[1] Matigi kumana Musa fɛ ko:
[2] «I ka kuma Israɛl bɔnsɔn fɛ ka bere kelen minɛ u bɛnbaw bɔnsɔnw kuntigiw bɛɛ kelen-kelen fɛ ka kɛɲɛ ni u bɛnbaw bɔnsɔnw ye, o kɔrɔ, bere tan ni fila. I ka u bɛɛ kelen-kelen tɔgɔ sɛbɛn u ka berew kan,
[3] ka Aron tɔgɔ sɛbɛn Levi ka bere kan. Bere kelen-kelen ka kɛ u bɛnbaw bɔnsɔnw kuntigiw bɛɛ kelen-kelen fɛ.
[4] I ka o berew bilaɲɔgɔn kunbɛn finiso kɔnɔ seereya wagandeɲɛ fɛ, ne bɛ aw kunbɛn yɔrɔ min na.
[5] Ne ye cɛ min ɲɛnatɔmɔ, o ka bere na nugu. Israɛl bɔnsɔn bɛ dajukɔrɔ kuma minw fɔ aw ma, ne na olu dabila.»
[6] Musa kumana Israɛl bɔnsɔn fɛ. U kuntigiw bɛɛ ye berew di a ma, kuntigi kelen, bere kelen, ka kɛɲɛ ni u bɛnbaw bɔnsɔnw ye. Bere tan ni fila tun don. Aron ka bere tun bɛ u tɔw taw cɛma.
[7] Musa ye o berew bila Matigi ɲɛ kɔrɔ seereya finiso kɔnɔ.
[8] O dugusajɛ, Musa donna seereya finiso kɔnɔ tuma min na, a filɛ, Levi tɔgɔ tun bɛ Aron ka bere min kan, o tun nugura. A ye nugukun bɔ ka feere ka amandeden kɛ fo ka mɔ.
[9] Musa ye o berew bɛɛ ta ka bɔ Matigi ɲɛ kɔrɔ ka taa n'u ye Israɛl bɔnsɔn yɔrɔ. O cɛw ye u filɛ, u bɛɛ kelen-kelen ye u ka berew ta.
[10] Matigi y'a fɔ Musa ye ko: «I ka Aron ka bere kɔsegin k'a bila seereyaɲɛ fɛ. O ka mara ka kɛ taamashyɛn ye murutilenw kosɔn, walisa i ka u ka dajukɔrɔ kumaw ban ka bɔ ne ɲɛ kɔrɔ, walisa u kana na sa.»
[11] Musa ye o kɛ ka kɛɲɛ ni Matigi ka ci fɔlen ye a ye.
[12] Israɛl bɔnsɔn y'a fɔ Musa ye ko: «A filɛ, an halakira, an bɛɛ sara, ɔwɔ, an bɛɛ satɔ don.
[13] Mɔgɔ o mɔgɔ bɛ gɛrɛ Matigi ka finiso la, o bɛ sa. O tuma la an bɛɛ ka halaki wa?»