[1] Israɛl bɔnsɔn wulila ka taa u ka buguw turu Moab jɛkɛnɛ la, o bɛ Jurdɛn ba kɔ fɛ, Jeriko kuntilenna la.
[2] Israɛl ye min kɛ Amɔr siya la, Zipor denkɛ Balak ye o bɛɛ ye.
[3] Moabkaw siranna kosɛbɛ o mɔgɔw cayali kosɔn. U ja tigɛra Israɛl bɔnsɔn kosɔn.
[4] Moabkaw y'a fɔ Madian cɛkɔrɔbaw ye ko: «Nin jama na an dafɛ fɛnw bɛɛ halaki sisan, i ko misi bɛ kungokɔnɔ binɲimi k'a ban cogo min na.» Zipor denkɛ Balak tun ye Moab masakɛ ye o waati la.
[5] A ye cidenw bila ka taa Beɔr denkɛ Balam sɛgɛrɛ, o tun bɛ a faso la Petɔr, Ufrate ba da la. A y'a wele ko: «A filɛ, mɔgɔ dɔw bɔra Misira jamana la, u bɛ dugukolo datugu. U sigilen bɛ ne kuntilenna la.
[6] Ayiwa ne b'i deli, i ka na ka nin mɔgɔw danga, sabu u barika ka bon ne barika ye. A dɔrɔ ne na se ka u kɛlɛ ka u gɛn ka bɔ jamana la, katuguni ne y'a dɔn ko ni i ye dubaw kɛ mɔgɔ min ye, o bɛ duba sɔrɔ. Ni i ye min danga, o dangalen bɛ.»
[7] Moab cɛkɔrɔbaw ni Madian cɛkɔrɔbaw wulila ka taa ni samaw ye u bolo ka di dɔnnikɛla ma. U taara Balam sɛgɛrɛ ka Balak ka kuma fɔ a ye.
[8] Balam y'a fɔ u ye ko: «Aw ka si yan bi, Matigi mana min fɔ ne ye, ne na aw jaabi ka kɛɲɛ ni o ye.» Moab cɛkɔrɔbaw jiginna Balam ka so.
[9] Ala nana Balam fɛ, a ko: «Ninw ye mun mɔgɔw ye i fɛ yan?»
[10] Balam ye Ala jaabi ko: «Moab masakɛ, Zipor denkɛ Balak ye u ci ka na a fɔ ne ye ko:
[11] ‹A filɛ, siya dɔ bɔra Misira jamana la, u bɛ dugukolo datugu.› Ko ne ka taa ka u danga a ye, ko a dɔrɔ ale na se ka u kɛlɛ ka u gɛn ka bɔ yen.»
[12] Ala y'a fɔ Balam ye ko: «I kana taa u fɛ. I kana o siya danga, katuguni dubadenw don.»
[13] Balam wulila sɔgɔma da fɛ k'a fɔ Balak ka kuntigiw ye ko: «A' ye taa aw ka jamana la sabu Matigi ma sɔn ne ka taa aw fɛ.»
[14] Moab kuntigiw wulila ka kɔsegin Balak yɔrɔ, u ko: «Balam ma sɔn ka na an fɛ.»
[15] Balak ye kuntigi dɔ wɛrɛw ci ka taa, u tun ka ca ni fɔlɔ taw ye. U tɔgɔw tun ka bon ni olu taw ye fana.
[16] U sera Balam fɛ k'a fɔ a ye ko: «Zipor denkɛ Balak ko: ‹Foyi kana i bali ka taa a fɛ.›
[17] Ko a na bonyaba di i ma. I mana min fɔ, a na o bɛɛ kɛ. A b'i deli, ko i ka taa ka o mɔgɔw danga a ye.»
[18] Balam ye Balak ka cidenw jaabi ko: «Hali ni Balak ye a ka so fa warijɛ ni sanu la ka o bɛɛ di ne ma, ne tɛ se ka foyi kɛ ka tɛmɛn Matigi ne ka Ala ka kuma kan, koba wala ko misɛn na.
[19] Sisan ne bɛ aw deli, aw ka si yan bi, walisa Matigi na min fɔ ne ye tun, ne ka o dɔn.»
[20] Ala nana Balam fɛ su fɛ k'a fɔ a ye ko: «Ni o mɔgɔw nana i wele, i ka wuli ka taa u fɛ, nka ne bɛ min fɔ i ye, i ka o dama kɛ.»
[21] Balam wulila sɔgɔma da fɛ ka tɛrɛfɛ da a ka fali kan ka taa Moab kuntigiw fɛ.
