[1] Balam y'a fɔ Balak ye ko: «I ka saraka bɔlan wolonwula jɔ ne ye yan ka ntura wolonwula ni sagajigi wolonwula labɛn ne ye.»
[2] Balam ye min fɔ, Balak y'o kɛ. Balak ni Balam ye ntura kelen ni sagajigi kelen lase o saraka bɔlanw bɛɛ kelen-kelen kan.
[3] Balam y'a fɔ Balak ye ko: «I jɔ yan i ka saraka jenita da fɛ, ne na ne mabɔ. A dɔrɔ Matigi bɛna ne kunbɛn. Ni a ye fɛn o fɛn jira ne la, ne na o fɔ i ye.» A yɛlɛnna tintin dɔ kan.
[4] Ala nana Balam kunbɛn. Balam y'a fɔ a ye ko: «Ne ye saraka bɔlan wolonwula jɔ ka ntura kelen ni sagajigi kelen lase saraka bɔlan bɛɛ kelen-kelen kan.»
[5] Matigi ye kuma don Balam da la, a ko: «Segin ka taa Balak yɔrɔ ka nin kuma fɔ a ye.»
[6] Balam kɔseginna a yɔrɔ. A filɛ, Balak jɔlen tun bɛ a ka saraka jenita da fɛ, ani Moab kuntigiw bɛɛ.
[7] Balam ye a ka ntalen da, a ko: «Balak ye wele ka bɔ Aram jamana la, Moab masakɛ ye ne wele ka bɔ kɔrɔn fɛ kuluw yɔrɔ la, ko ne ka na ka Yakuba danga a ye. Ko ne ka dimiya ko fɔ Israɛl ma.
[8] Ala ma min danga, ne na o danga cogo di? Matigi ma dimin min kɔrɔ, ne na dimiya ko fɔ o ma cogo di?
[9] Ka ne to farakurunw kan, ne b'a ye. Ka ne to tintinw kan, neɲɛ b'a la. Siya min bɛ sigi a dan na, o don. A tɛ jate siya tɔw fɛ.
[10] Jɔn bɛ se ka Yakuba dan, a ka ca i ko buguri mugu. Jɔn bɛ se ka Israɛl tila naaninan jate? Mɔgɔ tilennenw bɛ sa cogo min na, ne ka sa ten. Ne laban ko ka kɛ u laban ko bɔɲɔgɔnko ye.»
[11] Balak y'a fɔ Balam ye ko: «I ye mun kɛ ne la sa? Ne nana n'i ye ko i ka ne juguw danga, nka a filɛ, i sinna ka dubaw kɛ u ye.»
[12] A y'a jaabi ko: «Matigi ye min don ne da la, ne man kan ka ne janto o la ka o fɔ wa?»
[13] Balak y'a fɔ Balam ye ko: «I ka na ka taa ne fɛ yɔrɔ wɛrɛ la. K'i to yen, i bɛ se ka o mɔgɔw filɛ. I na u kɔfɛ taw dɔrɔn ye, i tɛna u bɛɛ ye. I ka u danga ne ye k'i to yen.»
[14] A taara n'a ye Zofin ka foro la, o bɛ Pisiga kulu kan. A ye saraka bɔlan wolonwula jɔ ka ntura kelen ni sagajigi kelen lase saraka bɔlan bɛɛ kelen-kelen kan.
[15] Balam y'a fɔ Balak ye ko: «I jɔ yan i ka saraka jenita da fɛ, ne na taa Ala kunbɛn.»
[16] Matigi nana Balam kunbɛn ka kuma dɔw don a da la k'a fɔ a ye ko: «Segin ka taa Balak yɔrɔ ka nin kuma fɔ a ye.»
[17] Balam kɔseginna a yɔrɔ. A filɛ, Balak ani Moab kuntigiw jɔlen tun bɛ a ka saraka jenita da fɛ. Balak y'a fɔ a ye ko: «Matigi ye mun fɔ?»
[18] Balam ye a ka ntalen da, a ko: «Balak, wuli ka lamɛnni kɛ. Zipor denkɛ, i tulo majɔ ne ka kuma la.
[19] Ala tɛ mɔgɔ ye ka nkalon tigɛ, a tɛ Hadamaden ye ka nimisa. Ni a ye fɛn fɔ, a tɛna o kɛ wa? Ni a kumana, a tɛna o dafa wa?
[20] A filɛ, ne ye ci sɔrɔ ko ne ka dubaw kɛ. Ala ye duba ta, ne tɛ se ka o yɛlɛma.
[21] A ma tilenbaliya ye Yakuba la, a ma ko jugu ye Israɛl la. Matigi a ka Ala tora a fɛ, masakɛ folikan bɔra u cɛma.
[22] Ala ye u labɔ Misira jamana la, a barika bɛ i ko sigi barika.
[23] Subaaya tɛ foyi kɛ Yakuba la, dɔnbaaya ko tɛ foyi kɛ Israɛl la. Ni a fɔ waati sera, a na fɔ Yakuba ni Israɛl ko la ko: ‹Ala ye koba min kɛ Israɛl ye, o filɛ.›
[24] A filɛ, o mɔgɔw bɛ wuli i ko warabamuso, u bɛ u jɔ i ko waraba. A tɛna da sani a ka sogo minɛlen dun, ka fɛn fagalenw joli min.»
[25] Balak y'a fɔ Balam ye ko: «I kana u danga, nka i fana kana dubaw kɛ u ye fewu.»
[26] Balam ye Balak jaabi ko: «Ne m'a fɔ i ye ko, Matigi mana min fɔ ne ye, ne ka kan ka o bɛɛ kɛ wa?»
[27] Balak y'a fɔ Balam ye ko: «I ka na sa, ne na taa n'i ye yɔrɔ wɛrɛ la. A dɔrɔ Ala na sɔn i ka o mɔgɔw danga ne ye k'i to yen.»
[28] Balak taara ni Balam ye Peɔr kulu kuncɛ la, o min sinnen bɛ kungokolonba ma.
[29] Balam y'a fɔ Balak ye ko: «I ka saraka bɔlan wolonwula jɔ ne ye yan, ka ntura wolonwula labɛn ne ye yan.»
[30] Balam ye min fɔ, Balak y'o kɛ. A ye ntura kelen ni sagajigi kelen lase saraka bɔlan bɛɛ kelen-kelen kan.