la, ni a ma i ban o ma, o muso ka dafalew ni a ka yɛrɛ siri kumaw bɛɛ bɛ a yɛrɛ kun.
[13] Nka ni a cɛ y'o ko mɛn ka i ban o ma o don na ka o tiɲɛn, o tuma la a ka dafale ni a ka yɛrɛ siri kuma minw bɛɛ bɔra a da la, olu si tɛ to a kun. A cɛ ye o bɛɛ tiɲɛn. Matigi na yafa o muso ma.
[14] Muso bɛ dafale wala ka a yɛrɛ siri ni kalili kuma min ye k'a yɛrɛ tɔɔrɔ, a cɛ bɛ se ka o sabati wala ka o tiɲɛn.
[15] Ni a cɛ ma foyi fɔ o ko la tile dama dɔ kɔnɔ, o bɛ a muso ka dafalew ni a ka yɛrɛ siri kumaw bɛɛ sabati. A bɛ u sabati, sabu a y'u mɛn don min na, a ma foyi fɔ o ko la o don na.
[16] Nka ni a y'o mɛn don min na, o don tɛmɛnnen kɔ, ni a y'a tiɲɛn, o muso ka tilenbaliya jalaki na kɛ a cɛ kun.»
[17] Matigi ye sariya sigilen minw fɔ Musa ye cɛ ni a muso ko la, wala fa ni a denmuso ko la, ka denmuso npogotigilama to a fa ka so kɔnɔ, olu don.