[1] Cɛ dɔ tun bɛ Uz jamana la, o tɔgɔ ko Job. O tun ye mɔgɔ tilennen dafalen ye. A tun bɛ siran Ala ɲɛ ka i mabɔ tilenbaliya kow la.
[2] Denkɛ wolonwula ani denmuso saba tun bɛ a fɛ.
[3] Saga waa wolonwula ni ɲaamɛ waa saba ni ntura waa kelen ni falimuso kɛmɛ duuru ani baaraden caman tun bɛ a fɛ. O cɛ tun ye kɔrɔn fɛ mɔgɔw bɛɛ la nafolotigi ye.
[4] A denkɛw tun bɛ deli ka taa ɲɔgɔn ka so ka dumuniba kɛ ɲɔgɔn fɛ. U tun bɛ u balimamuso saba wele ka na dumuni kɛ ka minni kɛ u fɛ fana.
[5] Ni Job denkɛw ka dumuniba donw dafara tuma min na, a tun bɛ u wele walisa ka u saniya. Job tun bɛ soli ka wuli ka saraka jenitaw faga u bɛɛ kelen-kelen ye, k'a masɔrɔ a tun b'a fɔ ko: «A dɔrɔ ne denw ye Ala hakɛ ta u dusukunw na.» Job tun bɛ o kɛ tuma bɛɛ.
[6] Ayiwa, Ala denkɛw taara u jɔ Matigi ɲɛ kɔrɔ don dɔ la. Sitanɛ fana taara u cɛma.
[7] Matigi y'a fɔ Sitanɛ ye ko: «I nana ka bɔ min?» Sitanɛ ye Matigi jaabi ko: «Ne nana ka bɔ ne yaalayaala yɔrɔw la dugukolo kan.»
[8] Matigi y'a fɔ Sitanɛ ye ko: «Yala i ye ne ka jɔnkɛ Job cogo kɔlɔsi wa? A bɔɲɔgɔnko mɔgɔ dafalen tilennen si tɛ dugukolo kan. A bɛ siran Ala ɲɛ ka i mabɔ ko jugu la.»
[9] Sitanɛ ye Matigi jaabi ko: «E bɛ miiri ko Job bɛ siran Ala ɲɛ gwansan wa?
[10] E de ma a ni a ka so ni a bolo fɛnw bɛɛ lamini wa? I ye a bolo baara bɛɛ sabati. A ka baganw ye jamana yɔrɔw bɛɛ fa.
[11] Nka e ka i bolo mɔɔnɔbɔ ka se a ka fɛnw bɛɛ ma, siga t'a la, a na i danga i yɛrɛ ɲɛ na.»
[12] Matigi y'a fɔ Sitanɛ ye ko: «Ayiwa, a bolo fɛnw bɛɛ labilara i ye, nka i kana maga a farisogo la.» O tuma la Sitanɛ taara ka bɔ Matigi ɲɛ kɔrɔ.
[13] Ayiwa, don dɔ la ka Job denkɛw ni a denmusow to dumuni ni minni la u kɔrɔkɛba ka so,
[14] ciden dɔ sera Job ma k'a fɔ a ye ko: «Misi nturaw tun bɛ sɛnɛ la, falimusow tun bɛ dumuni la olu kɛrɛ fɛ.
[15] O yɔrɔ nin bɛɛ Saba bɔnsɔn mɔgɔw nana bi u kan ka u cɛ ka baaradenw bɛɛ faga ni npan ye. Ne kelenpe porokotora ka na o kibaru fɔ i ye.»
[16] Ka o cɛ to kuma la, ciden dɔ wɛrɛ nana a fɔ ko: «Sanpɛrɛn jiginna ka bɔ san fɛ ka sagaw ni baaradenw bɛɛ jeni ka u ban. Ne kelenpe porokotora ka na o kibaru fɔ i ye.»
[17] Ka o cɛ to kuma la, ciden dɔ wɛrɛ nana a fɔ ko: «Kaldekaw ye kɛlɛbolo saba labɛn, u nana bi ɲaamɛw kan ka u bɛɛ cɛ ka baaradenw bɛɛ faga ni npan ye. Ne kelenpe porokotora ka na o kibaru fɔ i ye.»
[18] Ka o cɛ to kuma la, ciden dɔ wɛrɛ nana a fɔ ko: «I denkɛw ni i denmusow tun bɛ dumuni ni minni la ɲɔgɔn fɛ u kɔrɔkɛba ka so.
[19] O yɔrɔ nin bɛɛ fununfununba dɔ nana ka bɔ kɛɲɛka fɛ. Kamalenw tun bɛ bon min kɔnɔ, ka o seleke naani gosi ka bi i denw kan. U bɛɛ sara. Ne kelenpe porokotora ka na o kibaru fɔ i ye.»
[20] O tuma la Job wulila ka a ka dulɔkiba fara k'a kun di ka i bi duguma ka batoli kɛ.
[21] A y'a fɔ ko: «Ne farilankolon bangera, ne farilankolon na kɔsegin. Matigi ye dili kɛ, Matigi ye minɛli kɛ, Matigi tɔgɔ ka tanu.»
[22] Nin tɔɔrɔ kow bɛɛ la Job ma jurumu kɛ. A ma Ala tɔgɔ tiɲɛn o si la.