[1] Ayiwa o cɛ saba ye Job jaabili dabila k'a masɔrɔ a y'a yɛrɛ jate mɔgɔ tilennen ye.
[2] Barakɛl denkɛ Elihu min bɔra Buz, Ram ka gwa la, o diminna Job kɔrɔ kosɛbɛ k'a masɔrɔ a ye jo di a yɛrɛ ma Ala ɲɛ kɔrɔ.
[3] Elihu diminna Job terikɛ saba fana kɔrɔ k'a masɔrɔ u ma se ka Job jaabi, nka halio u ye Job jalaki.
[4] Ayiwa Elihu tun b'a fɛ ka kuma Job fɛ, nka a ye makɔnɔli kɛ k'a masɔrɔ u tɔw tun ka kɔrɔ ale ye.
[5] Nka Elihu y'a ye ko jaabili tɛ o cɛ saba si fɛ tuma min na, a diminna kosɛbɛ.
[6] O tuma la Barakɛl denkɛ Elihu min bɔra Buz, o ko: Ne ye denmisɛn ye, aw dun kɔrɔla, o de kosɔn ne ye ne makun. Ne tun bɛ siran ka ne ka miirili fɔ aw ye.
[7] Ne ko, minw ye si jan sɔrɔ, olu ka kuma, olu ka san caman sɔrɔli na hakilitigiya jira u la.
[8] Nka ni bɛ mɔgɔ ɲɛnamaya, Sebaayabɛɛtigi dafiɲɛ bɛ u kɛ hakilitigiw ye.
[9] Kɔrɔya tɛ mɔgɔ kɛ hakilitigi ye, cɛkɔrɔbaya tɛ a to mɔgɔ ka faamuli kɛ.
[10] O de kosɔn ne ko, aw ka ne lamɛn, ne fana na ne ka ko faamulenw jira aw la.
[11] A filɛ, ne ye muɲuli kɛ ka aw ka kumaw lamɛn. Ne ye ne tulo majɔ aw ka jo sɔrɔli kumaw la. Ne ye aw ka kumaw lamɛn fo ka u laban.
[12] Ne ye ne hakili sigi ka aw ka kumaw lamɛn, o bɛɛ n'a ta aw si ma se ka kuma ban Job da la, aw si ma se ka a jaabi.
[13] Aw kan'a fɔ ko: «An ye hakilitigiya sɔrɔ.» Ala dɔrɔn de bɛ se ka Job da tugu, mɔgɔ tɛ se.
[14] A ma a ka kuma ɲɛ sin ne ma, ne tɛna a jaabi aw ta cogo la.
[15] A filɛ, u kabakoyara, u ma jaabili kɛ tun! Kuma banna u da la.
[16] Ne ye makɔnɔli kɛ, o bɛɛ n'a ta u tɛ kuma. U bɛ u jɔ, u tɛ jaabili kɛ.
[17] Ne na ne ka jaabili kɛ. Ne fana na ne ka miirili jira.
[18] K'a masɔrɔ kuma caman bɛ ne fɛ ka fɔ, ne dusu bɛ ne ɲɔni ka kuma.
[19] Ne kɔnɔ fara i ko diwɛn foroko dantan, a bɛ ɲini ka ci i ko diwɛn foroko kura.
[20] Ayiwa ne na kuma walisa ne ka lafiya sɔrɔ, ne na ne da yɛlɛ ka jaabili kɛ.
[21] Ne tɛna mɔgɔ si tanu, ne tɛna kuma nugulen fɔ mɔgɔ si ye.
[22] K'a masɔrɔ ne tɛ se o la, ni ne bɛ o kɛ, ne Dabaa na ne halaki joona.