[1] O tuma la jama bɛɛ ye u kan bɔ ka kulo. Mɔgɔw bɛɛ sira ka kasi.
[2] Israɛl bɔnsɔn bɛɛ ye dajukɔrɔ kuma fɔ Musa ni Aron ma. Jama bɛɛ y'a fɔ u ye ko: «Ni an tun sara Misira jamana la, wala ni an tun sara nin kungokolon yɛrɛ kɔnɔ, o tun ka fisa.
[3] Mun y'a to Matigi bɛ na ni an ye nin jamana la, walisa an ka faga ni npan ye yan? An musow ni an denw na cɛ an juguw fɛ. A man fisa an ka segin ka taa Misira jamana la wa?»
[4] U y'a fɔɲɔgɔn ye ko: «A' ye na an ka kuntigi dɔ sigi an kun na ka kɔsegin Misira jamana la.»
[5] Musa ni Aron y'u bi ka u ɲɛ biri duguma Israɛl bɔnsɔn jama bɛɛ lajɛlenɲɛ kɔrɔ.
[6] Nun denkɛ Josue ni Jefune denkɛ Kalɛb ye u ka finiw fara, olu tun ye jamana kolajɛbaa dɔw ye.
[7] U y'a fɔ Israɛl bɔnsɔn jama bɛɛ ye ko: «An taara jamana min ko lajɛ, o ka ɲi kosɛbɛ.
[8] Ni an ko diyara Matigi ye, a na an ladon o jamana la k'a di an ma. A falen bɛ nɔnɔ ni di la fo ka woyo.
[9] Nka aw kana muruti Matigi ma, aw ja kana tigɛ o jamana mɔgɔw ɲɛ. K'a masɔrɔ u na kɛ an ka dumuni fɛn ye. U ka bato fɛnw ye u bila, Matigi bɛ an fɛ. Aw kana siran u ɲɛ.»
[10] Jama bɛɛ y'a fɔ ko u ka bon ni kabakurunw ye ka u faga, nka Matigi nɔɔrɔ y'i jira Israɛl bɔnsɔn bɛɛ la ka bɔɲɔgɔn kunbɛn finiso kɔnɔ.
[11] Matigi y'a fɔ Musa ye ko: «Nin mɔgɔw na to ka ne mafiɲɛya fo tuma jumɛn? Hali k'a sɔrɔ ne ye taamashyɛn caman kɛ u cɛma ka ne barika jira u la, u tɛna sɔn ka da ne la wa?
[12] Ne na u faga ni fiɲɛbana ye ka u halaki, ka i kɛ siyaba barikama ye ka tɛmɛn olu kan.»
[13] Musa y'a fɔ Matigi ye ko: «Nka i ye nin mɔgɔw labɔ Misiraka minw cɛma ni fangaba ye, olu na o kibaru mɛn,
[14] ka o ko lakali nin jamana mɔgɔw ye. U y'a dɔn ko e Matigi bɛ nin mɔgɔw cɛma, ko e Matigi bɛ i yɛrɛ jira u la, ko i ka kabasen jɔlen bɛ u kun na, ko i bɛ u ɲɛ minɛ kabasen na tile fɛ ka u ɲɛ minɛ kabasen tasumama la su fɛ.
[15] Ni i ye nin mɔgɔw halaki i ko cɛ kelen, siya minw ye i tɔgɔba kibaru mɛn, olu n'a fɔ ko:
[16] ‹Matigi tun y'i kali ko a na jamana min di nin mɔgɔw ma, a ma se ka u ladon yen, o de kosɔn a y'u faga kungokolon kɔnɔ.›
[17] Ayiwa, Matigi, ne b'i deli sisan i ka i fanga jira ni bonyaba ye, i ko i y'a fɔ cogo min na ko:
[18] ‹Matigi tɛ dimin joona, a ka makari ka bon. A bɛ mɔgɔw ka tilenbaliya ni u ka hakɛw yafa, nka a tɛ jo di jalakitigi ma. A bɛ faw ka tilenbaliya hakɛ bɔ u denw la fo ka se u bɔnsɔn yɛlɛma ko sabanan ni a naaninan ma.›
[19] Ne b'i deli, i ka nin mɔgɔw ka tilenbaliya yafa u ma ka kɛɲɛ ni i ka makariba ye, i ko i yafara nin mɔgɔw ma cogo min na kabini Misira jamana la fo ka na se sisan ma.»
[20] Matigi ko: «Ne yafara u ma i ko i y'a deli ne fɛ cogo min na.
[21] O bɛɛ n'a ta, ne ɲɛnama tɔgɔ kosɔn, dugukolo bɛɛ na fa Matigi nɔɔrɔ la.
[22] O mɔgɔw ye ne nɔɔrɔ ni ne ka taamashyɛn kabakoma kɛlenw ye Misira jamana la ani kungokolon kɔnɔ, o kɔ, ka ne kɔrɔbɔ siɲɛ tan, ka u ban ka ne ka kuma lamɛn.
