[1] O tuma la, Zofar min bɔra Naama, o ko:
[2] Nin kuma caman tɛna jaabi wa? jo bɛ mɔgɔ da duman fɛ wa?
[3] I ka nparabɔli kumaw bɛ mɔgɔ da tugu wa? I ka dɔgɔyali kumaw b'a to mɔgɔ si tɛ i jaabi wa?
[4] I y'a fɔ Ala ye ko i ka miiriliw tilennen don, ko i jalakibali don a ɲɛ kɔrɔ.
[5] Ni a tun y'a sɔrɔ ko Ala bɛ sɔn ka a da yɛlɛ ka kuma ka i jaabi,
[6] ni a y'a ka hakilitigiya gundo jira i la, olu minw ka dun, ni u dogolen bɛ, i tun n'a dɔn ko Ala ma i tɔɔrɔ ka kɛɲɛ ni i ka tilenbaliya kow bɛɛ ye.
[7] I bɛ se ka Ala ka ko dunbaw dɔn ka Sebaayabɛɛtigi ka kow bɛɛ faamu wa?
[8] Olu bɛ i ta san fɛ, i bɛ se ka mun kɛ? Olu ka dun ka tɛmɛn lahara kan, i bɛ se ka u dɔn cogo di?
[9] U ka jan ka tɛmɛn dugukolo kan, u kɔnɔ ka bon ni kɔgɔji kɔnɔ ye.
[10] Ni Ala ye jalakitigi minɛ, ni a y'a bila kaso la, ni a taara ni o ye kiri yɔrɔ la, jɔn bɛ se ka a bali?
[11] K'a masɔrɔ ale bɛ mɔgɔ nkalontigɛlaw dɔn, a bɛ tilenbaliya kow ye ni siga tɛ.
[12] Nka Hadamaden hakili bɛ i ko fatɔ ta. Kungo faliden bɛ wolo cogo min na, Hadamaden bɛ bange ten.
[13] Ayiwa, ni i ye i dusukun yɛlɛma Ala fan fɛ, ni i ye i bolow bɔ ale nɔ fɛ,
[14] ka i bolo mabɔ tilenbaliya kow la, i kana a to tilenbaliya ka to i ka so kɔnɔ.
[15] O tuma la i jalakibali na i kun kɔrɔta, i bamalen na to, i tɛna siran.
[16] I na ɲinɛ i ka ɲɛgwan kow kɔ. U na kɛ i ko ji min woyora ka taa, i hakili tɛna to u la tun.
[17] I si tile na manamana ka tɛmɛn tile gwan yeelen kan, dibi yɛrɛ na kɛ i ko sɔgɔma da.
[18] I na kɛ dannamɔgɔ ye k'a masɔrɔ jigi bɛ i fɛ. I na i laminiw filɛ, i lakanalen na i da.
[19] I na i da, mɔgɔ si tɛna i tɔɔrɔ, mɔgɔ caman na dɛmɛni ɲini i fɛ.
[20] Nka mɔgɔ juguw ɲɛw na dibi, u tɛna dogo yɔrɔ sɔrɔ. U jigi na kɛ saya ye.