[22] Ala diminna a kɔrɔ a taali kosɔn. Matigi ka mɛlɛkɛ y'i jɔ sira la k'a ɲɛkɔrɔ tigɛ. Balam yɛlɛnnen tun bɛ a ka fali kan, a ka baaraden fila fana tun b'a fɛ.
[23] Fali ye Matigi ka mɛlɛkɛ jɔlen ye sira kan, o ka npan foosilen b'a bolo. Fali farala ka bɔ sira kan ka don foro la. Balam ye fali gosi k'a lasegin sira kan.
[24] O kɔ, Matigi ka mɛlɛkɛ y'i jɔ sira misɛn kan rezɛn nakɔtuw furancɛ la. Kogo tun bɛ o sira fan fila fɛ.
[25] Fali ye Matigi ka mɛlɛkɛ ye, a y'a gerendɛ kogo la ka Balam sen digi kogo la. Balam ye fali gosi ko kura.
[26] Matigi ka mɛlɛkɛ taaraɲɛ fɛ ka i jɔ dogodogoni dɔ la, munumunu yɔrɔ si tun tɛ a kinin fɛ wala a numan fɛ.
[27] Fali ye Matigi ka mɛlɛkɛ ye, a y'i da duguma ni Balam ye. Balam diminna ka fali gosi ni a ka bere ye.
[28] Matigi ye fali da yɛlɛ, o y'a fɔ Balam ye ko: «Ne ye mun kɛ i la, fo i ye ne gosi siɲɛ saba?»
[29] Balam ye fali jaabi ko: «Sabu i ye tulon kɛ ne la. Ni npan tun bɛ ne bolo, ne tun bɛ i faga sisan.»
[30] Fali y'a fɔ Balam ye ko: «Ne tɛ i ka fali ye wa? I tun tɛ yɛlɛn ne kan kabini i ye ne sɔrɔ fo ka na se bi ma wa? Ne delila ka ninɲɔgɔn kɛ i la wa?» A ko: «Ayi.»
[31] O tuma la Matigi ye Balamɲɛ yɛlɛ. Balam ye Matigi ka mɛlɛkɛ jɔlɛn ye sira kan, npan foosilen b'a bolo. Balam y'i biri k'a ɲɛ biri duguma.
[32] Matigi ka mɛlɛkɛ y'a fɔ a ye ko: «Mun y'a to i ye i ka fali gosi siɲɛ saba? A filɛ, ne nana ka i kunbɛn ka i ɲɛkɔrɔ tigɛ, sabu ne y'a ye ko i bɛ sira min kan, halaki sira don.
[33] Fali ye ne ye ka fara ka bɔ ne kɔrɔ siɲɛ saba. Ni a tun ma fara ka bɔ ne kɔrɔ, ne tun na i faga ka faliɲɛnama tɔ.»
[34] Balam y'a fɔ Matigi ka mɛlɛkɛ ye ko: «Ne ye jurumu kɛ katuguni ne tun m'a dɔn ko i jɔlen bɛ sira kan ka ne bali. Sisan, ni o ko man di i ye, ne na kɔsegin.»
[35] Matigi ka mɛlɛkɛ y'a fɔ Balam ye ko: «I ka taa nin cɛw fɛ, nka ne bɛ kuma min fɔ i ye, i ka o dama fɔ.» Ayiwa, Balam taara Balak ka kuntigiw fɛ.
[36] Balak y'a mɛn ko Balam sera yen minkɛ, a bɔra ka taa a kunbɛn Moab dugu la min bɛ Arnɔn da la Moab jamana dan yɔrɔ la.
[37] Balak y'a fɔ Balam ye ko: «Ne ma ci bila ka taa i wele wa? Mun y'a to i ma na ne yɔrɔ? I bonyali se tɛ ne ye wa?»
[38] Balam y'a fɔ Balak ye ko: «Ne nalen filɛ i yɔrɔ. Yala ne na se ka fɛn wɛrɛ fɔ wa? Ala mana kuma min don ne da la, ne na o de fɔ.»
[39] Balam taara Balak fɛ. U sera Kirjat-Husɔt.
[40] Balak ye nturaw ni sagajigiw faga ka kɛ saraka ye ka a sogo dɔ ci Balam ni a fɛ kuntigiw ma.
[41] Sɔgɔma da fɛ, Balak taara ni Balam ye ka yɛlɛn ka taa Bamɔt-Bal. Ka Balam to yen, a ye Israɛl mɔgɔw dɔw ye.