[1] Ɔwɔ, ne dusukun bɛ yɛrɛyɛrɛ nin kosɔn, a bɛ lamaga ka bɔ a nɔ na.
[2] A' ye lamɛnni kɛ, aw ka a kan lamɛn ko ɲuman ani mankanba min bɛ bɔ a da la.
[3] O kan bɛ mɛn sankolo jukɔrɔ yɔrɔw bɛɛ la, a bɛ a ka san yɛgɛyɛgɛ bila ka taa fo dugukolo dan na.
[4] O kɔ, a konbokan bɛ mɛn, sankulukan ye a fangakan ye. A kanba bɛ mɛn, san yɛgɛyɛgɛ bɛ ye fan bɛɛ.
[5] Ala bɛ a kan bɔ ni sankulukan kabakoma ye. A bɛ kobaw kɛ, an tɛ se ka u faamu.
[6] A b'a fɔ sanbɛlɛ ye ko a ka bi dugukolo kan, a bɛ sanji ni sanjiba ci.
[7] A bɛ taamashyɛn da mɔgɔw bɛɛ kelen-kelen bolo kan, walisa mɔgɔw bɛɛ k'a dɔn ko u ye a ka dafɛnw ye.
[8] O tuma la kungo kɔnɔ sogow bɛ u dogo, ka u to u ka kuluwow kɔnɔ.
[9] Sanji bɛ na ka bɔ worodugu yanfan fɛ, saheli yanfan fiɲɛba bɛ na ni nɛnɛ ye.
[10] Ala dafiɲɛ bɛ ji simi. Jiba kunnala bɛ simi.
[11] A bɛ sanfin fa ji la, a b'a to sankaba bɛ yɛgɛyɛgɛ ka jɛnsɛn.
[12] U bɛɛ bɛ yɛlɛmayɛlɛma ka kɛɲɛ ni a sago ye, walisa u ka a ka ci fɔlenw kɛ dugukolo kan.
[13] A bɛ u bila ka kɛ dugukolo gosili bere ye, wala ka a ka ɲumaya jira u la.
[14] Job, i tulo majɔ nin kumaw la. I jɔ ka miiri Ala ka kabakow la.
[15] Ala bɛ o kabakow kɛ cogo min na, ani a bɛ san yɛgɛyɛgɛ ci sankaba fɛ cogo min na, i bɛ o dɔn wa?
[16] A bɛ sankabaw dulon cogo min na, i bɛ o dɔn wa? Hakilitigiya ni dɔnniya dafalen bɛ min na, i bɛ o ka kabakow kɛ cogo dɔn wa?
[17] Ni fiɲɛ tɛ ci ka bɔ worodugu yanfan fɛ, i ka finiw bɛ funteni kɛ i la cogo min na, i bɛ o cogo dɔn wa?
[18] I bɛ se ka sankolo fɛnsɛ i ko Ala, ka o barika bonya i ko dungare nɛgɛma dilalen wa?
[19] An ka kan ka min fɔ a ye, i ka an kalan o la, k'a masɔrɔ an ye ko dɔnbaliw ye, an tɛ se ka kuma a fɛ k'a jaabi.
[20] Jɔni bɛ se k'a fɔ a ye, ko ne b'a fɛ ka kuma? Mɔgɔ jumɛn bɛ a yɛrɛ halakili fɛ?
[21] Ni fiɲɛ tɛmɛnna ni sankabaw ye ka sanfɛla saniya, mɔgɔ si ɲɛ tɛ se ka jɔ tile yeelen na.
[22] Saheli yanfan bɛ manamana i ko sanu, Ala nɔɔrɔba ye siranfɛnba ye.
[23] Ale, Sebaayabɛɛtigi kɔni, an tɛna se ka jɔ a ɲɛ kɔrɔ. A ka bon, barika ni tilennenya bɛ a la, a tɛ kiri tilennen yɛlɛma.
[24] O de kosɔn mɔgɔw ka siran a ɲɛ, mɔgɔ min bɛ a yɛrɛ kɛ hakilitigi ye, a tɛ o jate fɛn ye.