[1] Mɔgɔw ye dajukɔrɔ kuma fɔ Matigi tulo kɔrɔ. Matigi y'o mɛn, a diminna. Matigi ka tasuma manana u cɛma ka bugufyɛ fan kelen jeni.
[2] O tuma la mɔgɔw kasira Musa nɔ fɛ. Musa ye Matigi deli, tasuma sara.
[3] U ye o yɔrɔ tɔgɔ da ko Tabeera, katuguni Matigi ka tasuma manana u cɛma yen.
[4] Siya wɛrɛ mɔgɔ minw tun bɛ Israɛl mɔgɔw cɛma, dumuni nege gwanna olu la kosɛbɛ. Israɛl bɔnsɔn fana kasira ko kura k'a fɔ ko: «Jɔn na sogo di an ma an k'a dun?
[5] An tun bɛ jɛgɛ minw dun gwansan Misira jamana la, an hakili jiginna olu la, ani konkonburuw ni nzɛrɛw ni pwarow ni jabaw ani layi.
[6] Sisan an sɔn jalen don. Foyi tɛ yan. An ɲɛ tɛ foyi la nin manɛ kelen kɔ.»
[7] O manɛ bɔlen tun bɛɲɔkisɛ fɛ, a jɛman tun don i ko malokisɛ.
[8] Mɔgɔw tun bɛ yaala ka o cɛ. U tun b'a si wugu la, wala k'a susu kolon na, k'a dɔ tobi daga kɔnɔ, k'a dɔ kɛ ŋɔmi ye. A timiya bɔlen bɛ ŋɔmi tuluma fɛ.
[9] Ngomi dara bugufyɛ la su fɛ tuma min na, o ni manɛ nanaɲɔgɔn fɛ.
[10] Musa ye mɔgɔw kasikan mɛn u ka gwaw la. Cɛw bɛɛ kelen-kelen tun bɛ kasi u ka finisow da la. Matigi diminna kosɛbɛ.
[11] O ma diya Musa ye. A y'a fɔ Matigi ye ko: «Mun y'a to i ye i ka jɔnkɛ tɔɔrɔ? Mun y'a to ne ma nɛɛma sɔrɔ i ɲɛ kɔrɔ, fo i ye nin mɔgɔw bɛɛ doni da ne kan?
[12] Ne de ye nin mɔgɔw bɛɛ kɔnɔ ta wa? Ne de ye u bange wa? fo e k'a fɔ ne ye ko ne ka u ta ne disi la i ko den lamarabaa bɛ den ta cogo min na. I ye i kali an bɛnbaw ye jamana min ko la ko i na o di u ma, i y'a fɔ ko, ne ka taa ni nin mɔgɔw ye yen.
[13] Ne bɛ sogo sɔrɔ min k'a di nin mɔgɔw bɛɛ ma? Sabu u bɛ kasi ne nɔ fɛ ko sogo ka di u ma u k'a dun.
[14] Ne kelen tɛ se nin mɔgɔw bɛɛ kɔrɔ, o doni ka girin ne ma.
[15] Sani ka o bɛɛ da ne kan, ne b'i deli, ni ne ye nɛɛma sɔrɔ i ɲɛ kɔrɔ, i ka ne faga walisa ne kana na ne yɛrɛɲɛni kow ye.»
[16] Matigi y'a fɔ Musa ye ko: «I bɛ Israɛl cɛkɔrɔbaw ni u ka kuntigi minw dɔn, i ka cɛ biwolonwulaɲɛnatɔmɔ olu la ka u lajɛ ne ɲɛ kɔrɔ. I ni u ka naɲɔgɔn kunbɛn finiso da la k'aw jɔɲɔgɔn fɛ yen.
[17] Ne na jigin ka kuma i fɛ yen. Ala Ni min bɛ i kan, ne na o dɔ di olu ma. I ni olu ka nin mɔgɔw doni taɲɔgɔn fɛ, walisa i kelen kana o doni ta.
[18] I k'a fɔ mɔgɔw ye ko: ‹Aw ka aw yɛrɛ saniya sani sini cɛ. Aw na sogo dun katuguni aw kasira Matigi tulo kɔrɔ ko jɔn na sogo di aw ma, aw k'a dun? K'a sɔrɔ aw tun bɛ hɛrɛ la Misira jamana la. O de y'a to Matigi na sogo di aw ma, aw n'a dun.
