[1] Matigi y'a fɔ Musa ni Aron ye ko:
[2] «Matigi ye sariya min sigi, o ci fɔlen filɛ nin ye ko, i k'a fɔ Israɛl bɔnsɔn ye ko u ka na i yɔrɔ ni misi geren bilenman fiɲɛntan dafalen dɔ ye, zu ma da min kan na fɔlɔ.
[3] I ka o don sarakalasebaa Eleazar bolo, o ka taa n'a ye bugufyɛ kɔ fɛ, mɔgɔ dɔ k'a faga a ɲɛ kɔrɔ.
[4] Sarakalasebaa Eleazar ka o joli dɔ ta ni a bolonkɔni ye k'a seriseriɲɔgɔn kunbɛn finisoɲɛfɛla fan fɛ siɲɛ wolonwula.
[5] Mɔgɔ dɔ ka o misi geren jeni a ɲɛ kɔrɔ, o wolo ni o sogo ni o joli ani a bo bɛɛ ka jeni.
[6] Sarakalasebaa ka sedere jiri dɔ ni hisope jiri fura ani gaari bilenman dɔ ta ka u kerun o tasuma la misi jenitɔ fɛ.
[7] O kɔ, sarakalasebaa ka a ka finiw ko ka a fari ko ni ji ye. O kɔ, a ka segin bugufyɛ la. Sarakalasebaa nɔgɔlen na to fo wula da fɛ.
[8] Mɔgɔ min ye misi jeni, o ka a ka finiw ko ji la, k'a fari ko ji la, a nɔgɔlen na to fo wula da fɛ.
[9] Mɔgɔ jɛlen dɔ ka misi bugurijɛ cɛ k'a bila bugufyɛ kɔ fɛ yɔrɔ jɛlen na. O ka mara Israɛl bɔnsɔn jama bɛɛ ye. Nɔgɔlenya kosɔn saniyali ji don. Jurumu yafa saraka don.
[10] Mɔgɔ min ye misi bugurijɛ cɛ, o ka a ka finiw ko, o nɔgɔlen na to fo wula da fɛ. O na kɛ sariya wulibali ye Israɛl bɔnsɔn ni siginfɛw ye.
[11] «Mɔgɔ min magara mɔgɔ su la, o nɔgɔlen na to tile wolonwula kɔnɔ.
[12] A ka a yɛrɛ saniya ni o ji ye a tile sabanan ni a tile wolonwulanan don, o kɔ, a na jɛya. Nka ni a ma i saniya a tile sabanan ni a tile wolonwulanan la, a tɛna jɛya.
[13] Mɔgɔ min magara mɔgɔ salen su la, ni a ma i saniya, o bɛ Matigi ka finiso nɔgɔ. O tigi ka gɛn ka bɔ Israɛl bɔnsɔn cɛma. Saniya ji ma seriseri a kan, o de y'a to a nɔgɔlen don. A ka nɔgɔlenya bɛ a yɛrɛ kun.
[14] «Ni mɔgɔ dɔ sara finiso dɔ kɔnɔ, sariya filɛ nin ye o ko la. Mɔgɔ o mɔgɔ donna o finiso kɔnɔ, ani minw bɛɛ bɛ o finiso kɔnɔ, olu nɔgɔlen na to tile wolonwula kɔnɔ.
[15] Datugulan tɛ minan o minan da la o finiso kɔnɔ, olu bɛɛ nɔgɔlen don.
[16] Ka mɔgɔ to kungo kɔnɔ, ni a magara npan ka mɔgɔ fagalen su la, wala mɔgɔ salen su, wala mɔgɔ kolow, wala kaburu, o nɔgɔlen na to tile wolonwula kɔnɔ.
[17] Mɔgɔw ka jurumu yafa saraka jeninen bugurijɛ dɔ ta o mɔgɔ nɔgɔlenw ye, ka ji woyota dɔ kɛ o kan minan dɔ kɔnɔ.
[18] Mɔgɔ jɛlen dɔ ka hisope jiri fura dɔ ta k'a su o ji la ka o seriseri finiso ni a minanw bɛɛ ni a kɔnɔ mɔgɔw bɛɛ kan ani minw magara mɔgɔ kolo la, wala mɔgɔ fagalen su, wala mɔgɔ salen su wala kabaru dɔ la.
[19] O mɔgɔ jɛlen ka o ji seriseri mɔgɔ nɔgɔlen kan a tile sabanan ni a tile wolonwulanan la, a ka a saniya a tile wolonwulanan don. A ka a ka finiw ko ka a fari ko ji la. Ni wula da sera, a na jɛya.
[20] Mɔgɔ min nɔgɔlen don, ni a ma i saniya, o tigi ka gɛn ka bɔ jama cɛma, sabu a ye Matigi ka yɔrɔ senuma nɔgɔ. Saniya ji ma seriseri a kan, o de y'a to a nɔgɔlen don.
[21] O na kɛ sariya wulibali ye u ye. Min ye saniya ji seriseri, o ka a ka finiw ko. Min magara saniya ji la, o nɔgɔlen na to fo wula da fɛ.
[22] Mɔgɔ nɔgɔlen magara fɛn o fɛn na, o nɔgɔlen don. Mɔgɔ min magara a la, o fana nɔgɔlen na to fo wula da fɛ.»