[1] Mariyama ni Aron ye Musa kɔrɔfɔ a muso Etiopika kosɔn, k'a masɔrɔ a tun ye Etiopika muso dɔ furu.
[2] U ko: «Matigi bɛ kuma Musa kelenpe da la wa? A tɛ kuma an fana da la wa?» Matigi y'o mɛn.
[3] Ayiwa, Musa tun ye mɔgɔ sabalilen ye ka tɛmɛn dugukolo kan mɔgɔw bɛɛ kan.
[4] O yɔrɔ nin bɛɛ, Matigi y'a fɔ Musa ni Aron ani Mariyama ye ko: «Aw mɔgɔ saba bɛɛ ka taa ɲɔgɔn kunbɛn finiso da la.» U saba bɛɛ taara yen.
[5] Matigi jiginna kabasen na ka i jɔ finiso da la. A ye Aron ni Mariyama wele, u fila gɛrɛla a la.
[6] A ko: «A' ye ne ka kuma lamɛn sa. Ni kira dɔ bɛ aw cɛma, ne bɛ ne yɛrɛ jira a la jirali fɛn na, ne bɛ kuma a fɛ sugo la.
[7] Nka ne ka baaraden Musa tɛ ten. Dannamɔgɔ don ne ka so bɛɛ kɔnɔ.
[8] Ne bɛ kuma ale fɛ da ni da k'a jɛya. Ne tɛ kuma a fɛ ntalenw la. Ale bɛ Matigi cogo ye. O de kosɔn mun y'a to aw ma siran ka ne ka baaraden Musa kɔrɔfɔ?»
[9] Matigi diminna u kɔrɔ, a taara.
[10] O kabasen wulila ka bɔ finiso kun na. A filɛ, kuna bɔra Mariyama la, a fari jɛlen tun don i ko bugurijɛ. Aron y'i yɛlɛma Mariyama fan fɛ, a filɛ kuna tun b'a la.
[11] O tuma la Aron y'a fɔ Musa ye ko: «Ne matigi, ne b'i deli. An ye hakilintanya ko kɛ ka jurumu kɛ. I kan'a to o jalaki ka to an kun.
[12] Ne b'i deli, a kana kɛ i ko den salen bangelen min farisogo tilancɛ tolilen don a bange tuma la.»
[13] Musa kasira Matigi nɔ fɛ ko: «Ala, ne b'i deli, i k'a kɛnɛya.»
[14] Matigi y'a fɔ Musa ye ko: «Ni a fa tun bɛ daji dɔrɔn tu a ɲɛda kan, a tun tɛna maloya tile wolonwula kɔnɔ wa? Da ka tugu a da la bugufyɛ kɔ fɛ ka tile wolonwula kɛ. O kɔ, a ka ladon ko kura.»
[15] Mariyama datugura bugufyɛ kɔ fɛ tile wolonwula kɔnɔ. Mɔgɔw ma wuli ka taa sani Mariyama ka ladon tun.
[16] O kɔ, mɔgɔw wulila ka bɔ Hazerɔt ka taa ka u ka buguw turu Paran kungokolon kɔnɔ.