[1] Arad masakɛ Kananka min sigilen tun bɛ jamana worodugu yanfan fɛ, o y'a mɛn ko Israɛl natɔ don Atarim sira fɛ. A ye Israɛl kɛlɛ ka o ka mɔgɔ dɔw minɛ.
[2] O tuma la Israɛl y'i dafale Matigi la ko: «Ni i ye nin mɔgɔw don ne bolo, ne na u ka duguw halaki ka u ban.»
[3] Matigi ye Israɛl kan lamɛn, ka o Kanankaw don u bolo. U ye olu ni u ka duguw halaki ka u ban. O kosɔn o yɔrɔ tɔgɔ ko Horma.
[4] U wulila ka bɔ Hor kulu kan ka taa Kɔgɔji Bilen sira fɛ ka Edɔm jamana munumunu. Ayiwa, mɔgɔw bɛɛ dusu tiɲɛnna sira la.
[5] U ye Ala ni Musa kɔrɔfɔ, u ko: «Mun y'a to aw ye an labɔ Misira jamana la walisa an ka sa kungokolon kɔnɔ? Dumuni fɛn tɛ yan, ji tɛ yan, anɲiginna nin dumuni la, a manɲi.»
[6] O tuma la Matigi ye sa tasumamaw bila mɔgɔw cɛma. U ye mɔgɔw cin. Israɛl mɔgɔ caman sara.
[7] Mɔgɔw taara Musa fɛ, u ko: «An ye jurumu kɛ katuguni an ye i kɔrɔfɔ ka Matigi fana kɔrɔfɔ. I ka Matigi deli ko a ka nin saw mabɔ an na.» Musa ye Ala deli mɔgɔw ye.
[8] Matigi y'a fɔ Musa ye ko: «I ka sa tasumama bisigi dila k'a dulon jiri jan jɔlen na. Mɔgɔ o mɔgɔ cinna, ni a ye o sa filɛ, a tɛna sa.»
[9] Musa ye sa bisigi dila ni nsiranɛgɛ ye k'a dulon jiri jan jɔlen na. Mɔgɔ o mɔgɔ cinna sa fɛ, ni o ye a ɲɛ jɔ o nsiranɛgɛ sa la, o tun tɛ sa.
[10] O kɔ, Israɛl bɔnsɔn bɔra yen ka taa u ka buguw turu Obɔt.
[11] U bɔra Obɔt ka taa u ka buguw turu Ije-Abarim, o bɛ kungokolon kɔnɔ Moab jamana kuntilenna la, kɔrɔn yanfan fɛ.
[12] U bɔra yen ka taa u ka buguw turu Zerɛd jɛkɛnɛ la.
[13] U bɔra yen ka taa u ka buguw turu Arnɔn kɔ kɔ fɛ, o ji bɛ woyo kungokolon kɔnɔ ka bɔ Amɔr siya ka jamana dan na. Arnɔn kɔ ye Moab dan ye Moab jamana ni Amɔr siya cɛ.
[14] O de y'a to a fɔra Matigi ka kɛlɛ kow kitabu la ko: «Sufa jamana la Vahɛb, ani Arnɔn kɔ jɛkɛnɛ,
[15] ani kuluw furancɛ min bɛ jigin ka taa Ar fan fɛ ka taa se Moab jamana dan ma.»
[16] U bɔra yen ka taa se Beɛr. Matigi ye kɔlɔn min ko fɔ Musa ye ko a ka mɔgɔ lajɛɲɔgɔn kan yen, ko a na ji di u ma, o kɔlɔn don.
[17] O tuma la Israɛl ye nin dɔnkili da ko: «Kɔlɔn, i ka ji bɔ ka woyo, aw ka tanuli dɔnkili da a ye.
