[1] O tuma la Job ko:
[2] Ne bɛ to ka nin kuma kelen mɛn, aw bɛɛ ye dusu saalobaa diminnenw ye.
[3] Aw na tila aw ka kuma fuu fɔli la tuma jumɛn? Mun kosɔn aw bɛ ne jaabi ni dusu kasi kuma ye?
[4] Ko min ye ne sɔrɔ, ni o tun ye aw sɔrɔ, ne fana tun na se ka kuma i ko aw bɛ kuma cogo min na. Ne tun bɛ se ka kuma labɛn aw kama ka ne kun kɔmi aw kama.
[5] Ne tun na aw dɛmɛ ni ne da ye, ne dawolo tun bɛ se ka aw dusu saalo.
[6] Ni ne bɛ kuma, ne ka tɔɔrɔw tɛ nɔgɔya, ni ne bɛ ne makun, u na nɔgɔya wa?
[7] Ala ye ne barika ban sisan, ɔwɔ, i ye ne ka so fura k'a ban.
[8] I ye ne minɛ ko juguya, o kɛra seereya ye ne kama. Ne fasali wulila ne kama ka ne jalaki.
[9] A diminnen ye ne farafara, a tugura ne nɔ fɛ ka ne tɔɔrɔ. A ye a ɲinw ɲimi ne kama, ne jugu ye a ɲɛ boso ne la.
[10] Ne juguw ye u daw yɛlɛ ne kama, u ye ne gosi ne da la ka ne mafiɲɛya. U bɛɛ wulila ne kama walisa ka ne faga.
[11] Ala ye ne don mɔgɔ tilenbaliw bolo, a ye ne fili mɔgɔ juguw bolo.
[12] Ne tun bɛ lafiya la, Ala ye ne yuguyugu. A ye ne minɛ ne ngɔnɔ ma ka ne karikari, a ye a ka biɲɛw bɛɛ sin ne ma.
[13] A ka biɲɛw kɛra ka ne lamini, a ka biɲɛw ye ne kɔla kuruw fila sɔgɔ, hinɛ t'a la. A ye ne fiyɛn bɔn duguma.
[14] A bɛ to ka bi ne kan ka ne karikari, a bɛ girin ka da ne kan i ko fangatigi farinma.
[15] Ne ye cafu fini biri ne fari la, ka ne ɲɛda biri buguri la.
[16] Ne ɲɛda bilenna kasi fɛ, saya dibi bɛ ne ɲɛwolow kan.
[17] O bɛɛ n'a ta ne bolow ma ko jugu si kɛ, ne ka delili jɛlen tun don.
[18] E, dugukolo, i kana ne joli datugu, walisa ne pɛrɛnkan ka bɔ ko ɲuman.
[19] Ne seere yɛrɛ bɛ sankolo la nin waati la, ne lafasabaa bɛ yɔrɔ kɔrɔtalenw san fɛ.
[20] Ne teriw bɛ yɛlɛ bɔ ne la, nka ne bɛ Ala deli ni ɲɛji ye,
[21] walisa a ka ko latigɛ mɔgɔ ni Ala yɛrɛ cɛ, ka Hadamaden ta fɔ a mɔgɔɲɔgɔn ye.
[22] K'a masɔrɔ san dama min latigɛra ne ye, o bɛ ban joona. Ne bɛ taa sira min fɛ, mɔgɔ tɛ kɔsegin ka bɔ yen.