[1] Musa ye kuma minw fɔ Israɛl bɔnsɔn bɛɛ ye Jurdɛn ba kɔ fɛ ka u to kungokolon kɔnɔ jɛkɛnɛ la Suf kuntilenna la, Paran ni Tofɛl ni Laban ni Hazerɔt ani Di-Zahab furancɛw la, olu filɛ ninw ye.
[2] Ka bɔ Hɔrɛb ka tɛmɛn Seir kulu sira fɛ ka taa bila Kadɛs-Barnea, o ye tile tan ni kelen taama ye.
[3] Israɛl bɔli Misira, o san binaaninan kalo tan ni kelennan tile fɔlɔ la, Musa kumana Israɛl bɔnsɔn fɛ ka kɛɲɛ ni Matigi ka ci dilenw bɛɛ ye a ma.
[4] O kɛra k'a sɔrɔ a ye se sɔrɔ Amɔr masakɛ Sihon kan, o sigilen tun bɛ Hesibɔn, ka se sɔrɔ Basan masakɛ Og kan, o sigilen tun bɛ Astarɔt ani Edrei.
[5] Ka u to Jurdɛn ba kɔ fɛ Moab jamana la, Musa y'a daminɛ ka nin sariya koɲɛ fɔ.
[6] A ko: «Matigi an ka Ala kumana an fɛ Hɔrɛb k'a fɔ ko an ye sigili min kɛ nin kulu kɛrɛ fɛ, o b'a bɔ.
[7] Ko an ka an yɛlɛma ka sira minɛ ka taa Amɔr siyaw ka kulu ni a kɛrɛ fɛ jamana bɛɛ la, jɛkɛnɛ la, kulu jamana la ani kɛnɛ la jamana la, ka taa worodugu yanfan jamana la kɔgɔji da fɛ, o ye Kanankaw ka jamana ni Liban kuluw jamana ye, fo ka se baba da la, Ufrate ba kɔni.
[8] Matigi ko: ‹A filɛ, ne ye jamana bila aw ɲɛ.› Matigi y'i kali an bɛnbaw Ibrahima ni Isaka ni Yakuba ye ko a na jamana min di u ma ani u bɔnsɔn ma u kɔ, a' ye taa don o kɔnɔ k'a kɛ aw ta ye.
[9] «O waati la ne y'a fɔ aw ye ko ne kelenpe tɛ se aw kɔrɔ.
[10] Matigi aw ka Ala ye aw jiidi, aw cayara bi i ko sankolola dolow.
[11] Matigi aw bɛnbaw ka Ala ka aw caya siɲɛ waa kelen ka tɛmɛn bi ta kan, ka duba aw ye i ko a ye layidu ta aw ye cogo min na.
[12] Ne kelenpe bɛ se aw kɔrɔ ka aw ka tɔɔrɔ ni aw ka sɔsɔli muɲu cogo di?
[13] Aw ka mɔgɔ hakiliman ko dɔnna dɔw ɲɛnatɔmɔ ka bɔ aw ka siyaw la, ne na olu sigi aw kun na.
[14] Aw ye ne jaabi ko ne ye min fɔ, o bɛnna.
[15] Ne ye aw siyaw kuntigiw wele, olu minw ye mɔgɔ hakilimanw ye, dɔnniya bɛ minw na, ne ye u sigi aw kun na ka kɛ mɔgɔ waa kelen-kelen kuntigiw ni kɛmɛ-kɛmɛ kuntigiw ni biduuru-duuru kuntigiw ani tan-tan kuntigiw ye, ka kɛ aw siyaw kunnasigibaaw ye.
[16] O waati la ne y'a fɔ k'a gɛlɛya aw ka kiritigɛlaw ye ko u ka u balimaw ka kiri ko lamɛn ka kiri tilennen tigɛ u niɲɔgɔn cɛ ani u ni siginfɛw cɛ.
[17] Ko u kana kiri tigɛ ka kɛɲɛ ni mɔgɔ ye cogo ye. Ko u ka mɔgɔbaw ni mɔgɔ misɛnw lamɛn, u kana mɔgɔ bɔ mɔgɔ la. Ko u kana siran mɔgɔ siɲɛ, katuguni kiri ko ye Ala de ta ye. Kiri ko min ka bon u ma, u ka na ni o ye ne yɔrɔ, ne na o ɲɛnabɔ.
[18] Aw tun ka kan ka min kɛ o waati la, ne ye o bɛɛ fɔ aw ye.
[19] «Ayiwa, an bɔra Hɔrɛb ka nin kungokolonba siran yɔrɔ cɛ tigɛ, aw ye o min ye. An taara Amɔr siya ka kulu jamana sira fɛ, i ko Matigi an ka Ala y'a fɔ aw ye cogo min na. An sera Kadɛs-Barnea.
[20] «Ne y'a fɔ aw ye ko aw sera Amɔr siya ka kulu jamana la, Matigi an ka Ala bɛ o di an ma.
[21] A filɛ, Matigi i ka Ala ye jamana bila i ɲɛ. I ka taa a tigiya minɛ i ko Matigi i bɛnbaw ka Ala y'a fɔ i ye cogo min na. I kana siran, i ja kana tigɛ.
