[1] Israɛl bɔnsɔn jama bɛɛ sera Sen kungokolon kɔnɔ san fɔlɔ la, ka sigi Kadɛs. Mariyama sara yen, u y'a su don yen.
[2] Ji ma sɔrɔ jama ye. Mɔgɔw wulila Musa ni Aron kama.
[3] Mɔgɔw bɛɛ ye Musa kɔrɔfɔ, u ko: «An balimaw sara Matigi ɲɛ kɔrɔ tuma min na, ni an fana tun sara, o tun ka fisa.
[4] Mun y'a to aw nana ni Matigi ka jama ye nin kungokolon kɔnɔ walisa an ni an ka baganw ka sa yan?
[5] Mun y'a to aw ye an labɔ Misira jamana la ka na ni an ye nin yɔrɔ jugu la? Sɛnɛ yɔrɔ tɛ yan. Toro sun ni rezɛn sun ni gerenati sun si tɛ yan. Ji minta tɛ yan.»
[6] Ayiwa, Musa ni Aron bɔra jama kɔrɔ ka taa ɲɔgɔn kunbɛn finiso da la ka u bi ka u ɲɛw biri duguma. Matigi nɔɔrɔ y'i jira u la.
[7] Matigi y'a fɔ Musa ye ko:
[8] «I ka o bere ta, i ni i kɔrɔkɛ Aron ka jama bɛɛ wele ka lajɛɲɔgɔn kan. Aw ka kuma farakurun fɛ u ɲɛ na, ko a ka ji bɔ. I na ji bɔ farakurun la u ye ka ji di jama ni u ka baganw ma, u k'u min.»
[9] Musa ye o bere ta ka bɔ Matigi ɲɛ kɔrɔ i ko Matigi y'a fɔ a ye cogo min na.
[10] Musa ni Aron ye jama wele ka u lajɛɲɔgɔn kan farakurun kɔrɔ. Musa y'a fɔ u ye ko: «Aw murutilenw, aw ka lamɛnni kɛ sa. An ka ji bɔ aw ye nin farakurun la wa?»
[11] O kɔ, Musa y'a bolo kɔrɔta ka farakurun gosi n'a ka bere ye siɲɛ fila. Ji caman bɔra. Jama y'u min, ani baganw fana.
[12] O tuma la Matigi y'a fɔ Musa ni Aron ye ko: «Aw ma da ne la ka ne ka senumaya jate Israɛl bɔnsɔnɲɛ kɔrɔ, o de kosɔn ne bɛ jamana min di nin jama ma, aw tɛna u ladon o kɔnɔ.»
[13] Olu tun ye Mɛriba jiw ye, Israɛl bɔnsɔn ye Matigi kɛlɛ yɔrɔ min na. Matigi y'a jira u la yen ko a senuma don.
[14] Musa ye cidenw bila ka bɔ Kadɛs ka taa Edɔm masakɛ sɛgɛrɛ k'a fɔ a ye ko: «I balimakɛ Israɛl ko: ‹I bɛ an sɛgɛn kow bɛɛ dɔn.
[15] An bɛnbaw taara Misira jamana la, an sigira Misira ka mɛn. Nka Misirakaw ye an ni an bɛnbaw minɛ ko juguya.
[16] An kasira Matigi nɔ fɛ tuma min na, a ye an kasikan lamɛn ka mɛlɛkɛ ci ka an labɔ Misira jamana la. An filɛ Kadɛs, o bɛ i ka jamana dan na.
[17] An b'i deli, i ka sɔn an ka tɛmɛn i ka jamana fɛ. An tɛna don forow wala rezɛn nakɔtuw la, an tɛna i ka kɔlɔnw ji min. An na tɛmɛn masakɛ ka siraba fɛ. An tɛna fara ka taa kinin wala numan fɛ, fo ka i ka jamana ban.›»
[18] Edɔm y'a fɔ a ye ko: «I tɛna tɛmɛn ne ka yɔrɔ fɛ. N'o kɛra, ne na bɔ k'i kunbɛn ni npan ye.»
[19] Israɛl bɔnsɔn y'a fɔ a ye ko: «An na tɛmɛn siraba fɛ. Ni ne ni ne ka bagankuluw ye i ka ji dɔ min, ne n'a wari sara. Ne na tɛmɛn ne sen na dɔrɔn, ko wɛrɛ t'a la.»
[20] Edɔm y'a jaabi ko: «I tɛna tɛmɛn yan fewu.» Edɔm bɔra ka u kunbɛn ni mɔgɔ caman ni fangaba ye.
[21] O cogo la Edɔm ma sɔn ka tɛmɛn sira di Israɛl ma a ka jamana fɛ. Israɛl farala ka taa fan wɛrɛ fɛ.
[22] Israɛl bɔnsɔn jama bɛɛ wulila ka bɔ Kadɛs ka taa se Hor kulu ma.
[23] Ka u to Hor kulu kɛrɛ fɛ Edɔm jamana dan na, Matigi y'a fɔ Musa ni Aron ye ko:
[24] «Aron bɛna kafo a ka mɔgɔw kan. Aw banna ka ne ka ci fɔlen kɛ Mɛriba jiw yɔrɔ la, o de y'a to ne bɛ jamana min di Israɛl bɔnsɔn ma, a tɛna don yen.
[25] I ka na ni Aron ni a denkɛ Eleazar ye Hor kulu kan.
[26] I ka Aron ka finiw bɔ a kan na ka u don a denkɛ Eleazar kan na. Aron na kafo a ka mɔgɔw kan, a na sa yen.»
[27] Matigi ye min fɔ, Musa y'o kɛ. U yɛlɛnna Hor kulu kan jama bɛɛ ɲɛ na.
[28] Musa ye Aron ka finiw bɔ a kan na ka u don a denkɛ Eleazar kan na. Ayiwa, Aron sara kulu kuncɛ la yen. O kɔ, Musa ni Eleazar jiginna ka bɔ kulu kan.
[29] Jama bɛɛ y'a ye ko Aron sara. Israɛl ka so bɛɛ ye Aron su kasi tile bisaba kɔnɔ.