[1] Mun kosɔn Sebaayabɛɛtigi tɛ a ka donw latigɛ? Mɔgɔ minw b'a dɔn, mun kosɔn olu tɛ a ka kiri donw ye?
[2] A filɛ, foro danw bɛ yɛlɛma. U bɛ mɔgɔw ka sagaw bɔsi u la ka u balo.
[3] U bɛ falatɔw ka fali minɛ, ka muso cɛ salen ka ntura minɛ juru kun kɔrɔ.
[4] U bɛ sɛgɛnbaatɔ gɛn ka bɔ sira la, ka jamana kɔnɔ faantanw wajibiya ka u dogo.
[5] Olu bɛ i ko kungo fali minw bɛ taa dumuni ɲini. U bɛ taa u yɛrɛ ka baara la sɔgɔma da fɛ ka dumuni ɲini. U bɛ dumuni sɔrɔ kungokolon kɔnɔ u denw ye.
[6] U bɛ suman nɔɔrɔ bɔ foro la, ka u juguw ka rezɛn nakɔ nɔɔrɔ bɔ.
[7] U farilankolon bɛ su bɛɛ kɛ finintanya kosɔn. Birifini tɛ u fɛ ka nɛnɛ bɛn.
[8] Sanji ye u gosi kulu kan, u bɛ u dogo faraw cɛma, katuguni dogo yɔrɔ wɛrɛ tɛ yen.
[9] Mɔgɔ dɔw bɛ den fa salen bɔsi ka bɔ a ba sin na, ka tɔnɔmada fɛn minɛ faantan fɛ.
[10] U bɛ olu farilankolon wajibiya u ka taama k'a sɔrɔ fini tɛ u la. U kɔngɔtɔw bɛ suman tigɛlen doni.
[11] U bɛ tulu bɔ u makɛ ka tulu bɔ yɔrɔ la. U bɛ forokili kɛ rezɛn ji bɔ yɔrɔ la, k'a sɔrɔ minnɔgɔ bɛ u la.
[12] Dugu kɔnɔ mɔgɔ minw bɛ ɲini ka sa, olu bɛ kasikan bɔ, mɔgɔ joginnenw bɛ kasikan bɔ, nka Ala tɛ u kan lamɛn.
[13] Dɔ wɛrɛw ye kɛnɛyeelen juguw ye, u tɛ o kɛnɛ sira dɔn, u tɛ taa o kɛnɛ siraw fɛ.
[14] Mɔgɔ fagala bɛ wuli kɛnɛbɔ da fɛ, a bɛ faantan ni sɛgɛnbaatɔ faga. A bɛ kɛ i ko sonyalikɛla su fɛ.
[15] Jatɔyakɛla bɛ su makɔnɔ, a b'a fɔ ko ɲɛ si tɛna a ye. A bɛ fini biri a ɲɛda la.
[16] Dɔ wɛrɛw bɛ so daw kari dibi la, u bɛ u datugu tile fɛ, u tɛ kɛnɛ dɔn.
[17] Sɔgɔma da bɛ kɛ olu ɲɛ na i ko saya dibi, k'a masɔrɔ u bɛ saya dibila siran kow dɔn kosɛbɛ.
[18] Mɔgɔ juguw ka fiɲɛ, u bɛ taa ji fɛ. U ciyɛn dangalen bɛ dugukolo kan, u tɛ taa u ka rezɛn nakɔ la tun.
[19] Ja ni funteni bɛ ji similen ja, o cogo la saya dibi bɛ kojugukɛlaw dun ka u ban.
[20] U ba na ɲinɛ u kɔ. Ntumuw na u dun k'u ban. Mɔgɔ tɛna miiri u ko la tun. Tilenbaliya na kari i ko jirisun tigɛlen.
[21] Muso bange kɛbali min ma den sɔrɔ, u bɛ o bolo fɛn bɔsi a la. U tɛ ko ɲuman kɛ muso cɛ salen ye.
[22] Nka Ala bɛ olu si tile caya ni a ka sebaaya ye. Ni u jigi tigɛra ɲɛnamaya ko la, u bɛ wuli ko kura.
[23] U jigi dalen bɛ, u lakanalen bɛ Ala barika la, nka a ɲɛ bɛ u ka siraw la tuma bɛɛ.
[24] Mɔgɔ juguw kɔrɔtalen don, nka ni waati dɔɔnin tɛmɛnna, u tɛ ye tun. U bɛ bi, u bɛ sa i ko mɔgɔ tɔw. U bɛ tigɛ i ko ɲɔ tinzan.
[25] O tɛ tiɲɛ ye wa? Jɔni na ne kɛ nkalontigɛla ye, ka ne ka kuma kɛ fuu ye?