[1] Warijɛ bɔ yɔrɔ bɛ yen, sanu baara yɔrɔ fana bɛ yen, ka a nɔgɔ bɔ a la.
[2] Nɛgɛ bɔra buguri la, kabakurun yeelelen bɛ kɛ nsiranɛgɛ ye.
[3] Mɔgɔ bɛ yeelen bɔ dibi la, a bɛ don fo dugukolo rɔ, fo ka taa se kabakurun dogolenw ma dugukolo jukɔrɔ.
[4] A bɛ dingɛ sen, o dunya ni mɔgɔw sigi yɔrɔ cɛ ka jan, mɔgɔ sen tɛ da yen, a dulonnen bɛ balan, a yɔrɔ ka jan mɔgɔw la.
[5] Dugukolo min bɛ dumuni bɔ, o kɔnɔ fɛnw bɛ dabiri i n'a fɔ tasuma fɛ.
[6] A kabakurunw kɛra safir kabakurunw ye, sanu bɛ sɔrɔ a buguri la.
[7] Sogodun kɔnɔ si tɛ o sira dɔn, duga ɲɛ ma a ye fɔlɔ.
[8] Kungo kɔnɔ waraw tɛ se ka taa yen, waraba ma taama a fɛ.
[9] Mɔgɔ bɛ a bolo da kɛrɛbo fara kan, a bɛ kuluw jukɔrɔla bɔ ka u dabiri.
[10] A bɛ ji dingɛw sen faraw cɛma, a ɲɛ bɛ nafolo yɛrɛwolo ye.
[11] A bɛ ji siraw da geren ka fɛn dogolenw jira kɛnɛkan.
[12] Nka hakilitigiya bɛ sɔrɔ min? Faamuli bɛ sigi yɔrɔ jumɛn?
[13] Mɔgɔ tɛ o sɔngɔ dɔn, a tɛ sɔrɔ mɔgɔ ɲɛnamaw cɛma dugukolo kan.
[14] Jidunba yɔrɔ b'a fɔ ko a tɛ ale la. Kɔgɔji ko a tɛ ale fɛ yen.
[15] Hakilitigiya tɛ san ni sanu ye, warijɛ tɛ a sɔrɔ.
[16] A ni Ofir jamana sanu tɛ se ka suma ɲɔgɔn na wala onikis kabakurun sɔngɔ gɛlɛn, wala safir kabakurun.
[17] Hakilitigiya ni sanu ni wɛrɛ tɛ se ka suma ɲɔgɔn na, a tɛ fale sanu yɛrɛwolo daga la.
[18] Korayi kabakurun ni krisital kabakurun tɛ foyi ye a kɔrɔ. Hakilitigiya ka fisa ni kɔnɔnkisɛ sɔngɔ gɛlɛn ye,
[19] hali mɔgɔ tɛ a ni Etiopi topaz suma ɲɔgɔn na. Mɔgɔ tɛ hali a ni sanu yɛrɛwolo suma ɲɔgɔn na ja la.
[20] Ayiwa, hakilitigiya dun bɛ bɔ min? Faamuli dogolen bɛ yɔrɔ jumɛn?
[21] A dogolen bɛ dugukolo kan fɛn ɲɛnamaw bɛɛ la, a dogolen bɛ sanfɛ kɔnɔw fana la.
[22] Halaki dingɛ dunba ni saya b'a fɔ ko: «An tulow y'a ko mɛn.»
[23] Ala dɔrɔn de bɛ a sira dɔn, ale de bɛ a sigi yɔrɔ dɔn.
[24] K'a masɔrɔ ale b'a filɛ fo ka taa se diɲɛ dan na. A bɛ sankolo jukɔrɔ fɛnw bɛɛ ye.
[25] Ni a ye fiɲɛ ka sebaaya labɛn tuma min na, ni a ye jiw suma ni sumani fɛn ye,
[26] ka sanji ko latigɛ tuma min na ka sira dila sanpɛrɛn tasuma ye,
[27] o tuma la a ye hakilitigiya ye ka a ko fɔ, ka a ju sigi ka a sɛgɛsɛgɛ ka se a dan na.
[28] O kɔ, a y'a fɔ mɔgɔ ye ko: «A filɛ, Matigi ɲɛsiran ye hakilitigiya ye, ka fara ko jugu la, o ye faamuli ye.»