[1] Matigi kumana Musa fɛ ko
[2] a k'a fɔ Israɛl bɔnsɔn ye ko: «Ne bɛ jamana min di aw ma ka kɛ aw sigi yɔrɔ ye, aw donnen kɔ o la,
[3] ni aw bɛ tasuma la saraka bɔ Matigi ye, saraka jenita wala dafale bɔ saraka fagata, wala diyaɲe nili fɛn, wala seli don sarakaw walisa ka kɛ saraka suma duman ye Matigi ye, misi wo, bagan misɛn wo, a ka kɛ tan.
[4] Saraka dibaa kaɲɔ mugu tɛntɛnnen kilo saba kɛ mugu saraka ye, tulu litiri kelen ani tila kaɲaami o mugu la,
[5] ani litiri kelen ani tila diwɛn ka kɛ saraka bɔnta ye saraka jenita wala saraka fagata la, sagaden bɛɛ kelen-kelen kosɔn.
[6] Ni sagajigi don, i kaɲɔ mugu tɛntɛnnen kilo wɔɔrɔ kɛ mugu saraka ye, tulu litiri fila kaɲaami o mugu la,
[7] ka diwɛn litiri fila kɛ saraka bɔnta ye, ka kɛ saraka suma duman ye Matigi ye.
[8] Ni nturabɔlan don, ni a kɛra saraka jenita ye, wala dafale bɔ saraka fagata, wala nisɔndiya saraka Matigi ye,
[9] a dibaa ka mugu saraka min kɛ nturabɔlan kan, o ye ɲɔ mugu tɛntɛnnen kilo kɔnɔntɔn ye, tulu litiri saba kaɲaami o la,
[10] ka saraka bɔnta kɛ diwɛn litiri saba ye. O ye tasuma la saraka ye, o suma ka di Matigi ye.
[11] U n'a kɛ ten ntura bɛɛ kelen-kelen na, wala sagajigi bɛɛ kelen-kelen, wala sagadenw, wala badenw la.
[12] Aw k'a kɛ ten bagan bɛɛ kelen-kelen kosɔn ka kɛɲɛ ni u dama ye.
[13] Ni jamanaden dɔw ye tasuma la saraka bɔ, o suma ka di Matigi ye, u bɛɛ kelen-kelen k'a kɛ ten.
[14] Ni dunan dɔ sigilen bɛ aw cɛma, wala ni a sɔrɔla aw cɛma don nataw la, ko a bɛ tasuma la saraka bɔ, o suma ka di Matigi ye, o bɔ cogo ni aw ta ka kɛ cogo kelen ye.
[15] Sariya kelen ka kɛ jama bɛɛ kan, aw ni dunan min sigilen bɛ aw cɛma. O na kɛ sariya wulibali ye aw bɔnsɔn nataw bɛɛ kan. Aw ni siginfɛ bɛɛ ka kan Matigi ɲɛ kɔrɔ.
[16] Sariya kelenpe ni ci fɔlen kelenpe na kɛ aw ni dunanw bɛɛ kan, olu minw sigilen bɛ aw cɛma.»
[17] Matigi kumana Musa fɛ ko
[18] a k'a fɔ Israɛl bɔnsɔn ye ko: «Ne na aw ladon jamana min na, ni aw sera yen tuma min na,
[19] ni aw bɛ o jamana suman dun, aw ka saraka kɔrɔtata bɔ o la k'a lase Matigi ma.
[20] Aw ka aw ka mugu dogilen fɔlɔta dɔ ta k'a kɛ buurukun ye k'a kɛ saraka kɔrɔtata ye, ka o kɔrɔta i ko aw bɛ gendekɛnɛ la saraka kɔrɔta cogo min na.
[21] Aw ka mugu fɔlɔ dogilen dɔ ta k'a kɛ buurukun ye k'o kɛ saraka kɔrɔtata ye Matigi ye aw bɔnsɔn nataw bɛɛ la.
