[1] Matigi kumana Musa fɛ ko
[2] a k'a fɔ Israɛl bɔnsɔn ye ko: «Ni cɛ dɔ wala muso dɔ y'i dafale, nazireɛn ka dafale kɔni, ko a na a yɛrɛ bila Matigi ye,
[3] a ka fara diwɛn ni minnifɛn farinmaw la. A kana diwɛn kumun min wala minnifɛn farinma kumulen wala rezɛn ji. A kana rezɛn kɛnɛ wala rezɛn jalen dun.
[4] A ka dafale waati bɛɛ kɔnɔ, a kana rezɛn sun fɛn si dun, k'a ta a kisɛ la fo ka taa bila a fara la.
[5] A y'i dafale ko a na a yɛrɛ bila waati min bɛɛ kɔnɔ, sirifɛ kana se a kunkolo ma. A y'a yɛrɛ bila Matigi ye waati min bɛɛ kɔnɔ, a senuma ka to fo o waati ka dafa. A k'a kunsigi to yen, o ka janya.
[6] A y'a yɛrɛ bila Matigi ye waati min bɛɛ kɔnɔ, a kana don su si kan o donw la.
[7] Hali ni a fa wala a ba wala a balimakɛ wala a balimamuso sara, a kana a yɛrɛ nɔgɔ olu su ko la, sabu a ye a yɛrɛ bila Ala ye, o bilali ko bɛ a kun.
[8] A senuma don Matigi ye a ka dafale waati bɛɛ kɔnɔ.
[9] «Ni mɔgɔ dɔ sinna ka sa a kɛrɛ fɛ, ni a dafale kunsigi nɔgɔra o fɛ, o ye a saniya don ye. A ka a kun di a tile wolonwulanan don.
[10] A tile seginnan don, a ka na ni ntubanni fila wala jɛnɛntubanden fila ye sarakalasebaa yɔrɔ, ɲɔgɔn kunbɛn finiso da la.
[11] Sarakalasebaa ka u la kelen lase ka kɛ jurumu yafa saraka ye, k'a to kelen kɛ saraka jenita ye, k'a ka jurumu kafari a nɔgɔli ko la su kosɔn. O don na, a na a kun bila Matigi ye tun.
[12] A na a ka dafale waati bila Matigi ye ko kura. A ka na ni san kelen sagajigi ye k'a kɛ jalaki yafa saraka ye. A ka waati bilalen fɔlɔ tɛ jate, k'a masɔrɔ o dafale ko tiɲɛnna.
[13] «Ni nazireɛn ka dafale waati dafara tuma min na, o sariya filɛ nin ye. U ka na n'a ye ɲɔgɔn kunbɛn finiso da la.
[14] A ka saraka min bɔ Matigi ye, o filɛ nin ye: san kelen sagajigi fiɲɛntan kelen, o ka kɛ saraka jenita ye. San kelen sagamuso fiɲɛntan kelen, o ka kɛ jurumu yafa saraka ye. Sagajigi fiɲɛntan kelen, o ka kɛ nisɔndiya saraka ye,
[15] ani cɛrɛɲɛ kelen buuru misɛn tulumaw ni furufuru fununbaliw, tulu funfunnen u kan, ani u mugu saraka ni u saraka bɔntaw.
[16] Sarakalasebaa ka na ni o fɛnw bɛɛ ye Matigi ɲɛ kɔrɔ ka a ka jurumu yafa saraka ni a ka saraka jenita lase.
[17] A ka nisɔndiya saraka sagajigi ni cɛrɛɲɛ kelen buuru fununbali lase Matigi ma. Sarakalasebaa ka o mugu saraka bɔnta fana lase.
[18] O tuma la o nazireɛn ka a kunsigi bilalen diɲɔgɔn kunbɛn finiso da la ka a kunsigi bilalen ta ka o bila tasuma la nisɔndiya saraka jukɔrɔ.
[19] Sarakalasebaa ka sagajigi kaman balabalalen ta ka buuru misɛn fununbali kun kelen bɔ cɛrɛ kɔnɔ ka furufuru fununbali kelen ta ka u don nazireɛn bolo, a kunsigi bilalen dilen kɔ.
[20] O kɔ, sarakalasebaa ka u finifana Matigi ɲɛ kɔrɔ. Fɛn senuma don, o ye sarakalasebaa ta ye, ani disi finifanata ni woro kɔrɔtata. O bɛɛ kɔ, nazireɛn bɛ se ka diwɛn min.
[21] «O ye sariya ye nazireɛn dafale ko la. A ka nili fɛn min bɔ Matigi ye a ka nazireɛnya kosɔn, o sariya fana don. Ni a bolo bɛ se fɛn wɛrɛ la, a ka o fara a kan. Min fɔra a ka dafale ko la ka kɛɲɛ ni nazireɛnya sariya ye, a ka o kɛ.»
[22] Matigi kumana Musa fɛ ko
[23] a k'a fɔ Aron ni a denkɛw ye ko: «Aw ka dubaw kɛ Israɛl bɔnsɔn ye nin cogo la. Aw k'a fɔ ko:
[24] ‹Matigi ka duba i ye ka i mara.
[25] ‹Matigi ka a ɲɛda kɛnɛ bɔ i ye ka hinɛ i la.
[26] ‹Matigi ka a ɲɛ jɔ i la ka hɛrɛ di i ma.›
[27] «U ka dubaw kɛ ne tɔgɔ la Israɛl bɔnsɔn ye o cogo la. Ne na duba u ye.»