[1] Dugukolo kan mɔgɔw bɛ baara kɛ i ko sɔrɔdasikɛ, a si tilew bɛ kɛ i ko baaraden sarata tilew.
[2] Jɔnkɛ bɛ tile ja janya ɲɛnafilɛ cogo min na, baaraden bɛ a ka sara makɔnɔ cogo min na,
[3] o cogo la ne niyɔrɔ ye kalo tɔɔrɔmaw ye. Sɛgɛn latigɛra ne ye su o su.
[4] Ni ne ye ne da, ne b'a fɔ ko: «Ne na wuli tuma jumɛn?» Su na ban tuma jumɛn? Ne bɛ yɛlɛmayɛlɛma fo ka taa dugu jɛ.
[5] Ne fari yɔrɔw bɛɛ datugura ni ntumuw ni bɔgɔ ye. Ne wolo bɛ ci ka nɛn bɔ ka woyo.
[6] Ne si tilew ka tɛli ni gese dala ka kurunnin filili ye. U bɛ tɛmɛn, mɔgɔ jigi da yɔrɔ si tɛ u kan.
[7] Ne ka Ala, i ka i hakili to a la ko ne bɛ i ko dafiɲɛ, ko ne ɲɛw tɛ se ka hɛrɛ ye tun.
[8] Ɲɛ min ye ne ye, o tɛna ne ye tun. I na ne ɲini ni i ɲɛw ye, ne tɛna kɛ yen tun.
[9] Sankababa bɛ tunun ka ban cogo min na, o cogo la min bɛ jigin ka taa lahara, o tɛna bɔ yen tun.
[10] O tɛ segin ka na a ka so tun, a sigi yɔrɔ kɔrɔ tɛna a dɔn tun.
[11] O de kosɔn ne da kumabali tɛna to, ne na kuma ne ni tɔɔrɔ kow la. Ne na kasi ne ni tɔɔrɔ kow kosɔn.
[12] Yala ne ye kɔgɔji ye wala kɔgɔji la dakabana fɛn, fo i bɛ kɔlɔsibaaw bila ka ne kooli wa?
[13] Ni ne ko: «Ne ka dalan na ne dusu saalo, ne da yɔrɔ na ne ka tɔɔrɔw nɔgɔya,»
[14] o tuma la, i bɛ ne lasiran sugow la, ka ne lasiran ni yeli fɛnw ye, fo ka ne lasiran.
[15] O de kosɔn, ne ni bɛ saya farinma fɛ. Saya ka fisa ne ma kosɛbɛ ni ne toli ye farisogo la.
[16] Ne ɲiginna ɲɛnamaya la, ne ɲɛnama tɛna to tuma bɛɛ. I mabɔ ne la, katuguni ne ni bɛ i ko dafiɲɛ.
[17] Mɔgɔ ye mun ye fo i ka miiri a ko la, ka a kɔlɔsi,
[18] ka taa bɔ a ye sɔgɔma o sɔgɔma ka a kɔrɔbɔ tuma bɛɛ?
[19] I na i ɲɛ bɔ ne la tuma jumɛn? I na waati di ne ma ne ka ne daji kunun tuma jumɛn?
[20] Hadamadenw kɔlɔsibaa, ni ne ye jurumu kɛ, ne ye mun kɛ i la? Mun y'a to i bɛ ne suma ka ne bon ni i ka biɲɛ ye, fo ka ne kɛ doni ye ne yɛrɛ kun?
[21] Mun kosɔn i tɛ ne ka jurumu yafa ne ma, ka ne ka tilenbaliya kow jɔsi ka bɔ yen? K'a masɔrɔ ne bɛ taa ne da buguri la sisan. I na ne ɲini, nka ne tɛna ye tun.