[1] Levi denkɛ Kɛhat denkɛ Jizehar denkɛ Korɛ ye jɛ siri, o ni Eliab denkɛ Datan ni Abiram ani Pelɛt denkɛ On. O mɔgɔ saba tun ye Rubɛn bɔnsɔn ye.
[2] O mɔgɔ naani murutira Musa ma. Israɛl bɔnsɔn kuntigi kɛmɛ fila ni biduuru farala u kan, jama la mɔgɔ tɔgɔbaɲɛnatɔmɔlenw tun don.
[3] U ye u lajɛ ka Musa ni Aron kɛlɛ. U ko: «Aw tɛmɛnna aw dan kan, sabu jama bɛɛ lajɛlen ye mɔgɔ senumaw ye, Matigi bɛ u cɛma fana. Mun y'a to aw bɛ aw yɛrɛ kɔrɔta Matigi ka jama kun na?»
[4] Musa y'o mɛn tuma min na, a y'i bi k'a ɲɛ biri duguma.
[5] A y'a fɔ Korɛ ni a ka jama ye ko: «Sini sɔgɔma, mɔgɔ min ye Matigi ta ye ani min ka senu, Matigi na o jira k'a to o ka gɛrɛ a la. A ye min ɲɛnatɔmɔ, a n'a to o ka gɛrɛ a la.
[6] Aw ka min kɛ, o filɛ nin ye: Korɛ ni a ka mɔgɔw bɛɛ, aw ka wusulan dagaw ta.
[7] Sini, aw ka tasuma kɛ u kɔnɔ ka wusulan suma duman kɛ u la Matigi ɲɛ kɔrɔ. Matigi mana min ɲɛnatɔmɔ, o de na kɛ senuma ye. Aw Levi bɔnsɔnw, aw tɛmɛnna aw dan kan.»
[8] Musa y'a fɔ Korɛ ye ko: «Levi bɔnsɔnw, aw ka lamɛnni kɛ.
[9] Israɛl ka Ala ye aw ɲɛnatɔmɔ ka bɔ Israɛl jama bɛɛ la ko aw ka gɛrɛ a la walisa aw ka Matigi ka finiso baara kɛ, ka aw jɔ jama bɛɛ ɲɛ kɔrɔ ka baara kɛ u ye. O ka dɔgɔ aw ɲɛ na wa?
[10] E ni i balimakɛw bɛɛ, aw minw ye Levi bɔnsɔnw ye, Ala y'a to aw ka gɛrɛ a la. Sisan aw bɛ sarakalasebaaya fana ɲini.
[11] O de kosɔn e ni i ka jama bɛɛ ye aw lajɛ ka Matigi kɛlɛ. Aron kɔni ye mun ye fo aw bɛ dajukɔrɔ kuma fɔ ale ma?»
[12] Musa ye ci bila ka Eliab denkɛw Datan ni Abiram wele, nka u ko: «An tɛna taa.
[13] Jamana min falen bɛ nɔnɔ ni di la fo ka woyo, i ye an labɔ yen walisa ka an faga kungokolon kɔnɔ, o ye ko dɔgɔmanni ye wa? O dɔrɔn tɛ, i ye i yɛrɛ kɛ an kuntigiba ye fana.
[14] Nɔnɔ ni di bɛ jamana min na fo ka woyo, i ma taa ni an ye yen fewu. I ma forow ni rezɛn nakɔw tigiya di an ma fana. I b'a fɛ ka nin mɔgɔw ɲɛw ci wa? An tɛna taa fewu.»
[15] Musa diminna kosɛbɛ. A y'a fɔ Matigi ye ko: «I kana sɔn u ka saraka la. Ne ma hali fali kelen minɛ u la, ne ma ko jugu kɛ u si la.»
[16] Musa y'a fɔ Korɛ ye ko: «E ni i ka jama bɛɛ ka na Matigi ɲɛ kɔrɔ yan sini, e ni olu ani Aron.
[17] Aw bɛɛ kelen-kelen ka na ni aw ka wusulan dagaw ye ka wusulan suma duman kɛ u kɔnɔ Matigi ɲɛ kɔrɔ. O na kɛ wusulan daga kɛmɛ fila ni biduuru ye. E ni Aron fana ka na ni aw ka wusulan dagaw ye.»
[18] U bɛɛ kelen-kelen ye u ka wusulan dagaw ta ka tasuma kɛ u la ka wusulan suma duman kɛ o kan, ka u jɔɲɔgɔn kunbɛn finiso da la Musa ni Aron fɛ.
[19] Korɛ ye jama bɛɛ lajɛ Musa ni Aron kamaɲɔgɔn kunbɛn finiso da la. O tuma la Matigi nɔɔrɔ y'i jira jama bɛɛ la.
[20] Matigi y'a fɔ Musa ni Aron ye ko:
[21] «Aw ka aw mabɔ nin jama la, walisa ne ka u halaki yɔrɔ nin kelen.»
[22] U ye u bi ka u ɲɛ biri duguma k'a fɔ ko: «Ala, mɔgɔw bɛɛ niw ka Ala. Mɔgɔ kelen ye jurumu kɛ, i na dimin jama bɛɛ kɔrɔ wa?»
[23] Matigi ye Musa jaabi ko:
[24] «I ka kuma jama fɛ k'a fɔ ko u ka u mabɔ Korɛ ni Datan ani Abiram sigi yɔrɔw fan bɛɛ la.»
[25] Musa wulila ka taa Datan ni Abiram yɔrɔ. Israɛl bɔnsɔn cɛkɔrɔbaw tugura a nɔ fɛ.