[18] Kuntigiw ye o kɔlɔn sen, mɔgɔ tɔgɔbaw y'a sen ni masaya bere ni u ka berew ye.» U bɔra kungokolon kɔnɔ ka taa se Matana,
[19] ka bɔ Matana ka taa se Nahaliɛl, ka bɔ Nahaliɛl ka taa se Bamɔt.
[20] U bɔra Bamɔt ka taa se Moab jamana kulu jiginjigin kɛnɛ la fo ka taa se Pisiga kulu ma, o sinnen bɛ kungokolonba ma.
[21] Israɛl ye cidenw bila ka taa Amɔr siya ka masakɛ Sihon fɛ k'a fɔ a ye ko:
[22] «N'i bɛ sɔn, an bɛ tɛmɛn i ka jamana fɛ. An tɛna fara ka don forow la wala rezɛn nakɔtuw la. An tɛna i ka kɔlɔnw ji min. An na tɛmɛn masakɛ ka siraba fɛ, fo ka i ka jamana cɛ tigɛ.»
[23] Nka Sihon ma sɔn Israɛl ka tɛmɛn a ka jamana fɛ. A y'a ka mɔgɔw bɛɛ lajɛ ka bɔ ka Israɛl kunbɛn kungokolon kɔnɔ ka taa se Jahaz, ka Israɛl kɛlɛ yen.
[24] Israɛl ye u faga ni npan ye ka a ka jamana minɛ ka bɔ Arnɔn kɔ da la ka taa se Jabɔk kɔ da la, fo ka taa se Amɔn bɔnsɔn dancɛ ma, k'a masɔrɔ kɛlɛ kunbɛn kogow tun bɛ Amɔn bɔnsɔn dancɛ la.
[25] Israɛl ye u ka duguw minɛ, ka sigi Hesibɔn ni a dafɛ duguw bɛɛ ani Amɔr siya ka duguw bɛɛ la.
[26] Hesibɔn tun ye Amɔr siya ka masakɛ Sihon ka dugu ye. A tun ye Moab masakɛ kɔrɔ kɛlɛ ka o ka jamana minɛ a la fo ka taa se Arnɔn kɔ da la.
[27] O de y'a to ntalen dalaw b'a fɔ ko: «A' ye na Hesibɔn! Sihon ka dugu ka sigi ka sabati.
[28] Katuguni tasuma dɔ bɔra Hesibɔn, tasuma mana dɔ bɔra Sihon ka dugu la, o ye Moab-Ar jeni, ka Arnɔn batoli kɛ yɔrɔw kuntigiw fana jeni.
[29] Bɔnɛ b'i ye, Moab. Kemɔs siya, i halakira. A' y'a to a denkɛw ka boli ka a denmusow don jɔnya la Amɔr siya ka masakɛ Sihon bolo.
[30] A ye u bon ni biɲɛw ye, Hesibɔn halakira fo ka taa se Dibon. A ye tiɲɛnni kɛ fo ka taa se Nofak, fo ka se Medeba.»
[31] Ayiwa, Israɛl sigira Amɔr siya ka jamana la.
[32] Musa ye cidenw bila ka taa Jazɛr ko lajɛ. Israɛl ye olu ka duguw minɛ ka Amɔr siya mɔgɔw gɛn ka bɔ yen.
[33] O kɔ, u farala ka taa Basan sira fɛ. Basan masakɛ Og ni a ka mɔgɔw bɛɛ bɔra ka taa u kunbɛn ka u kɛlɛ Edrei.
[34] Matigi y'a fɔ Musa ye ko: «I kana siran a ɲɛ, k'a masɔrɔ ne ye a ni a ka jamana ni a ka mɔgɔw bɛɛ don i bolo. I ye min kɛ Amɔr siya ka masakɛ Sihon la, o min sigilen tun bɛ Hesibɔn, i ka o ɲɔgɔn kɛ ale fana la.»
[35] U ye a ni a denkɛw ni a ka mɔgɔw bɛɛ faga ka u si tunun. U ye a ka jamana minɛ.