[1] Matigi y'a fɔ Aron ye ko: «Yɔrɔ senuma tilenbaliya kow doni na kɛ e ni i denkɛw ni i fa ka so kun. Tilenbaliya ko minw bɛ kɛ i ka sarakalasebaaya la, e ni i denkɛw ka o doni ta.
[2] I ka i balimaw, i bɛnba Levi siya madon i la, walisa u ka fara i kan ka baara kɛ i ye, nka i ni i denkɛw ka to seereya finisoɲɛ fɛ.
[3] I bɛ ko min kalifa u ma, ani finiso kalifa, u ka o bɛɛ kɛ, nka u kana gɛrɛ yɔrɔ senuma minanw ni saraka bɔlan na, walisa u ni aw kana na sa.
[4] U ka fara i kan kaɲɔgɔn kunbɛn finiso kɔlɔsi a baara bɛɛ la. Dunan si kana gɛrɛ aw la.
[5] Aw ka yɔrɔ senuma ni saraka bɔlan kɔlɔsi, walisa dimiya kana bi Israɛl bɔnsɔn kan tun.
[6] A filɛ, ne ye aw balimaw Levitew ɲɛnatɔmɔ ka bɔ Israɛl bɔnsɔn tɔw cɛma. U dira Matigi ma, u dira aw ma walisa kaɲɔgɔn kunbɛn finiso baara kɛ.
[7] E ni i denkɛw ka aw ka sarakalasebaaya baara kɛ saraka bɔlan ko bɛɛ la ani so cɛtigɛ fini kɔ fɛ fɛnw ko la. O ye aw niyɔrɔ baara ye. Ne ye sarakalasebaaya baara di aw ma nili fɛn ye. Ni dunan fɛn o fɛn gɛrɛla a la, o ka faga.»
[8] Matigi y'a fɔ Aron ye ko: «A filɛ, Israɛl bɔnsɔn bɛ saraka minw kɔrɔta ne ye ka bɔ u ka fɛn saniyalenw la, ne ye olu bɛɛ di i ma. Ne ye u di i ni i denkɛw ma ka kɛ aw niyɔrɔ ye, sariya wulibali don.
[9] Fɛn senuma senumaw tɔ minw na kɛ i ta ye ne niyɔrɔ ta jeninen kɔ, olu filɛ ninw ye: u ka saraka fɛnw, o kɔrɔ, u bɛ na ni mugu sarakaw ni jurumu yafa sarakaw ani jalaki yafa saraka minw bɛɛ ye ne ma. O fɛn senuma senumaw bɛɛ ye i ni i denkɛw ta ye.
[10] Aw ka olu dun yɔrɔ senuma la. Cɛw bɛɛ ka u dun. Aw ka u jate fɛn senumaw ye.
[11] Min na kɛ i ta ye fana, o filɛ nin ye: Israɛl bɔnsɔn bɛ saraka kɔrɔtata minw bɔ u ka saraka fɛnw la, u ka saraka finifanataw bɛɛ, ne ye olu di i ni i denkɛw ni i denmusow ma, sariya wulibali don. I ka so kɔnɔ mɔgɔ jɛlenw bɛɛ ka u dun.
[12] U bɛ suman kura kun fɔlɔ minw di Matigi ma, ne ye olu di i ma, tulu bɛɛ laɲuman ni rezɛn mɔ bɛɛ laɲuman ani sɛnɛ suman bɛɛ laɲuman.
[13] Suman kura kun fɔlɔ minw bɛ di sɔrɔ u ka jamana la, ni u bɛ na n'u ye ka di Matigi ma, olu ye i ta ye. I ka so kɔnɔ mɔgɔ jɛlenw bɛɛ ka o dun.
[14] Fɛn o fɛn bilara kudayi Matigi ye Israɛl cɛma, o na kɛ i ta ye.
[15] Fɛnɲɛnama den fɔlɔ minw bɛ di Matigi ma, olu bɛɛ na kɛ i ta ye bagan fara mɔgɔ kan. O bɛɛ n'a ta, mɔgɔ den fɔlɔw ka kunmabɔ. Bagan nɔgɔlen den fɔlɔw ka kunmabɔ.
