[1] Balam y'a ye ko a diyara Matigi ye ka duba Israɛl ye. A ma taa filɛli taamashyɛnw ɲini i ko a y'a kɛ siɲɛ fɔlɔ ni siɲɛ filanan la cogo min na, nka a y'a ɲɛ sin kungokolon fan fɛ.
[2] Balam y'a ɲɛ kɔrɔta ka Israɛl ka bugufyɛw ye ka kɛɲɛ ni u bɔnsɔnw ye. Ayiwa Ala Ni jiginna a kan.
[3] Balam y'a ka ntalen da, ko: «Beɔr denkɛ Balam ka kuma don, mɔgɔ min ɲɛ yɛlɛla, o ka kuma don,
[4] min bɛ Ala ka kumaw mɛn, ka Sebaayabɛɛtigi ka jirali fɛn ye, min bilen don a ɲɛda kan, k'a sɔrɔ a ɲɛ yɛlɛlen don, o ka kuma don.
[5] E Yakuba, i ka finisow cɛ ka ɲi haali. E Israɛl, i sigisow cɛ ka ɲi.
[6] U fɛnsɛnen bɛ i ko jɛkɛnɛw, i ko ba dala nakɔw, i ko Matigi ka aloɛs jirisun turulenw, i ko ji dala sedere jirisunw.
[7] Ji na sɔrɔ ka bɔ a ka jurufilenw la, a ka danni si na dan ji caman dala. A ka masakɛ na kɔrɔta ka tɛmɛn Agag kan, a ka masaya na bonya.
[8] Ala y'a labɔ Misira jamana la, a barika bɛ i ko sigi barika. Siya minw bɛ wuli a kama, a na olu halaki, a na u kolow karikari ka u sɔgɔ ni a ka biɲɛw ye.
[9] A ye i bugu ka i da i ko waraba, i ko warabamuso, jɔni na a lawuli? Mɔgɔ minw bɛ dubaw kɛ i ye, olu ye dubadenw ye. Minw bɛ i danga, olu dangalen bɛ.»
[10] O tuma la Balak diminna Balam kɔrɔ. A y'a tɛgɛw ciɲɔgɔn na k'a fɔ Balam ye ko: «Ne y'i wele ko i ka na ne juguw danga. A filɛ, i ye dubaw kɛ u ye fo siɲɛ saba.
[11] Wuli sa ka taa so. Ne sago tun bɛ ka bonyaba di i ma, nka Matigi ye i bali ka o sɔrɔ.»
[12] Balam ye Balak jaabi ko: «Ne m'a fɔ i ka cidenw ye wa?
[13] Ko hali ni Balak ye a ka so fa warijɛ ni sanu la ka o bɛɛ di ne ma, ne tɛ se ka tɛmɛn Matigi ka ci fɔlen kan ka ko ɲuman wala ko jugu kɛ ne yɛrɛma, ko Matigi mana min fɔ, ne na o de fɔ.
[14] Sisan a filɛ, ne bɛ taa ne ka mɔgɔw yɔrɔ. I ka na. Nin mɔgɔw na min kɛ i ka mɔgɔw la waati nataw la, ne bɛ o fɔ i ye.»
[15] Balam ye a ka ntalen da, a ko: «Beɔr denkɛ Balam ka kuma don, mɔgɔ min ɲɛ yɛlɛla, o ka kuma don,
[16] min bɛ Ala ka kumaw mɛn, min bɛ Ala Kɔrɔtalenba ka kow dɔn, min bɛ Sebaayabɛɛtigi ka jirali fɛn ye, min bilen don a ɲɛda kan k'a sɔrɔ a ɲɛ yɛlɛlen don, o ka kuma don.
[17] Ne b'a ye, nka sisan tɛ. Neɲɛ b'a la, nka a man surun ne la. Dolo dɔ na bɔ Yakuba la, masaya bere na wuli ka bɔ Israɛl la. O na Moab gosi a kun na, ka Sɛti bɔnsɔn bɛɛ halaki.
[18] Edɔm na kɛ a ta ye. A juguw ka jamana Seir fana na kɛ a ta ye. Israɛl na a fangaba jira.
[19] Min bɛ bɔ Yakuba la, o na kuntigiya kɛ, a na duguw mɔgɔ tɔ tolenw halaki.»
[20] Balam ye Amalɛk filɛ ka a ka ntalen da, ko: «Amalɛk bonyara ni siyaw bɛɛ ye, nka a laban na, a na halaki.»
[21] Balam ye Keni siya filɛ ka a ka ntalen da, ko: «I sigi yɔrɔ sabatilen don, i sigi yɔrɔ bɛ farakurun kan i ko kɔnɔɲaa,
[22] o bɛɛ n'a ta Keni siya na halaki, Asirikaw na i cɛ ka taa ni i ye jɔnya la.»
[23] Balam ye a ka ntalen da, ko: «Bɔnɛ. Jɔniɲɛnama bɛ se ka to, ni Ala ma o latigɛ?
[24] Jikan kurunbaw bɛ na ka bɔ Kitim jamana la, u na se sɔrɔ Asiri kan ka se sɔrɔ Hebɛr fana kan. U yɛrɛw na halaki.»
[25] O kɔ, Balam wulila ka kɔsegin a ka so. Balak fana taara a yɛre ka yɔrɔ la.