[1] Bagan caman tun bɛ Rubɛn bɔnsɔn ni Gad bɔnsɔn fɛ. Ayiwa, u y'a ye ko Jazɛr jamana ni Galad jamana tun ye bagan mara yɔrɔɲuman ye.
[2] O tuma la Gad bɔnsɔn ni Rubɛn bɔnsɔn taara Musa ni sarakalasebaa Eleazar ani jama la kuntigiw sɛgɛrɛ k'a fɔ u ye ko:
[3] «Atarɔt ni Dibɔn ni Jazɛr ni Nimra ni Hesibɔn ni Eleale ni Sebam ni Nebɔ ani Beɔn,
[4] Matigi ye se sɔrɔ o jamana min kan Israɛl bɔnsɔnɲɛ kɔrɔ, o ye bagan mara yɔrɔɲuman ye. Ayiwa, baganw bɛ i ka jɔnw fɛ.»
[5] U y'a fɔ fana ko: «Ni an ko diyara i ye, i ka nin jamana tigiya di i ka jɔnw ma, i kana taa ni an ye Jurdɛn ba kɔ fɛ.»
[6] Musa ye Gad bɔnsɔn ni Rubɛn bɔnsɔn jaabi ko: «Aw balimaw bɛ taa kɛlɛ la ka aw sigilen to yan wa?
[7] Matigi bɛ jamana min di Israɛl bɔnsɔn ma, mun y'a to aw bɛ u fari faga walisa u kana tɛmɛn ka taa yen?
[8] Ne ye aw faw ci ka bɔ Kadɛs-Barnea ka taa jamana ko lajɛ tuma min na, u ye o ɲɔgɔn kɛ.
[9] U taara fo Esikɔl jɛkɛnɛ la ka o jamana ko lajɛ. O kɔ, u ye Israɛl bɔnsɔn fari faga walisa u kana don o jamana kɔnɔ, Matigi tun ye o min di u ma.
[10] Matigi diminna o don na. A tun y'i kali Ibrahima ni Isaka ani Yakuba ye ko a na jamana min di u ma, mɔgɔ minw bɔra Misira jamana la, k'a daminɛ san mugan mɔgɔw la fo ka taa se u ɲɛ mɔgɔw ma, a y'i kali ko olu si tɛna o jamana ye, sabu u ma Matigi ka sira taama ka dafa,
[12] fɔ Kenaz bɔnsɔn Jefune denkɛ Kalɛb ni Nun denkɛ Josue, katuguni olu ye Matigi ka sira taama ka dafa.
[13] Matigi diminna Israɛl kɔrɔ, a y'a to u ka yaalayaala kungokolon kɔnɔ san binaani kɔnɔ, mɔgɔ minw ye ko jugu kɛ Matigi ɲɛ kɔrɔ, fo olu bɛɛ ka sa.
[14] A filɛ, aw wulila aw faw nɔ na ka kɛ siya jurumutɔ ye, ka dɔ fara Matigi ka dimiya kan Israɛl kama.
[15] Ni aw jɛngɛna ka Matigi bila, a na Israɛl to kungokolon kɔnɔ tun. Aw na kɛ sababu ye ka nin mɔgɔw bɛɛ halaki.»
[16] U gɛrɛla Musa la k'a fɔ ko: «An na suluw jɔ yan an ka bagankuluw ye, ka dugu sigi an ka denmisɛnw ye.
[17] Nka an yɛrɛw na an labɛn ka kɛlɛkɛ minanw ta ka Israɛl bɔnsɔnɲɛ minɛ fo ka u lase u taa yɔrɔ la. Kɛlɛ kunbɛn kogow bɛ dugu minw la, an ka denmisɛnw na sigi olu kɔnɔ jamana mɔgɔw kosɔn.
[18] An tɛna kɔsegin an ka so sani Israɛl bɔnsɔn bɛɛ kelen-kelen ka u ciyɛn sɔrɔ.
[19] An tɛna ciyɛn si ta u fɛ Jurdɛn ba kɔ ani a kɔfɛ jamana la, sabu an ciyɛn bɛ Jurdɛn kɔrɔn yanfan fɛ.»