[16] K'a daminɛ u si kalo kelen na, i ka u kunmabɔ ka kɛɲɛ ni i ka jate ye, o ye warijɛ sikle duuru ye, ka kɛɲɛ ni yɔrɔ senuma ka sikle ye, o ye gera mugan ye.
[17] Nka i kana misiden fɔlɔw ni sagaden fɔlɔw ani baden fɔlɔw kunmabɔ, olu ye fɛn senumaw ye. I ka olu joli seriseri saraka bɔlan kan ka u kɛn jeni ka kɛ tasuma la saraka ye, o suma ka di Matigi ye.
[18] Olu sogo na kɛ i ta ye i ko disi finifanata ani kininfɛ woro.
[19] Israɛl bɔnsɔn bɛ fɛn senuma minw kɛ saraka kɔrɔtataw ye ka u di Matigi ma, ne ye olu bɛɛ di i ni i denkɛw ni i denmusow ma. O ye layidu wulibali ye Matigi ɲɛ kɔrɔ e ni i bɔnsɔn bɛɛ ye kudayi.»
[20] Matigi y'a fɔ Aron ye ko: «I kana ciyɛn si ta u ka jamana la, i kana niyɔrɔ si sɔrɔ u cɛma. Ne ye i niyɔrɔ ni i ciyɛn ye Israɛl bɔnsɔn cɛma.
[21] Levi bɔnsɔn bɛ baara min kɛɲɔgɔn kunbɛn finiso ko la, ne ye Israɛl ka jaka bɔlen bɛɛ di u ma o kosɔn ka kɛ u ciyɛn ye.
[22] Israɛl bɔnsɔn kana gɛrɛɲɔgɔn kunbɛn finiso la tun, walisa u kana na jurumu kɛ ka sa.
[23] Levitew kaɲɔgɔn kunbɛn finiso baara kɛ, u ka tilenbaliya na kɛ u yɛrɛw kun. U tɛna ciyɛn si ta Israɛl bɔnsɔn cɛma, o na kɛ sariya wulibali ye aw bɔnsɔn nataw bɛɛ kan.
[24] Israɛl bɔnsɔn bɛ jaka minw bɔ ka di Matigi ma saraka kɔrɔtata ye, ne ye olu di Levitew ma ciyɛn ye. O de kosɔn ne y'a fɔ u ye ko u tɛna ciyɛn si ta Israɛl bɔnsɔn cɛma.»
[25] Matigi kumana Musa fɛ ko
[26] a k'a fɔ Levitew ye ko: «Ne ye Israɛl bɔnsɔn ka jaka min di aw ma ciyɛn ye, ni aw bɛ o minɛ u fɛ tuma min na, aw ka jaka bɔ o la ka kɛ saraka kɔrɔtata ye Matigi ye.
[27] Aw ka saraka na jate aw ye i ko suman min bɛ bɔ gendekɛnɛ la ani diwɛn min bɛ bɔ rezɛn ji bɔ yɔrɔ la.
[28] Aw mana jaka minw minɛ Israɛl bɔnsɔn fɛ, aw ka saraka kɔrɔtata bɔ olu bɛɛ la Matigi ye. Aw mana saraka min bɔ Matigi ye, aw ka o di sarakalasebaa Aron ma.
[29] Aw ka saraka kɔrɔtataw bɔ Matigi ye ka bɔ nili fɛn dilenw bɛɛ la aw ma. Aw bɛ min di Matigi ma, aw ka o bɔ o fɛnw bɛɛ laɲuman la.
[30] I k'a fɔ Levitew ye ko, ni aw ye o fɛnw bɛɛ laɲuman kɔrɔta tuma min na, o tɔ na jate aw ta ye, i ko min bɔra gendekɛnɛ la ani min bɔra rezɛn ji bɔ yɔrɔ la.
[31] Yɔrɔ o yɔrɔ ka di aw ye, aw ni aw so mɔgɔw ka o dun yen. Aw bɛɲɔgɔn kunbɛn finiso baara min kɛ, o sara don.
[32] Ni aw ye o fɛnw bɛɛ laɲuman kɔrɔta, o tuma la jurumu tɛna jate aw kun, aw tɛna Israɛl bɔnsɔn ka fɛn senumaw nɔgɔ, aw tɛna sa.»