[1] O tuma la Job ye Matigi jaabi ko:
[2] Ne y'a dɔn ko i bɛ se ka fɛn bɛɛ kɛ, ko fɛn si tɛ se ka i bali.
[3] Mɔgɔ min bɛ ko latigɛlen dogo ni ko dɔnbaliya ye, o ye jɔn ye? Ɔwɔ, ne ma ko minw faamu, ne ye olu fɔ. O ko ye kabako ye, u ka bon ne ma, ne ma u dɔn.
[4] I tulo majɔ ko kura, ne na kuma. Ne na i ɲininka, i ka ne jaabi.
[5] Ne tulo tun ye i ko mɛn, nka sisan ne ɲɛ y'i ye.
[6] O de kosɔn ne bɛ ne yɛrɛ jalaki ka nimisa ka buguri ni bugurijɛ bɔn ne kan.
[7] Ayiwa Matigi tilalen kɔ kuma la Job fɛ tuma min na, Matigi y'a fɔ Temanka Elifaz ye ko: «Ne dusu diminna e ni i terikɛ fila kɔrɔ k'a masɔrɔ aw ma kuma ne ko la ni tiɲɛ ye i ko ne ka jɔnkɛ Job y'a kɛ cogo min na.
[8] Ayiwa sisan aw ka ntura wolonwula ani sagajigi wolonwula minɛ ka taa ne ka jɔnkɛ Job sɛgɛrɛ ka saraka jenitaw faga aw yɛrɛw kosɔn. Ne ka jɔnkɛ Job na ne deli aw ye. Ne tɛna aw sara ka kɛɲɛ ni aw ka hakilintanya ye Job kelenpe kosɔn, k'a masɔrɔ aw ma tiɲɛ fɔ ne ko la i ko ne ka jɔnkɛ Job y'a kɛ cogo min na.»
[9] Ayiwa Elifaz min bɔra Teman ani Bildad ka bɔ Sua ani Zofar ka bɔ Naama, olu taara Matigi ka ci fɔlen kɛ. Matigi sɔnna Job ka delili ma.
[10] Job tilalen kɔ Ala delili la a terikɛw ye, Matigi ye Job segin a cogo kɔrɔ la ka a ka fɛn fɔlɔw bɛɛ sigi yɔrɔma fila-fila di a ma.
[11] A balimakɛw ni a balimamusow ani minw tun y'a dɔn ka kɔrɔ, olu bɛɛ taara a yɔrɔ la. Olu ye dumuni kɛ a fɛ a ka so kɔnɔ. Matigi ye tɔɔrɔ minw lase a ma, a y'a dusu saalo olu bɛɛ kosɔn. U bɛɛ kelen-kelen ye warijɛ kelen ani sanu bololanɛgɛ kelen di a ma.
[12] Ayiwa, Matigi dubara Job laban ye ka tɛmɛn a daminɛ waati ta kan kosɛbɛ. A ye saga waa tan ni naani ni ɲaamɛ waa wɔɔrɔ ni ntura waa fila ani falimuso waa kelen sɔrɔ.
[13] A ye denkɛ wolonwula ani denmuso saba fana sɔrɔ.
[14] A ye denmuso fɔlɔ tɔgɔ da ko Jemima, ka denmuso filanan tɔgɔ da ko Kezia, ka denmuso sabanan tɔgɔ da ko Kerɛn-Hapuk.
[15] Job denmusow bɔɲɔgɔnko muso cɛ ɲuman tun tɛ jamana si la. Job ye u niyɔrɔ ciyɛn di u ma u balimakɛw cɛma.
[16] Job ye san kɛmɛ ni binaani kɛ o kow bɛɛ kɛlen kɔ. A y'a denw ni a mɔdenw ye fo ka taa se a bɔnsɔn naaninan ma.
[17] Ayiwa Job kɔrɔlen sara, a ye si jan sɔrɔ.