[22] «Matigi ye nin ci minw di Musa ma, ni aw filila, ni aw ma u bɛɛ kɛ,
[23] o kɔrɔ, Matigi ye ko minw bɛɛ fɔ aw ye Musa da la, kabini Matigi ye ciw di don min na, fo ka taa bila bɔnsɔn nataw la,
[24] ni jama filila ko dɔ la, k'a sɔrɔ jama ma o dɔn, o tuma la jama bɛɛ ka nturabɔlan kelen bɔ ka kɛ saraka jenita ye. O suma ka di Matigi ye. U ka a mugu saraka ni a saraka bɔnta bɔ ka kɛɲɛ ni u sariya sigilenw ye. U ka bakɔrɔ kelen fana bɔ ka kɛ jurumu yafa saraka ye.
[25] Sarakalasebaa na Israɛl bɔnsɔn jama bɛɛ ka jurumu kafari, o ko na yafa u ma, sabu filili tun don. U nana ni u ka saraka ye ka tasuma la saraka bɔ Matigi ye, ka u ka jurumu yafa saraka fana bɔ Matigi ɲɛ kɔrɔ u ka filili kosɔn.
[26] O ko na yafa Israɛl bɔnsɔn jama bɛɛ ni u ka siginfɛw ma, sabu mɔgɔw bɛɛ filila.
[27] «Ni mɔgɔ kelen filila ka jurumu kɛ, a ka na ni san kelen bamuso kelen ye ka kɛ jurumu yafa saraka ye.
[28] O mɔgɔ min filila ka jurumu kɛ, sarakalasebaa na o ka jurumu kafari Matigi ɲɛ kɔrɔ. Ni a ye a ka jurumu kafari tuma min na, o ko na yafa a ma.
[29] Ni mɔgɔ dɔ filila ka jurumu kɛ Israɛl bɔnsɔn cɛma, sariya kelen ka kɛ aw fɛ jamanaden ni siginfɛ kan.
[30] Nka mɔgɔ min mago tɛ foyi la, jamanaden fara siginfɛ kan, ni o ye i tugu ka jurumu kɛ, o tigi ma Matigi jate fɛn ye, o na gɛn ka bɔ a ka mɔgɔw cɛma.
[31] A ye Matigi ka kuma mafiɲɛya ka a ka ci fɔlen tiɲɛn. O tigi na gɛn, a ka tilenbaliya jalaki na kɛ a yɛrɛ kun.»
[32] Ka Israɛl bɔnsɔn to kungokolon kɔnɔ, u ye cɛ dɔ ye dɔgɔ ɲini la lafiɲɛ don na.
[33] Minw y'a ye dɔgɔ ɲini la, olu nana Musa ni Aron ani jama bɛɛ sɛgɛrɛ n'a ye.
[34] U y'a datugu sabu ko jɛlen tun m'a fɔ o ta fan fɛ.
[35] Matigi y'a fɔ Musa ye ko: «O cɛ ka faga, jama bɛɛ k'a bon ni kabakurunw ye bugufyɛ kɔ fɛ.»
[36] Jama bɛɛ y'a labɔ bugufyɛ la k'a bon ni kabakurunw ye k'a faga, i ko Matigi y'a fɔ Musa ye cogo min na.
[37] Matigi y'a fɔ Musa ye ko
[38] a k'a fɔ Israɛl bɔnsɔn ye ko u ka bunsan dila u ka finiw dawolow la u bɔnsɔn nataw bɛɛ la, ka gaari bulama kɛ o dawolow bunsan bɛɛ kelen-kelen na.
[39] «Ni bunsan dilara aw ka finiw dawolow la, aw ka o filɛ ka aw hakili jigin Matigi ka ci fɔlenw bɛɛ la ka u kɛ, walisa aw kana tugu aw yɛrɛ sago ni aw ɲɛw negew la, olu minw ye aw bila jatɔya la.
[40] Aw ka aw hakili to ne ka ci fɔlenw bɛɛ la walisa ka u kɛ. Aw ka kɛ mɔgɔ senumaw ye aw ka Ala ye.
[41] Ne ye Matigi aw ka Ala ye, o min ye aw labɔ Misira jamana la, ka kɛ aw ka Ala ye. Ne ye Matigi aw ka Ala de ye.»