[1] Matigi kumana Musa ni Aron fɛ ko:
[2] «Israɛl bɔnsɔn cɛw bɛɛ kelen-kelen ka u ka buguw turu u yɛrɛw ka taamashyɛnw kɔrɔ, u bɛnbaw bɔnsɔnw ka darapow kɔrɔ. U ka u ka buguw turu ka u ɲɛ sinɲɔgɔn kunbɛn finiso ma ka a lamini.
[3] «Minw na u ka buguw turu kɔrɔn yanfan fɛ, tilebɔ fan fɛ kɔni, olu filɛ ninw ye: Juda ka bugufyɛ ni a ka darapo ni a ka kɛlɛbolo. Juda bɔnsɔn kuntigi Aminadab denkɛ Nakisɔn na a ka buguw turu yen,
[4] ani a ka kɛlɛbolo mɔgɔ dannenw cɛ waa biwolonwula ni naani ani cɛ kɛmɛ wɔɔrɔ.
[5] Isakar siya na u ka buguw turu ale kɛrɛ fɛ, Isakar bɔnsɔn kuntigi Zuar denkɛ Netaneɛl
[6] ani a ka kɛlɛbolo mɔgɔ dannenw cɛ waa biduuru ni naani ani cɛ kɛmɛ naani.
[7] O kɔ, Zabulɔn siya na u ka buguw turu, Zabulɔn bɔnsɔn kuntigi Helɔn denkɛ Eliab
[8] ani a ka kɛlɛbolo mɔgɔ dannenw cɛ waa biduuru ni wolonwula ani cɛ kɛmɛ naani.
[9] Juda ka bugufyɛ la mɔgɔ dannenw bɛɛ lajɛlen kɛra cɛ waa kɛmɛ ni bisegin ni wɔɔrɔ ani cɛ kɛmɛ naani ye, ka kɛɲɛ ni u ka kɛlɛbolow ye. Olu fɔlɔ na wuli ka sira minɛ.
[10] «Minw na u ka buguw turu worodugu yanfan fɛ, olu filɛ ninw ye: Rubɛn ka bugufyɛ ni a ka darapo ni a ka kɛlɛbolo. Rubɛn bɔnsɔn kuntigi Sedeur denkɛ Elizur na a ka buguw turu yen,
[11] ani a ka kɛlɛbolo mɔgɔ dannenw cɛ waa binaani ni wɔɔrɔ ani cɛ kɛmɛ duuru.
[12] Simeɔn siya na u ka buguw turu ale kɛrɛ fɛ, Simeɔn bɔnsɔn kuntigi Zurisadai denkɛ Selumiɛl
[13] ani a ka kɛlɛbolo mɔgɔ dannenw cɛ waa biduuru ni kɔnɔntɔn ani cɛ kɛmɛ saba.
[14] O kɔ, Gad siya na u ka buguw turu, Gad bɔnsɔn kuntigi Duɛl denkɛ Eliasaf
[15] ani a ka kɛlɛbolo mɔgɔ dannenw cɛ waa binaani ni duuru ni kɛmɛ wɔɔrɔ ani cɛ biduuru.
[16] Rubɛn ka bugufyɛ la mɔgɔ dannenw bɛɛ lajɛlen kɛra cɛ waa kɛmɛ ni biduuru ni kelen ni kɛmɛ naani ani cɛ biduuru ye, ka kɛɲɛ ni u ka kɛlɛbolow ye. Olu na kɛ wulibaa filanan ye ka sira minɛ.
[17] «Olu taalen kɔ, Levitew bugufyɛ la mɔgɔ minw bɛ cɛmancɛ la, olu niɲɔgɔn kunbɛn finiso na wuli. Buguw bɛ sigi cogo min na, u na wuli o cogo la. Cɛw bɛɛ kelen-kelen ka taa u ka yɔrɔw la u ka darapow kɔrɔ.
[18] «Minw na u ka buguw turu tilebi yanfan fɛ, olu filɛ ninw ye: Efrayim ka bugufyɛ ni a ka darapo ni a ka kɛlɛbolo. Efrayim bɔnsɔn kuntigi Amihud denkɛ Elisama na a ka buguw turu yen,
[19] ani a ka kɛlɛbolo mɔgɔ dannenw cɛ waa binaani ani cɛ kɛmɛ duuru.
[20] Manase siya na u ka buguw turu ale kɛrɛ fɛ, Manase bɔnsɔn kuntigi Pedazur denkɛ Gamaliɛl
[21] ani a ka kɛlɛbolo mɔgɔ dannenw cɛ waa bisaba ni fila ani cɛ kɛmɛ fila.
[22] O kɔ, Benjamɛn siya na u ka buguw turu, Benjamɛn bɔnsɔn kuntigi Gideoni denkɛ Abidan
[23] ani a ka kɛlɛbolo mɔgɔ dannenw cɛ waa bisaba ni duuru ani cɛ kɛmɛ naani.
[24] Efrayim ka bugufyɛ la mɔgɔ dannenw bɛɛ lajɛlen kɛra cɛ waa kɛmɛ ni segin ani cɛ kɛmɛ ye, ka kɛɲɛ ni u ka kɛlɛbolow ye. Olu na kɛ wulibaa sabanan ye ka sira minɛ.
[25] «Minw na u ka buguw turu saheli yanfan fɛ, olu filɛ ninw ye: Dan ka bugufyɛ ni a ka darapo ni a ka kɛlɛbolo. Dan bɔnsɔn kuntigi Amisadai denkɛ Ahiezɛr na a ka buguw turu yen,
[26] ani a ka kɛlɛbolo mɔgɔ dannenw cɛ waa biwɔɔrɔ ni fila ani cɛ kɛmɛ wolonwula.
[27] Asɛr siya na u ka buguw turu a kɛrɛ fɛ, Asɛr bɔnsɔn kuntigi Okran denkɛ Pagiɛl
[28] ani a ka kɛlɛbolow mɔgɔ dannenw cɛ waa binaani ni kelen ani cɛ kɛmɛ duuru.
[29] O kɔ, Nefitali siya na u ka buguw turu, Nefitali bɔnsɔn kuntigi Enan denkɛ Ahira
[30] ani a ka kɛlɛbolo mɔgɔ dannenw cɛ waa biduuru ni saba ani cɛ kɛmɛ naani.
[31] Dan ka bugufyɛ la mɔgɔ dannenw bɛɛ lajɛlen kɛra cɛ waa kɛmɛ ni biduuru ni wolonwula ani cɛ kɛmɛ wɔɔrɔ ye. Olu na kɛ wulibaa laban ye ka kɛɲɛ ni u ka darapo ye.»
[32] Olu ye Israɛl bɔnsɔn dannenw ye ka kɛɲɛ ni u bɛnbaw bɔnsɔnw ye. Bugufyɛw la mɔgɔ dannenw ka kɛɲɛ ni u ka kɛlɛbolow ye, olu bɛɛ lajɛlen kɛra cɛ waa kɛmɛ wɔɔrɔ ni saba ni kɛmɛ duuru ani cɛ biduuru ye.
[33] Levitew sen ma don o jate la Israɛl bɔnsɔn tɔw fɛ, i ko Matigi y'a fɔ Musa ye cogo min na.
[34] Matigi tun ye min fɔ Musa ye, Israɛl bɔnsɔn ye o bɛɛ kɛ. U ye u ka buguw turu u ka darapow kɔrɔ. U wulila ka sira minɛ o cogo la fana, u bɛɛ kelen-kelen ka kɛɲɛ ni u ka siya ni u bɛnbaw ka gwaw ye.