[1] Israɛl sigira Sitim. Mɔgɔw y'a daminɛ ka kakalaya kɛ Moab denmusow fɛ.
[2] O denmusow ye mɔgɔw wele ka taa u fɛ saraka bɔli la u ka bato fɛnw ye. Mɔgɔw ye dumuni kɛ ka u biri olu ka bato fɛnw kɔrɔ.
[3] Israɛl tugura Bal-Peɔr nɔ fɛ. Matigi diminna Israɛl kɔrɔ.
[4] Matigi y'a fɔ Musa ye ko: «I ka mɔgɔw kuntigiw bɛɛ minɛ ka u dulon tile la Matigi ɲɛ kɔrɔ, walisa Matigi ka dimiyaba ka mabɔ Israɛl la.»
[5] Musa y'a fɔ Israɛl ka kiritigɛlaw ye ko: «Aw bɛɛ kelen-kelen ka mɔgɔ minw tugura Bal-Peɔr nɔ fɛ, aw ka olu faga.»
[6] A filɛ, Israɛl bɔnsɔn cɛ dɔ nana ni Madiankaw ka muso dɔ ye a balimaw yɔrɔ, Musa ni Israɛl bɔnsɔn jama bɛɛ ɲɛ na, ka u kasitɔ toɲɔgɔn kunbɛn finiso da la.
[7] Sarakalasebaa Aron denkɛ Eleazar denkɛ Fineɛs y'o ye minkɛ, a wulila ka bɔ jama cɛma ka tama dɔ ta a bolo.
[8] A tugura Israɛl bɔnsɔn cɛ nɔ fɛ ka don a ka finiso kɔnɔ, ka o tama turu Israɛl bɔnsɔn cɛ ni o muso fila bɛɛ la ka o muso kɔnɔbara sɔgɔ. O kɔ, fiɲɛbana jɔra Israɛl bɔnsɔn cɛma.
[9] Mɔgɔ waa mugan ni naani sara o fiɲɛbana fɛ.
[10] Matigi y'a fɔ Musa ye ko:
[11] «Sarakalasebaa Aron denkɛ Eleazar denkɛ Fineɛs ye ne ka dimiya mabɔ Israɛl bɔnsɔn la, katuguni ne ka keleya ɲɔgɔn tun b'a la.
[12] O de y'a to i k'a fɔ a ye ko ne bɛ ne ka hɛrɛ layidu ta a ye,
[13] ko a ni a bɔnsɔn na to sarakalasebaaya la kudayi, katuguni keleya tun b'a la a ka Ala kosɔn. A ye Israɛl bɔnsɔn ka jurumu kafari.»
[14] Israɛl bɔnsɔn cɛ min ni Madiankaw ka muso fagaraɲɔgɔn fɛ, o tun ye Salu denkɛ Zimri ye. Salu tun ye a bɛnbaw bɔnsɔnw kuntigi dɔ ye ka bɔ Simeɔn bɔnsɔn na.
[15] Madiankaw ka muso min fagara, o tun ye Zur denmuso Kozibi ye. A fa tun ye Madian siya bɛnbaw bɔnsɔnw kuntigi dɔ ye.
[16] O kɔ, Matigi y'a fɔ Musa ye ko:
[17] «Aw ka Madiankaw tɔɔrɔ ka u faga,
[18] k'a masɔrɔ u ye aw tɔɔrɔ ni u ka nanbaraw ye ka aw lafili Peɔr ko la ani u balimamuso Madian kuntigi denmuso Kozibi ko la, o min fagara fiɲɛbana don na Peɔr ko la.»