[22] Aw bɛɛ nana ne sɛgɛrɛ k'a fɔ ko: ‹An ka cɛ dɔw ci an ɲɛ ka jamana ko lajɛ walisa an ka kan ka tɛmɛn sira min fɛ ka se dugu minw ma, u ka olu kibaru fɔ an ye.›
[23] O miirili tun ka ɲi neɲɛ na. Ne ye mɔgɔ tan ni filaɲɛnatɔmɔ aw cɛma, cɛ kelen-kelen bɔra aw ka siyaw bɛɛ la.
[24] U taara ka kulu jamana cɛ tigɛ ka se fo Esikɔl jɛkɛnɛ la, ka o lajɛ.
[25] U ye jamana sɛnɛ fɛn dɔw ta ka na n'u ye k'u jira an na, ka u dan tigɛ ko: ‹Matigi an ka Ala bɛ jamana min di an ma, jamanaɲumanɲuman don dɛ.›
[26] O bɛɛ n'a ta aw ma sɔn ka taa, nka aw murutira Matigi aw ka Ala ka ci fɔlen ma.
[27] Aw ye dajukɔrɔ kumaw fɔ aw ka finisow kɔnɔ ko: ‹Matigi bɛ an koniya, o de kosɔn a ye an labɔ Misira jamana la walisa ka an don Amɔr siya bolo ka an halaki.
[28] An bɛ se ka taa min? An balimaw ye an fari faga k'a fɔ ko: «O mɔgɔw ye mɔgɔ belebele jamanjanw ye ka tɛmɛn an kan, u ka duguw ka bon, u ka dugu lamini kogow sera fo sankolo ma. An ye Anak bɔnsɔn fana ye yen.» ›
[29] O tuma la ne y'a fɔ ko aw ja kana tigɛ, aw kana siran u ɲɛ.
[30] Matigi aw ka Ala bɛ taa aw ɲɛ, ale yɛrɛ na kɛlɛ kɛ aw ye, i ko a ye min bɛɛ kɛ aw ye aw ɲɛ na Misira jamana la
[31] ani kungokolon kɔnɔ. Aw y'a kɔlɔsi ko Matigi aw ka Ala ye aw ta ka na ni aw ye aw ka siraw bɛɛ la fo ka na se nin yɔrɔ la i ko cɛ bɛ a denkɛ ta cogo min na.
[32] Hali o, aw jigi ma da Matigi aw ka Ala kan,
[33] o min taara aw ɲɛ aw ka sira la ka finiso jɔ yɔrɔ ɲini aw ye. Su fɛ a tun bɛ taa aw ɲɛ tasuma la, tile fɛ a tun bɛ taa aw ɲɛ kabasen na, walisa aw ka kan ka taa sira min fɛ, a ka o jira aw la.
[34] «Matigi ye aw ka kumakanw mɛn. A diminnen y'i kali ko:
[35] ‹Ne ye ne kali ko ne na jamanaɲuman min di aw bɛnbaw ma, nin tilela mɔgɔ jugu si tɛna o ye,
[36] fɔ Jefune denkɛ Kalɛb. Ale kɔni n'a ye, a ye kungokolon min taama, ne na o di a ni a bɔnsɔn ma, k'a masɔrɔ a ye Matigi kan minɛ ko bɛɛ la.›
[37] Matigi diminna ne fana kɔrɔ aw kosɔn, a ko ne fana tɛna don o jamana la.
[38] Ko ne ka baaraden, Nun denkɛ Josue na don yen. Ko ne ka ale ja gɛlɛya sabu a na o jamana tilatila Israɛl bɔnsɔn cɛ.
[39] Aw den fitininw, aw y'a fɔ minw ta fan fɛ ko, u na cɛ aw juguw fɛ, ani aw den minw tɛ ko ɲuman ni ko jugu dɔn bi, olu de na don yen. A na o jamana di olu ma, o na kɛ u ta ye.
[40] Nka aw kɔni, a' ye segin ka taa kungokolon kɔnɔ, Kɔgɔji Bilen sira fɛ.
[41] «Aw ye ne jaabi ko aw ye Matigi hakɛ ta. Ko aw na yɛlɛn ka kɛlɛ kɛ, i ko Matigi an ka Ala y'a fɔ an ye cogo min na. Aw bɛɛ kelen-kelen ye aw ka kɛlɛkɛ minanw ta, aw ye kulu kan yɛlɛnni jate ko nɔgɔman ye.
[42] Matigi y'a fɔ ne ye ko ne k'a fɔ aw ye ko, aw kana yɛlɛn ka kɛlɛ kɛ katuguni ale tɛ aw cɛma, aw kana na tiɲɛn aw juguw fɛ.
[43] Ne kumana aw fɛ, nka aw ma lamɛnni kɛ. Aw murutira ka Matigi kan bila ka aw yɛrɛw bonya ka yɛlɛn kulu kan.
[44] O tuma la Amɔr siya min sigilen bɛ o kulu kan, o bɔra ka aw kunbɛn ka aw gɛn i ko didenw bɛ mɔgɔw gɛn cogo min na. U ye aw tiɲɛn Seir fo ka taa se Horma.
[45] Aw kɔseginna, aw kasira Matigi ɲɛ kɔrɔ, nka Matigi ma aw kan lamɛn. A ma a tulo majɔ aw ka kuma la.
[46] «Ayiwa, aw sigira Kadɛs ka waati jan kɛ yen.