[1] Matigi y'a fɔ Musa ye ko a ka nin ci fɔ Israɛl bɔnsɔn ye ko:
[2] «Aw ka aw janto a la ka ne sɔn fɛn lase a waati latigɛlen na. Ne ka tasuma la saraka dumuniw suma ka di ne ye.
[3] «I k'a fɔ u ye ko: ‹Aw ka tasuma la saraka min lase Matigi ma, o filɛ nin ye: Aw ka san kelen sagajigi fiɲɛntan fila bɔ don o don. O ye don o don saraka jenita ye.
[4] I ka sagajigi kelen lase sɔgɔma da fɛ ka sagajigi tɔ kelen lase wula da fɛ.
[5] U mugu saraka ka kɛ mugu tɛntɛnnen kilo saba ye, olive mɔ susulen tulu litiri kelen ani tila kaɲaami o la.
[6] O ye don o don saraka jenita ye, o saraka fɔlɔ bɔra Sinayi kulu kan. O ye tasuma la saraka ye, o suma ka di Matigi ye.
[7] Saraka bɔnta min bɛ kɛ sagajigi kelen-kelen kan, o ye diwɛn litiri kelen ani tila ye. I ka o saraka bɔnta diwɛn bɔn Matigi ka yɔrɔ senuma la.
[8] I ka sagajigi filanan lase wula da fɛ, ka mugu saraka ni saraka bɔnta kɛ u kan i ko sɔgɔma da taw. O ye tasuma la saraka ye, o suma ka di Matigi ye.
[9] ‹Lafiɲɛ don na, aw ka san kelen sagajigi fiɲɛntan fila lase. A mugu saraka ka kɛ mugu tɛntɛnnen kilo wɔɔrɔ ye, tulu kaɲaami o la, ka a saraka bɔnta fana lase.
[10] O ye lafiɲɛ donw bɛɛ kelen-kelen ka saraka jenita ye, ka fara don o don saraka jenita ni a saraka bɔnta kan.
[11] ‹Aw ka kalo kura don fɔlɔw la, aw ka nturabɔlan fila ni sagajigi kelen ani san kelen sagajigi wolonwula bɔ ka kɛ saraka jenita ye Matigi ye, olu bɛɛ ka kɛ fiɲɛntanw ye.
[12] Nturabɔlan kelen-kelen fɛ mugu saraka ka kɛ mugu tɛntɛnnen kilo kɔnɔntɔn ye, tulu kaɲaami o la. Sagajigi fɛ mugu saraka ka kɛ mugu tɛntɛnnen kilo wɔɔrɔ ye, tulu kaɲaami o la.
[13] San kelen sagajigi kelen-kelen fɛ mugu saraka ka kɛ mugu tɛntɛnnen kilo saba ye, tulu kaɲaami o la. O ye saraka jenita ye, tasuma la saraka don, a suma ka di Matigi ye.
[14] Ntura kelen-kelen fɛ saraka bɔnta ka kɛ diwɛn litiri saba ye, sagajigi ta ka kɛ diwɛn litiri fila ye, san kelen sagajigi ta ka kɛ diwɛn litiri kelen ani tila ye. Olu ye kalo o kalo saraka jenita ye fo ka san dafa.
[15] Aw ka bakɔrɔ kelen kɛ jurumu yafa saraka ye Matigi ye ka fara don o don saraka jenita ni a saraka bɔnta kan.
[16] ‹San kalo fɔlɔ tile tan ni naaninan don na kɛ Matigi ka Tɛmɛnkan seli ye.
[17] O kalo tile tan ni duurunan don na kɛ seli ye. Mɔgɔw ka buuru fununbali dun tile wolonwula kɔnɔ.
[18] A tile fɔlɔ la, jamalajɛ senuma ka kɛ, aw kana baara si kɛ o don na.
[19] Aw ka saraka jenita min lase Matigi ma, ni o ye tasuma la saraka ye, o ka kɛ nturabɔlan fila ni sagajigi kelen ani san kelen sagajigi wolonwula ye, olu bɛɛ ka kɛ fiɲɛntanw ye.
[20] Aw ka u mugu saraka fana lase, o ye mugu tɛntɛnnen ye, tulu kaɲaami o la. Mugu tɛntɛnnen kilo kɔnɔntɔn ka kɛ ntura bɛɛ kelen-kelen ta ye, mugu tɛntɛnnen kilo wɔɔrɔ ka kɛ sagajigi ta ye,
[21] mugu tɛntɛnnen kilo saba ka kɛ san kelen sagajigi bɛɛ kelen-kelen ta ye.
[22] Aw ka bakɔrɔ kelen kɛ jurumu yafa saraka ye ka aw ka jurumu kafari.
[23] Aw ka o sarakaw lase ka u fara sɔgɔma la saraka jenita kan, o min ye don o don saraka jenita ye.
[24] Aw ka olu lase don o don tile wolonwula kɔnɔ, o ye dumuni ye tasuma la saraka la, o suma ka di Matigi ye. U bɛ lase ka fara don o don saraka jenita ni a saraka bɔnta kan.
[25] A tile wolonwulanan don, jamalajɛ senuma ka kɛ. Aw kana baara si kɛ o don na.
[26] ‹Suman kun fɔlɔ tigɛ don na, ni aw bɛ mugu saraka kura lase Matigi ma, aw ka dɔgɔkunw seli la tuma min na, aw ka jamalajɛ senuma kɛ. Aw kana baara si kɛ o don na.
[27] Aw ka saraka jenita lase, o suma ka di Matigi ye. O ka kɛ nturabɔlan fila ni sagajigi kelen ani san kelen sagajigi wolonwula ye.
[28] Aw ka u mugu saraka fana lase, o ye mugu tɛntɛnnen ye, tulu kaɲaami o la. Mugu tɛntɛnnen kilo kɔnɔntɔn ka kɛ ntura bɛɛ kelen-kelen ta ye, mugu tɛntɛnnen kilo wɔɔrɔ ka kɛ sagajigi ta ye,
[29] mugu tɛntɛnnen kilo saba ka kɛ san kelen sagajigi bɛɛ kelen-kelen ta ye.
[30] Aw ka bakɔrɔ kelen lase ka aw ka jurumu kafari.
[31] Aw ka o sarakaw lase ka u fara don o don saraka jenita ni a mugu saraka kan. U ka kɛ fiɲɛntanw ye. Aw ka u saraka bɔntaw fana lase.