[19] Aw na o dun, tile kelen ko tɛ, tile fila ko tɛ, tile duuru ko tɛ, tile tan ko tɛ, tile mugan ko tɛ,
[20] fo kalo kelen bɛɛ kɔnɔ, fo a ka bɔ aw nunwow fɛ. Aw naɲigin a la kosɛbɛ, katuguni Matigi min bɛ aw cɛma, aw banna o la, ka kasi a ɲɛ kɔrɔ ko, mun y'a to aw bɔra Misira jamana la?›»
[21] Musa ko: «Ne bɛ mɔgɔ minw cɛma, olu ye cɛ waa kɛmɛ wɔɔrɔ de ye. E ko i na sogo di u ma, ko u n'a dun kalo kelen bɛɛ kɔnɔ.
[22] Misiw ni bagan misɛnw ka faga u ye walisa ka u wasa wa? Walima mɔgɔw ka kɔgɔjila jɛgɛw bɛɛ minɛ walisa ka u wasa wa?»
[23] Matigi ye Musa jaabi ko: «Yala Matigi bolo surunyara wa? Sisan i n'a ye, ne ye min fɔ, ni o na kɛ wala ni o tɛna kɛ.»
[24] Musa bɔra yen ka taa ka Matigi ka kuma lase mɔgɔw ma. O kɔ, a ye mɔgɔw bɛɛ ka cɛkɔrɔba biwolonwula bɛɛ lajɛ yɔrɔ kelen na ka u sigi ka finiso lamini.
[25] Matigi jiginna kabasen na ka kuma Musa fɛ. Ala Ni min tun b'a kan, a ye o dɔ di o cɛkɔrɔba biwolonwula ma. Kabini Ala Ni sigira u kan, u ye kiraya kɛ, nka o kɔ, u m'a kɛ tun.
[26] Cɛ fila tora bugufyɛ la, kelen tɔgɔ ko Eldad, dɔ tɔgɔ ko Medad. Ala Ni jiginna olu fana kan. U tɔgɔw tun sɛbɛnna tɔw fɛ, nka u ma taa finiso da la. U ye kiraya kɛ k'u to bugufyɛ la.
[27] Kamalen dɔ bolila ka taa a fɔ Musa ye ko: «Eldad ni Medad bɛ kiraya kɛ ka u to bugufyɛ la.»
[28] Nun denkɛ Josue tun ye Musa ka baaraden ye kabini a denmisɛnma. O ye kuma ta ko: «Ne matigi Musa, i k'a fɔ ko u kana o kɛ.»
[29] Musa y'a jaabi ko: «Keleya bɛ i la ne kosɔn wa? Ala m'a kɛra, Matigi ka mɔgɔw bɛɛ ka kɛ kiraw ye. Matigi ka a Ni jigin u bɛɛ kan.»
[30] O kɔ, Musa ni cɛkɔrɔbaw bɔra yen ka taa bugufyɛ la.
[31] Ayiwa, Matigi ye fiɲɛba ci ka bɔ kɔgɔji yanfan fɛ, ka na ni kɔnɔ sifa dɔ ye. U tun bɛ yankan bugufyɛ la ka caya ka kɛ tile kelen taama sira janya ye bugufyɛ lamini fan bɛɛ la. U ni dugukolo cɛ janya tun ye mɛtɛrɛ kelenɲɔgɔn ye.
[32] Mɔgɔw wulila ka kɔnɔw cɛ o tile bɛɛ ni o su bɛɛ ni o dugusajɛ tile bɛɛ kɔnɔ. Mɔgɔ min ta sɔrɔlen tun ka dɔgɔ tɔw bɛɛ ta ye, o ta kɛra segiɲɛ biduuruɲɔgɔn ye. U ye u fɛnsɛ u yɛrɛw ye bugufyɛ lamini la.
[33] Ka o sogo to mɔgɔw da la, sani u ka a ɲimi, Matigi diminna mɔgɔw kɔrɔ haali. Matigi ye mɔgɔw gosi ni bana jugu ye.
[34] U ye o yɔrɔ tɔgɔ da ko Kiborɔt-Hatava k'a masɔrɔ dumuni nege gwanna mɔgɔ minw na, olu suw donna yen.
[35] Mɔgɔw wulila ka bɔ Kiborɔt-Hatava ka taa Hazerɔt ka u sigi yen.