[1] Matigi y'a fɔ Musa ye ko:
[2] «I ka Israɛl bɔnsɔn hakɛ bɔ Madiankaw la. O kɔ, i na kafo i ka mɔgɔw kan.»
[3] Musa y'a fɔ mɔgɔw ye ko: «Aw la cɛ dɔw ka kɛlɛkɛ minanw ta ka taa Madian kama ka a kɛlɛ ka Matigi ka hakɛ bɔ ko lase Madian ma.
[4] Aw ka cɛ waa kelen-kelen bɔ Israɛl siyaw bɛɛ kelen-kelen na ka u ci ka taa kɛlɛ la.»
[5] U ye cɛ waa kelen-kelen ɲɛnatɔmɔ siyaw bɛɛ kelen-kelen na ka bɔ Israɛl mɔgɔ waa caman cɛma. O kɛra cɛ waa tan ni fila ye minw labɛnnen tun bɛ ni kɛlɛkɛ minanw ye.
[6] Musa ye o siyaw bɛɛ la cɛ waa kelen-kelen ci ka taa kɛlɛ la, ka sarakalasebaa Eleazar denkɛ Fineɛs bila ka taa u fɛ. Yɔrɔ senuma minanw ni mɔgɔ lawuli buru fyɛtaw tun b'a bolo.
[7] U taara Madian kɛlɛ i ko Matigi y'a fɔ Musa ye cogo min na, ka olu cɛw bɛɛ faga.
[8] U ye Madian masakɛ duuru fana faga, olu tɔgɔw ko Evi ni Rekɛm ni Zur ni Hur ani Reba. U ye Beɔr denkɛ Balam fana faga ni npan ye.
[9] Israɛl bɔnsɔn ye Madiankaw musow ni u ka denmisɛnw cɛ, ka u ka bagan kunbaw ni u ka bagan misɛnw ni u ka nafolo tɔw bɛɛ cɛ.
[10] U ye u ka duguw ni u ka bugufyɛw bɛɛ jeni ni tasuma ye.
[11] U ye nafolo ni fɛn cɛlenw bɛɛ ta, bagan fara mɔgɔ kan,
[12] ka taa ni mɔgɔ minɛlenw ni fɛn cɛlenw ni nafolo ye Musa ni sarakalasebaa Eleazar ani Israɛl bɔnsɔn jama yɔrɔ bugufyɛ la, Moab jɛkɛnɛ la Jurdɛn ba kɔ fɛ Jeriko kuntilenna la.
[13] Musa ni sarakalasebaa Eleazar ani jama la kuntigiw bɛɛ bɔra ka taa u kunbɛn bugufyɛ kɔ fɛ.
[14] Kɛlɛbolo kuntigiw ni cɛ waa kelen-kelen kuntigiw ni cɛ kɛmɛ-kɛmɛ kuntigi minw kɔseginna ka bɔ kɛlɛ yɔrɔ la, Musa diminna olu kɔrɔ
[15] k'a fɔ u ye ko: «Aw ye o muso bɛɛ ɲɛnama to wa?
[16] A filɛ, olu de ye Israɛl bɔnsɔn nɛgɛn ka Matigi hakɛ ta Peɔr ko la Balam ka kuma kosɔn, fo fiɲɛbana wulila Matigi ka jama cɛma.
[17] O de kosɔn aw ka denmisɛn cɛmaw bɛɛ faga, ani cɛ dara muso minw fɛ.
[18] Nka npogotigi minw ma cɛ dɔn, aw ka olu bɛɛ ɲɛnama to aw yɛrɛw ye.
[19] «Aw ka to bugufyɛ kɔ fɛ ka tile wolonwula kɛ. Aw la mɔgɔ minw ye mɔgɔ dɔ faga wala minw bɛɛ magara mɔgɔ fagalenw su la, olu ka u saniya tile sabanan ni tile wolonwulanan don, ka aw ka mɔgɔ minɛlenw fana saniya.
[20] Finiw ni woloma fɛnw ni fɛn o fɛn dilara ni ba si ye ani minan jirimaw, aw ka olu bɛɛ saniya.»
[21] Kɛlɛkɛ cɛ minw tun taara kɛlɛ la, sarakalasebaa Eleazar y'a fɔ olu ye ko: «Matigi ye sariya min fɔ Musa ye, o filɛ nin ye:
[22] Sanu ni warijɛ ni nsiranɛgɛ ni nɛgɛfin ni lɛtɛn ani ntilɛku,
[23] tasuma tɛ fɛn o fɛn tiɲɛn, aw ka o don tasuma la k'a saniya, nka olu ka saniya ni saniyali ji fana ye. Min tɛ se ka don tasuma la, aw ka o don ji la.
[24] Aw ka aw ka finiw ko tile wolonwulanan don na, aw na jɛya. O kɔ, aw bɛ se ka don bugufyɛ la.»
[25] Matigi y'a fɔ Musa ye ko:
[26] «E ni sarakalasebaa Eleazar ani jama la gwatigiw ka fɛn cɛlenw jate, bagan fara mɔgɔ kan.
[27] Kɛlɛkɛ cɛ minw taara kɛlɛ la, aw ka fɛn cɛlenw tila fila ye olu ni jama bɛɛ cɛ.