[23] O de kosɔn ne ye ne kali u bɛnbaw ye ko ne na jamana min di u ma, u si tɛna o ye. Mɔgɔ minw tɛ ne jate fɛn ye, olu si tɛna a ye fewu.
[24] Nka dusu sifa wɛrɛ tun bɛ ne ka baaraden Kalɛb kɔnɔ. A ye ne kan minɛ ko bɛɛ la, o de y'a to a taara jamana min ko lajɛ, ne na a ladon yen. O na kɛ a bɔnsɔn ta ye.
[25] Ayiwa, Amalɛk bɔnsɔn ni Kanankaw sigilen bɛ jɛkɛnɛ la. Sini aw ka aw yɛlɛma ka taa kungokolon kɔnɔ, Kɔgɔji Bilen fan fɛ.»
[26] Matigi y'a fɔ Musa ni Aron ye ko:
[27] «Nin jama ka jugu. U bɛ dajukɔrɔ kuma fɔ ne ma, ne na to ka u ko muɲu fo tuma jumɛn? Israɛl bɔnsɔn bɛ dajukɔrɔ kuma fɔ ne ma, ne ye olu mɛn.
[28] Aw k'a fɔ u ye ko, Matigi ko: ‹Neɲɛnama tɔgɔ kosɔn, aw ye min fɔ ne tulo kɔrɔ, ne na o kɛ aw la.
[29] Aw minw bɛɛ danna k'a daminɛ san mugan mɔgɔw la fo ka taa se u ɲɛ mɔgɔw ma, aw minw ye dajukɔrɔ kuma fɔ ne ma, aw na sa nin kungokolon kɔnɔ.
[30] Ne tun ye ne kali ko ne na aw ladon jamana min kɔnɔ ka sigi yen, aw si tɛna don yen fɔ Jefune denkɛ Kalɛb ni Nun denkɛ Josue.
[31] Aw denw, aw y'a fɔ olu minw ko la ko u na cɛ u juguw fɛ, ne na olu ladon yen. Aw banna jamana min na, olu na o cogo dɔn.
[32] Aw kɔni, aw na sa nin kungokolon kɔnɔ.
[33] Aw denw na kɛ bagan gɛnnaw ye kungokolon kɔnɔ san binaani kɔnɔ, ka aw ka kanntanya sɛgɛn muɲu fo ni aw bɛɛ sara kungokolon kɔnɔ tuma min na.
[34] Aw ye tile binaani kɛ ka jamana ko lajɛ cogo min na, o cogo la aw ka tilenbaliya kow na kɛ aw kun san binaani kɔnɔ, san kelen bɛ kɛ tile kelen kosɔn. Aw n'a dɔn ko ne mabɔra aw la.
[35] Ne, Matigi kumana. Nin jama jugu minw ye u lajɛ ne kama, ne na o ko bɛɛ kɛ u la. U na halaki nin kungokolon kɔnɔ, u na sa yan.›»
[36] Musa ye cɛ minw ci ka taa jamana ko lajɛ, ni u kɔseginnen ye o jamana tɔgɔ jugu fɔ, ka jama bɛɛ bila dajukɔrɔ kuma fɔ la Musa ma,
[37] o cɛ minw ye jamana tɔgɔ jugu fɔ, olu sara Matigi ɲɛ kɔrɔ bana jugu fɛ.
[38] Cɛ minw taara jamana ko lajɛ, Nun denkɛ Josue ni Jefune denkɛ Kalɛb dɔrɔnɲɛnama tora olu la.
[39] Musa ye o kow bɛɛ lakali Israɛl bɔnsɔn ye, o mɔgɔw ɲɛnasisira kosɛbɛ.
[40] U solila ka wuli ko u bɛ yɛlɛn ka taa kulu kan. U ko: «An filɛ yan. Matigi kumana jamana min ko la, an na taa yen, k'a masɔrɔ an ye jurumu kɛ.»
[41] Musa ko: «Mun y'a to aw bɛ ban Matigi ka ci fɔlen ma? O ko tɛ se kaɲɛ.
[42] Aw kana taa, sabu Matigi tɛ aw cɛma. Ni o kɛra, aw juguw na aw gosi ka aw bi.
[43] Amalɛk bɔnsɔn ni Kanankaw bɛ aw ɲɛ, aw na faga npan fɛ, katuguni aw seginna kɔ ka Matigi bila, o de kosɔn Matigi tɛna kɛ aw fɛ.»
[44] U ye kunkolo gɛlɛya kɛ ka yɛlɛn ka taa kulu kan, nka Matigi ka layidu wagande ni Musa ma wuli ka bɔ bugufyɛ la.
[45] O tuma la Amalɛk bɔnsɔn ni Kananka minw sigilen tun bɛ o kulu kan, olu jiginna ka u gosi ka u tiɲɛn kosɛbɛ ka u gɛn fo ka taa se Horma.