[1] Matigi y'a fɔ Musa ye ko
[2] a ka nin ci fɔ Israɛl bɔnsɔn ye ko: «Ni aw donna Kanan jamana la tuma min na, jamana min na kɛ aw ciyɛn ye, o filɛ nin ye, o ye Kanan jamana ye ka kɛɲɛ ni a danw ye.
[3] Aw worodugu yanfan dan na daminɛ Zen kungokolon la fo ka taa se Edɔm jamana ma Kɔgɔji Misɛn kun na kɔrɔn yanfan fɛ
[4] ka yɛlɛn ka taa Akirabim tintin worodugu yanfan fɛ ka tɛmɛn ka taa Zen, ka taa se Kadɛs-Barnea worodugu yanfan fɛ, ka tɛmɛn ka taa Hazar-Adar ka taa se Azimɔn ma.
[5] A na bɔ Azimɔn ka munumunu ka taa Misira kɔ la, ka taa bila Kɔgɔjiba la.
[6] «Aw tilebi yanfan dan na kɛ Kɔgɔjiba ye, o na kɛ aw tilebi yanfan dan ye.
[7] «Aw saheli yanfan dan filɛ nin ye: Ka bɔ Kɔgɔjiba la ka taa se Hor kulu ma,
[8] ka bɔ Hor kulu la ka taa se Hamat donda la, ka taa Zedad,
[9] ka tɛmɛn ka taa Zifrɔn ka taa bila Hazar-Enan. O ye saheli yanfan dan ye.
[10] «Aw kɔrɔn yanfan dan na bɔ Hazar-Enan ka taa Sefam.
[11] A na bɔ Sefam ka jigin ka taa Ribila, o bɛ Ayin kɔrɔn yanfan fɛ, ka jigin ka taa Kinerɛt ba kɔrɔn yanfan fɛ,
[12] ka jigin ka taa Jurdɛn ba da la ka taa bila Kɔgɔji Misɛn na. «O ye aw ka jamana ye ka kɛɲɛ ni a fan bɛɛ dan yɔrɔw ye.»
[13] Musa ye ci fɔ Israɛl bɔnsɔn ye ko: «Aw na jamana min tilatila ni kala ye, o don. Matigi y'a fɔ ko a ka di siya kɔnɔntɔn ani siya tilancɛ ma.
[14] Rubɛn bɔnsɔn siya ni Gad bɔnsɔn siya ka kɛɲɛ ni u bɛnbaw bɔnsɔnw ye, ani Manase siya tilancɛ ye u ciyɛn sɔrɔ ka ban.
[15] O siya fila ni siya tilancɛ ye u ciyɛn sɔrɔ Jurdɛn ba kɔ fɛ, Jeriko kuntilenna la, kɔrɔn yanfan fɛ.»
[16] Matigi y'a fɔ Musa ye ko:
[17] «Mɔgɔ minw na jamana tilatila aw cɛ, olu tɔgɔw filɛ: sarakalasebaa Eleazar ni Nun denkɛ Josue.
[18] Aw ka kuntigi kelen-kelen bɔ siyaw bɛɛ kelen-kelen na fana, walisa u ka jamana tilatilali koɲɛnabɔ.
[19] O mɔgɔw tɔgɔw filɛ ninw ye: «Juda siya la, Jefune denkɛ Kalɛb.
[20] «Simeɔn bɔnsɔn siya la, Amihud denkɛ Samuɛl.
[21] «Benjamɛn siya la, Kisilon denkɛ Elidad.
[22] «Dan bɔnsɔn siya la, Jogili denkɛ kuntigi Buki.
[23] «Yusufu denkɛw la, Manase bɔnsɔn siya la, Efɔd denkɛ kuntigi Haniɛl.
[24] «Efrayim bɔnsɔn siya la, Sifitan denkɛ kuntigi Kemuɛl.
[25] «Zabulɔn bɔnsɔn siya la, Parnak denkɛ kuntigi Elizafan.
[26] «Isakar bɔnsɔn siya la, Azan denkɛ kuntigi Paltiɛl.
[27] «Asɛr bɔnsɔn siya la, Selomi denkɛ kuntigi Ahihud.
[28] «Nefitali bɔnsɔn siya la, Amihud denkɛ kuntigi Pedahɛl.»
[29] Matigi y'a fɔ mɔgɔ minw ye ko u ka Kanan jamana tilatila Israɛl bɔnsɔn cɛ, olu don.