[28] Kɛlɛkɛ cɛ minw taara kɛlɛ la, i ka dɔ bɔ olu niyɔrɔ la k'a di Matigi ma, kelen-kelen ka bɔ mɔgɔw ni misiw ni faliw ni bagan misɛnw kɛmɛ duuru-duuru bɛɛ la.
[29] I ka o fɛnw bɔ olu niyɔrɔ la ka u di sarakalasebaa Eleazar ma ka kɛ saraka kɔrɔtata ye Matigi ye.
[30] A tɔ tila kelen min ye Israɛl bɔnsɔn ta ye, i ka kelen-kelen bɔ o biduuru-duuru la, mɔgɔw ni misiw ni faliw ni sagaw, baganw bɛɛ, ka olu di Levitew ma, olu minw bɛ Matigi ka finiso kɔlɔsi.»
[31] Matigi ye min fɔ Musa ye, Musa ni sarakalasebaa Eleazar ye o kɛ.
[32] Kɛlɛkɛ cɛw ka fɛn cɛlenw tɔ tolen tun ye bagan misɛn waa kɛmɛ wɔɔrɔ ni waa biwolonwula ani waa duuru ye,
[33] ani misi waa biwolonwula ni fila,
[34] ani fali waa biwɔɔrɔ ni kelen,
[35] ani mɔgɔ waa bisaba ni fila, olu tun ye musow ye, cɛ ma da minw fɛ.
[36] Mɔgɔ minw tun taara kɛlɛ la, fɛn cɛlenw tilancɛ min kɛra olu ta ye, o tun ye bagan misɛn waa kɛmɛ saba ni bisaba ani waa wolonwula ni kɛmɛ duuru ye.
[37] Bagan misɛn kɛmɛ wɔɔrɔ ni biwolonwula ni duuru bɔra olu la ka di Matigi ma.
[38] Misi tun ye waa bisaba ni wɔɔrɔ ye. Misi biwolonwula ni fila bɔra olu la ka di Matigi ma.
[39] Fali tun ye waa bisaba ni kɛmɛ duuru ye. Fali biwɔɔrɔ ni kelen bɔra olu la ka di Matigi ma.
[40] Mɔgɔ tun ye waa tan ni wɔɔrɔ ye. Mɔgɔ bisaba ni fila bɔra olu la ka di Matigi ma.
[41] Musa ye Matigi ta di sarakalasebaa Eleazar ma, i ko Matigi y'a fɔ Musa ye cogo min na. Matigi ka saraka kɔrɔtata don.
[42] Tilancɛ min kɛra Israɛl bɔnsɔn ta ye, Musa ye o ni kɛlɛkɛ cɛw ta fara ka bɔɲɔgɔn na.
[43] Jama niyɔrɔ tun ye bagan misɛn waa kɛmɛ saba ni bisaba ni waa wolonwula ani kɛmɛ duuru ye,
[44] ani misi waa bisaba ni wɔɔrɔ,
[45] ani fali waa bisaba ni kɛmɛ duuru,
[46] ani mɔgɔ waa tan ni wɔɔrɔ.
[47] O tilancɛ min tun ye Israɛl bɔnsɔn niyɔrɔ ye, Musa ye kelen-kelen bɔ o biduuru-duuru la, bagan fara mɔgɔ kan, ka olu di Levitew ma, olu minw bɛ Matigi ka finiso kɔlɔsi, i ko Matigi y'a fɔ Musa ye cogo min na.
[48] Kɛlɛkɛ cɛ waa caman kuntigiw ni cɛ waa kelen-kelen kuntigiw ni cɛ kɛmɛ-kɛmɛ kuntigiw gɛrɛla Musa la
[49] k'a fɔ a ye ko: «Kɛlɛkɛ cɛ minw bɛ an kɔrɔ, i ka jɔnw ye olu dan. Hali cɛ kelen ma an jɛ.
[50] O de y'a to an bɛɛ kelen-kelen ye sanu fɛn minw cɛ, an bɛ olu bɛɛ di Matigi ma, nili fɛn don, sanu juru minw bɛ don bolo la ani bolokanna sanuw ni bolonkɔnila sanuw ni tulola sanuw ani sanu kanna juruw. An bɛ olu di ka an ka jurumu kafari Matigi ɲɛ kɔrɔ.»
[51] Musa ni sarakalasebaa Eleazar ye o sanu fɛn dilalenw bɛɛ minɛ o kuntigiw fɛ.
[52] Cɛ waa kelen-kelen kuntigiw ni cɛ kɛmɛ-kɛmɛ kuntigiw ye sanu min di Matigi ma saraka kɔrɔtata ye, o bɛɛ giriya tun ye sikle waa tan ni wɔɔrɔ ani sikle kɛmɛ wolonwula ni biduuru ye.
[53] Kɛlɛkɛ cɛw bɛɛ kelen-kelen tora ni u yɛrɛw ka fɛn cɛlenw ye.
[54] Musa ni sarakalasebaa Eleazar ye cɛ waa kelen-kelen kuntigiw ni cɛ kɛmɛ-kɛmɛ kuntigiw ka sanu minɛ ka taa n'a ye ɲɔgɔn kunbɛn finiso kɔnɔ. O ka kɛ Israɛl bɔnsɔn hakilijigin fɛn ye Matigi ɲɛ kɔrɔ.