[1] Job y'a jaabi ko:
[2] Tiɲɛ la, mɔgɔ si tɛ aw kɔ, hakilitigiya na ban aw salen kɔ.
[3] O bɛɛ n'a ta, ne ka hakilitigiya bɛ aw ta bɔ. Ne ni aw si man fisa ni si ye. Aw ye min fɔ, jɔni tɛ aw ka ko fɔlenw dɔn?
[4] Ne kɛra yɛlɛbɔ fɛn ye ne teriw ɲɛ na, ne de ye Ala deli, Ala ye ne jaabi. Mɔgɔ tilennen dafalen kɛra yɛlɛbɔ fɛn ye.
[5] Mɔgɔ min bɛ hɛrɛ la, o bɛ bɔnɛ mafiɲɛya. Mɔgɔ minw senw bɛ talon, olu bɛ dɔgɔyali sɔrɔ.
[6] Hɛrɛ bɛ sigi binkannikɛlaw ka sow kɔnɔ. Mɔgɔ minw bɛ Ala neni, minw bɛ u yɛrɛ barika kɛ u ka bato fɛn ye, olu lakanalen don ko ɲuman.
[7] Nka i ka baganw ɲininka, olu na i kalan, wala sanfɛ kɔnɔw, olu na kalan di i ma.
[8] I ka kuma dugukolo fɛ, o na i kalan, kɔgɔji kɔnɔ jɛgɛw na u ka kalan di i ma.
[9] Dafɛn la jumɛn m'a dɔn ko Matigi bolo ye fɛnw bɛɛ da?
[10] Dafɛnw bɛɛ ka ɲɛnamaya bɛ ale bolo, hali Hadamadenw bɛɛ ninakili bɛ ale bolo.
[11] Tulo tɛ kumaw faranfasi i ko nɛnkun bɛ dumuni faranfasi cogo min na wa?
[12] Hakilitigiya bɛ sɔrɔ cɛkɔrɔbaw fɛ. Faamuli bɛ sɔrɔ si tile jan tigi fɛ.
[13] Hakilitigiya ni barika bɛ Ala la, ɲɛnamaya ni faamuli ye ale ta ye.
[14] A filɛ, a bɛ fɛn min ci, mɔgɔ si tɛ se ka o jɔ tun. A bɛ da tugu mɔgɔ da la, mɔgɔ si tɛ se ka o yɛlɛ.
[15] A bɛ jiw lajɔ yɔrɔ kelen na, fɛnw bɛɛ bɛ ja. A bɛ ji bila ka taa, o bɛ dugukolo yɔrɔw bɛɛ fa.
[16] Sebaaya ni hakilitigiya ye ale ta ye. Mɔgɔ lafililen ni mɔgɔ lafilibaa fila bɛɛ ye a ta ye.
[17] A bɛ ɲɛjiralaw cɛ ka u ladon jɔnya la ka kiritigɛlaw hakili tiɲɛn.
[18] A bɛ masakɛw fanga tiɲɛn ka u cɛ siri ni jɔnya jurukisɛ ye.
[19] A bɛ sarakalasebaaw cɛ ka u bila jɔnya la, ka setigiw labi.
[20] Mɔgɔw jigi bɛ mɔgɔ minw kan, a bɛ kuma ban olu da la, ka cɛkɔrɔbaw ka hakilitigiya minɛ u la.
[21] A bɛ dɔgɔyama lase mɔgɔ tɔgɔbaw ma, ka mɔgɔ barikamaw ka cɛ sirilanw foni.
[22] A bɛ dibila ko dogolenw dayɛlɛ, ka saya dibi bila kɛnɛkan.
[23] A bɛ siyaw jiidi, a bɛ u halaki. A bɛ siyaw fɛnsɛ, a bɛ u lajɛ fana.
[24] A bɛ hakilitigiya minɛ dugukolo kan mɔgɔw kuntigiw la, a b'a to u fililen ka yaala kungokolon kɔnɔ, k'a sɔrɔ sira tɛ yen.
[25] U bɛ mɔmɔli kɛ dibi la k'a sɔrɔ yeelen si tɛ yen. A bɛ u talontalon i ko dɔlɔtɔ.