[1] Matigi kumana Musa fɛ ko:
[2] «Ne bɛ Kanan jamana min di Israɛl bɔnsɔn ma, i ka mɔgɔ dɔw ci ka taa o ko lajɛ. I ka cɛ kelen-kelen bɔ u bɛnbaw siyaw bɛɛ la ka u ci. U bɛɛ ka kɛ u ka siyaw kuntigiw ye.»
[3] Musa ye u ci ka bɔ Paran kungokolon kɔnɔ ka kɛɲɛ ni Matigi ka ci fɔlen ye. O mɔgɔw bɛɛ tun ye Israɛl bɔnsɔn kuntigiw ye.
[4] U tɔgɔw filɛ ninw ye: Min bɔra Rubɛn siya la, o tun ye Zakur denkɛ Samua ye.
[5] Min bɔra Simeɔn siya la, o tun Hori denkɛ Safat ye.
[6] Min bɔra Juda siya la, o tun ye Jefune denkɛ Kalɛb ye.
[7] Min bɔra Isakar siya la, o tun ye Yusufu denkɛ Jigual ye.
[8] Min bɔra Efrayim siya la, o tun ye Nun denkɛ Hose ye.
[9] Min bɔra Benjamɛn siya la, o tun ye Rafu denkɛ Palti ye.
[10] Min bɔra Zabulɔn siya la, o tun ye Sodi denkɛ Gadiɛl ye.
[11] Min bɔra Yusufu denkɛ Manase siya la, o tun ye Susi denkɛ Gadi ye.
[12] Min bɔra Dan siya la, o tun ye Gemali denkɛ Amiɛl ye.
[13] Min bɔra Asɛr siya la, o tun ye Mikaɛl denkɛ Setur ye.
[14] Min bɔra Nefitali siya la, o tun ye Vofisi denkɛ Nakubi ye.
[15] Min bɔra Gad siya la, o tun ye Maki denkɛ Guɛl ye.
[16] Musa ye cɛ minw ci ka taa jamana ko lajɛ, u tɔgɔw filɛ olu ye. Musa ye Nun denkɛ Hose tɔgɔ da ko Josue.
[17] Musa ye u ci ka taa Kanan jamana ko lajɛ. A y'a fɔ u ye ko: «Aw ka taa jamana worodugu yanfan fɛ. O kɔ, aw ka yɛlɛn kuluw jamana la.
[18] Aw ka o jamana cogo filɛ, ani o jamana mɔgɔw, yala ni u barika ka bon wala ni u barika ka dɔgɔ, yala ni u ka ca, wala ni u man ca.
[19] Aw ka u sigi jamana filɛ, yala ni a ka ɲi wala ni a manɲi, ani u ka duguw, yala ni kogo tɛ u la wala ni kɛlɛkunbɛn kogow kɛra ka u lamini.
[20] Aw ka dugukolo cogo filɛ, yala ni hinɛma don wala ni hinɛma tɛ, yala ni jiriw b'a la wala ni jiriw t'a la. A' ye aw ja gɛlɛya ka na ni o jamana sɛnɛ fɛn dɔw ye.» Ayiwa, o tun ye rezɛn fɔlɔw mɔ waati ye.
[21] U taara ka jamana ko lajɛ, ka bɔ Zen kungokolon kɔnɔ fo ka taa se Rehɔb ma, ka taa se Hamat sira la.
[22] U tɛmɛnna jamana worodugu yanfan fɛ ka taa se Heborɔn. U y'a sɔrɔ Anak bɔnsɔn Ahiman ni Sesai ni Talmai tun bɛ yen. Heborɔn dugu sigili san wolonwulanan la Misira jamana Zoan sigira.
[23] U sera Esikɔl jɛkɛnɛ la ka rezɛn sun bolo kelen tigɛ, rezɛn tusuu kelen tun bɛ o la. U ye o dulon bere la ka o da cɛ fila kan na. U nana ni gerenati sun mɔ ni toro mɔ dɔw fana ye.
[24] U ye o yɔrɔ tɔgɔ da ko Esikɔl jɛkɛnɛ, o rezɛn tusuu kosɔn, Israɛl bɔnsɔn ye o min tigɛ yen.
[25] Tile binaani tɛmɛnnen kɔ, u kɔseginna ka bɔ o jamana ko lajɛ yɔrɔw la.
[26] U selen, u taara Musa ni Aron ani Israɛl bɔnsɔn jama bɛɛ ɲɛ kɔrɔ Kadɛs, o bɛ Paran kungokolon kɔnɔ. U ye u dantigɛ olu ni jama bɛɛ ɲɛ na ka o jamana jiri mɔ jira u la.
[27] U ka dantigɛli kuma filɛ nin ye Musa ye ko: «I ye an ci ka taa jamana min na, an sera yen. Tiɲɛ la, o falen bɛ nɔnɔ ni di la fo ka woyo. O jamana jiri mɔ dɔw filɛ.
[28] O bɛɛ n'a ta, o jamana mɔgɔw barika ka bon, u ka duguw ka bon haali, kɛlɛkunbɛn kogow bɛ u la. Ka fara o bɛɛ kan, an ye Anak bɔnsɔn ye yen.
[29] Amalɛk bɔnsɔn sigilen bɛ o jamana worodugu yanfan fɛ. Hɛti bɔnsɔn ni Jebuskaw ani Amɔr siya sigilen bɛ kuluw jamana la. Kanankaw sigilen bɛ kɔgɔji fan na ani Jurdɛn ba da la.»
[30] Ka mɔgɔw to Musa kɔrɔfɔli la, Kalɛb ye mɔgɔ da gosi, a ko: «An ka wuli sisan ka o jamana minɛ k'a kɛ an ta ye, katuguni an bɛ se a la.»
[31] Nka cɛ minw tun taara a fɛ, olu ko: «An tɛ se ka taa ka nin mɔgɔw kɛlɛ, k'a masɔrɔ u barika ka bon an ta ye kosɛbɛ.»
[32] U tun taara jamana min ko lajɛ, u ye o kibaru jugu fɔ Israɛl bɔnsɔnɲɛ na, ko: «An ye jamana min cɛ tigɛ k'a ko lajɛ, o bɛ a kɔnɔ mɔgɔw faga. An ye cɛ minw ye yen, olu bɛɛ ye mɔgɔ jamanjanw ye.
[33] An ye mɔgɔ kunbabaw ye yen, Anak bɔnsɔn don, o siya bɛɛ ye mɔgɔ kunbabaw ye. An kɛra an yɛrɛw ɲɛ na i ko ntɔnw, an kɛra i ko ntɔnw olu fanaɲɛ na.»