[26] A kumana jama fɛ ko: «A' ye aw mabɔ nin mɔgɔ juguw ka finisow la. Aw kana maga u bolo fɛn si la, walisa aw kana na halaki u fɛ u ka jurumuw kosɔn.»
[27] O tuma la u wulila ka u mabɔ Korɛ ni Datan ani Abiram sigi yɔrɔw fan bɛɛ la. Datan ni Abiram bɔra ka u jɔ u ka finiso daw la, u ni u musow ni u denkɛw ani u mɔdenw.
[28] Musa ko: «Aw n'a dɔn nin de fɛ ko Matigi ye ne ci ka nin kow bɛɛ kɛ, ko ne ma u kɛ ne yɛrɛma.
[29] Ni nin mɔgɔw sara Hadamadenw bɛɛ sa cogo la, ko min delila ka mɔgɔw bɛɛ sɔrɔ, ni o ye ninw sɔrɔ, o tuma la Matigi ma ne ci.
[30] Nka ni Matigi bɛ ko kura kɛ, ni dugukolo ye a da yɛlɛ ka u ni u bolo fɛnw bɛɛ kunun, ka u ɲɛnama jigin ka taa lahara, o tuma la aw n'a dɔn ko nin mɔgɔw ma Matigi jate fɛn ye.»
[31] A tilalen kɔ o kuma bɛɛ la, dugukolo pɛrɛnna u senw kɔrɔ.
[32] Dugukolo y'a da yɛlɛ ka u kunun, u ni u so mɔgɔw ani Korɛ nɔfɛ mɔgɔw ni u bolo fɛnw bɛɛ.
[33] U ɲɛnama jiginna ka taa lahara, u ni u bolo fɛnw bɛɛ. O kɔ, dugukolo ye a da tugu u da la. U halakira ka bɔ jama cɛma.
[34] Israɛl mɔgɔ minw tun bɛ u lamini na, olu bɛɛ bolila u kulokan kosɔn. U ko: «An ka boli ka taa, walisa dugukolo kana na an fana kunun.»
[35] Cɛ kɛmɛ fila ni biduuru minw ye wusulan suma duman wusu, tasuma bɔra Matigi fɛ ka olu jeni ka u ban.
[36] Matigi kumana Musa fɛ ko:
[37] «I k'a fɔ sarakalasebaa Aron denkɛ Eleazar ye ko a ka o wusulan dagaw cɛ ka bɔ o tasuma mana cɛma, ka u kɔnɔ tasuma seri yɔrɔ jan, k'a masɔrɔ u saniyalen don.
[38] O mɔgɔ minw ye jurumu kɛ ka u yɛrɛw halaki, mɔgɔw ka olu ka wusulan dagaw faga ka u kɛ nɛgɛ falafala ye ka o kɛ ka saraka bɔlan datugu. U taara Matigi ɲɛ kɔrɔ, o de y'a to u saniyalen don. Olu na kɛ taamashyɛn ye Israɛl bɔnsɔn ye.»
[39] Nsiranɛgɛ wusulan daga minw tun bɛ cɛ jeninenw bolo, sarakalasebaa Eleazar ye olu cɛ ka u kɛ nɛgɛ pɛnpɛrɛlenw ye ka saraka bɔlan datugu.
[40] U ka kɛ hakilijigin fɛn ye Israɛl bɔnsɔn ye, walisa mɔgɔ o mɔgɔ tɛ bɔ Aron bɔnsɔn na, o si kana gɛrɛ ka wusulan suma duman wusu Matigi ɲɛ kɔrɔ, walisa o kana kɛ i ko Korɛ ni a ka jama, i ko Matigi tun y'a fɔ Musa da la cogo min na.
[41] O dugusajɛ, Israɛl bɔnsɔn jama bɛɛ ye dajukɔrɔ kuma fɔ Musa ni Aron ma, ko: «Aw ye Matigi ka mɔgɔw faga.»
[42] Ka jama lajɛlen to Musa ni Aron kama, u ye u ɲɛw kɔrɔtaɲɔgɔn kunbɛn finiso fan fɛ. A filɛ, kabasen y'a datugu, Matigi nɔɔrɔ y'i jira.
[43] Musa ni Aron seraɲɔgɔn kunbɛn finiso da la.
[44] Matigi y'a fɔ Musa ye ko:
[45] «A' ye bɔ nin jama cɛma walisa ne ka u halaki yɔrɔ nin kelen.» U ye u bi ka u ɲɛ biri duguma.
[46] Musa y'a fɔ Aron ye ko: «I ka wusulan daga ta ka tasuma bɔ saraka bɔlan na k'a kɛ o kɔnɔ, ka wusulan suma duman kɛ a kɔnɔ, ka i tɛliya ka taa n'a ye jama yɔrɔ, ka u ka jurumu kafari, katuguni Matigi ka dimiya wulila, fiɲɛbana wulila.»
[47] Aron ye wusulan daga ta i ko Musa y'a fɔ cogo min na ka boli ka taa jama cɛma. A filɛ, fiɲɛbana tun wulila mɔgɔw cɛma. A ye wusulan suma duman wusu ka mɔgɔw ka jurumu kafari.
[48] A y'i jɔ suw niɲɛnamaw furancɛ la. Fiɲɛbana jɔra.
[49] Mɔgɔ minw sara o fiɲɛbana fɛ, olu tun ye mɔgɔ waa tan ni naani ni kɛmɛ wolonwula ye. Minw sara Korɛ kosɔn, olu sen t'a la.
[50] O kɔ, Aron kɔseginna Musa fɛɲɔgɔn kunbɛn finiso da la. O y'a sɔrɔ fiɲɛbana jɔra.