[1] O tuma la Zelofisad denmuso minw tɔgɔw ko Makila ni Noa ni Hogila ni Milika ani Tirza, olu gɛrɛla ka u jɔ Musa ni sarakalasebaa Eleazar ni kuntigiw ani jama bɛɛ ɲɛ kɔrɔɲɔgɔn kunbɛn finiso da la. Zelofisad fa tun ye Hefɛr ye. Hefɛr fa tun ye Galad ye. Galad fa tun ye Makir ye. Makir fa tun ye Manase ye, olu tun ye Manase ka gwamɔgɔw ye. Manase fa tun ye Yusufu ye. O denmusow ko:
[3] «An fa sara kungokolon kɔnɔ. Jama minw murutira Matigi ma, Korɛ ka jama kɔni, a tun tɛ olu la, nka a sara a yɛrɛ ka jurumu kosɔn. Denkɛ si tun t'a fɛ.
[4] Nka mun y'a to an fa tɔgɔ ka tunun ka bɔ a ka gwa la, katuguni denkɛ t'a fɛ. I ka ciyɛn di an ma an fa balimaw cɛma.»
[5] Musa taara ni o koɲɛ ye Matigi ɲɛ kɔrɔ.
[6] Matigi y'a fɔ Musa ye ko:
[7] «Tiɲɛ bɛ Zelofisad denmusow fɛ. I ka ciyɛn di u ma ka kɛ u ta ye u fa balimakɛw cɛma. I ka u fa ciyɛn di u ma.
[8] I k'a fɔ Israɛl bɔnsɔn ye ko: ‹Ni cɛ dɔ sara k'a sɔrɔ denkɛ t'a fɛ, aw ka a ciyɛn di a denmusow ma.
[9] Ni denmuso t'a fɛ, aw ka a ciyɛn di a balimakɛw ma.
[10] Ni balimakɛw t'a fɛ, aw ka a ciyɛn di a fa balimakɛw ma.
[11] Ni balimakɛw tɛ a fa fɛ, a ka gwamɔgɔ min ka surun a la, aw ka a ciyɛn di o ma, o na a ciyɛn ta. O na kɛ sariya sigilen ni ci fɔlen ye Israɛl bɔnsɔn ye, i ko ne y'a fɔ i ye cogo min na.›»
[12] Matigi y'a fɔ Musa ye ko: «I ka yɛlɛn nin Abarim kulu kan. Ne ye jamana min di Israɛl bɔnsɔn ma, i ka o filɛ.
[13] N'i y'a ye tuma min na, i fana na kafo i ka mɔgɔw kan i ko i kɔrɔkɛ Aron kafora u kan cogo min na,
[14] sabu aw banna ne ka kuma ma ka aw to Zen kungokolon kɔnɔ jama ka dajukɔrɔ kuma tuma la. Aw ma ne ka senumaya jate u ɲɛ na ji ko la.» Olu ye Mɛriba jiw ye, u bɛ Zen kungokolon kɔnɔ Kadɛs.
[15] Musa y'a fɔ Matigi ye ko:
[16] «Matigi, mɔgɔw bɛɛ niw ka Ala, i ka mɔgɔ dɔ sigi jama kun na,
[17] walisa o ka bɔ ka don u ɲɛ na ani ka u ɲɛ minɛ u bɔ tuma ni u don tuma la, walisa Matigi ka jama kana kɛ i ko sagakulu, ni gɛnbaa tɛ a la.»
[18] Matigi y'a fɔ Musa ye ko: «I ka na ni Nun denkɛ Josue ye, Ala Ni b'a kan. I ka i bolo da a kan.
[19] I k'a jɔ sarakalasebaa Eleazar ni jama bɛɛ ɲɛ kɔrɔ ka ciw fɔ a ye u ɲɛ na.
[20] I ka i bonya dɔ da ale kan walisa Israɛl bɔnsɔn jama bɛɛ k'a kan minɛ.
[21] A na jɔ sarakalasebaa Eleazar ɲɛ kɔrɔ, o na ne ɲininka ka kɛɲɛ ni urim ka ko latigɛli ye. Josue ni Israɛl bɔnsɔn jama bɛɛ na bɔ ka kɛɲɛ ni Eleazar ka kuma ye, ka don fana ka kɛɲɛ ni a ka kuma ye.»
[22] Matigi ye min fɔ Musa ye, a y'o kɛ. A nana ni Josue ye k'a jɔ sarakalasebaa Eleazar ani jama bɛɛ ɲɛ kɔrɔ.
[23] A y'a bolow da a kan ka ciw fɔ a ye, i ko Matigi y'a fɔ Musa da la cogo min na.