[20] Musa y'a fɔ u ye ko: «Ni aw y'o kɛ, ni aw ye kɛlɛkɛ minanw ta ka taa kɛlɛ la Matigi ɲɛ kɔrɔ,
[21] ni aw kɛlɛkɛ cɛw bɛɛ kelen-kelen ye Jurdɛn ba tigɛ Matigi ɲɛ kɔrɔ, fo a ka a juguw gɛn ka bɔ a ɲɛ,
[22] ni aw ma kɔsegin fo ka o jamana kolo Matigi ye tuma min na, o tuma la aw na kɛ jalakibaliw ye Matigi ni Israɛl ta fan fɛ. Nin jamana na kɛ aw ta ye Matigi ɲɛ kɔrɔ.
[23] Nka ni aw ma o kɛ, o tuma la aw bɛ Matigi hakɛ ta. Aw k'a dɔn ko aw ka jurumu na aw sɔrɔ, siga t'a la.
[24] Aw ka duguw jɔ aw ka denmisɛnw ye, ka suluw jɔ aw ka bagankuluw ye. Aw da ye min fɔ, aw ka o kɛ.»
[25] Gad bɔnsɔn ni Rubɛn bɔnsɔn y'a fɔ Musa ye ko: «An matigi ye min fɔ, i ka jɔnw na o kɛ.
[26] An ka denmisɛnw ni an musow ni an ka bagan misɛnw ni an ka bagan kunbaw bɛɛ na to Galad duguw kɔnɔ yan.
[27] Nka i ka jɔnw bɛɛ na kɛlɛkɛ minanw ta ka taa kɛlɛ la Matigi ɲɛ kɔrɔ, i ko an matigi y'a fɔ cogo min na.»
[28] Musa ye ci fɔ sarakalasebaa Eleazar ni Nun denkɛ Josue ani Israɛl bɔnsɔn siyaw la gwatigiw ye u ko la.
[29] Musa y'a fɔ u ye ko: «Ni Gad bɔnsɔn ni Rubɛn bɔnsɔn ye Jurdɛn ba tigɛ aw fɛ ni kɛlɛkɛ minanw ye, walisa ka kɛlɛ kɛ Matigi ɲɛ kɔrɔ, ni jamana kolola aw ye tuma min na, o tuma la aw ka Galad jamana tigiya di u ma.
[30] Nka ni u ma kɛlɛkɛ minanw ta ka taa aw fɛ, ciyɛn ka di u ma aw cɛma Kanan jamana la.»
[31] Gad bɔnsɔn ni Rubɛn bɔnsɔn y'a fɔ ko: «Matigi ye min fɔ a ka jɔnw ye, an na o kɛ.
[32] An na ba tigɛ ka taa ni kɛlɛkɛ minanw ye Matigi ɲɛ kɔrɔ Kanan jamana la, nka an na ciyɛn ta Jurdɛn yanfan fɛ.»
[33] Ayiwa, Amɔr siya ka masakɛ Sihon ka mara ni Basan masakɛ Og ka mara, o jamana ni a duguw ani u lamini dugukolow, Musa ye olu bɛɛ di Gad bɔnsɔn ni Rubɛn bɔnsɔn ani Yusufu denkɛ Manase siya tilancɛ ma.
[34] Gad bɔnsɔn ye dugu minw sigi ka u lamini ni kɛlɛ kunbɛn kogow ye, olu tun ye Dibɔn ni Atarɔt ni Aroɛr ni Atarɔt-Sofan ni Jaezɛr ni Jogibeha ni Bɛt-Nimra ani Bɛt-Haran ye. U ye suluw fana jɔ u ka bagankuluw ye.
[37] Rubɛn bɔnsɔn ye Hesibɔn ni Eleale ni Kirijataim ni Nebɔ ani Bal-Meɔn jɔ, ka u tɔgɔw yɛlɛma, ani Sibima. U ye tɔgɔ wɛrɛw da u ka dugu jɔlenw la.
[39] Manase denkɛ Makir bɔnsɔn cɛw taara Galad jamana kama k'a minɛ. Amɔr siya min tun bɛ a kɔnɔ, u ye olu gɛn.
[40] Musa ye Galad jamana di Manase bɔnsɔn Makir ma, o sigira yen.
[41] Manase bɔnsɔn Jair taara ka a bugufyɛw minɛ ka u wele Jair bugufyɛw.
[42] Nobak taara ka Kenat ni a dafɛ bugufyɛw minɛ ka u wele a yɛrɛ tɔgɔ la ko Nobak.